🙏🏻🌸 ശ്രീ കൃഷ്ണമൂർതേ നമസ്തേ ll 🌸🙏🏻 श्रीकृष्णमूर्ते नमस्ते।।

Описание: മൃദംഗവാദനകലയിലെ ജീവിക്കുന്ന ഇതിഹാസമായ മൃദംഗപിതാമഹൻ ഡോ. ടി.കെ.മൂർത്തി(തനു കൃഷ്ണമൂർത്തി, 13 ആഗസ്റ്റ് 1924) അവർകൾ കഴിഞ്ഞ ആഗസ്റ്റ് 13 ന് ജീവിതയാത്രയുടെ 100 സുവർണവർഷങ്ങൾ പൂർത്തീകരിച്ചിരിക്കുകയാണ്. അദ്ദേഹത്തിനോടുള്ള ആദരസൂചകമായി ഒക്ടോബർ 30 ന് ആർ.എൽ.വി.കോളേജിന്റെ സാംസ്കാരികോത്സവമായ സമഭാവന 2024 ൽ കോളേജിലെ മൃദംഗവിഭാഗം മഹാനായ കലാകാരന്റെ പാദാരവിന്ദങ്ങളിൽ “ശ്രീ കൃഷ്ണമൂർത്തേ നമസ്തേ” എന്ന സംഗീതശില്പം പ്രൗഗംഭീരമായി സമർപ്പിച്ചു.

രാഗം,താനം,പല്ലവി,ലയവിന്യാസം എന്നിങ്ങനെയായി സംഗീതശില്പം വിഭാവനം ചെയ്തു അവതരിപ്പിച്ചത്.
“100” എന്ന സംഖ്യയെ പ്രതിനിധാനം ചെയ്യുന്നതിനായി 100 (25 അക്ഷരകാലം) മാത്രകൾ വരുന്ന 72 മേളകർത്താ താളപട്ടികയിലെ ഏഴാമത് താളമായ “സേനാവതി(8UOOIUIUO)” താളത്തിലും “സേനാവതി” രാഗത്തിലുമാണ് പല്ലവി ചിട്ടപ്പെടുത്തിയിരിക്കുന്നത്.മൂർത്തി സാറിന്റെ 100 സംഗീതവർഷങ്ങളെ പ്രകീർത്തിച്ചുകൊണ്ട് പല്ലവി രചിച്ചിരിക്കുന്നത് സംസ്കൃത മഹാപണ്ഡിതനും യശ:ശരീരനുമായ പ്രൊഫസർ എ.വി.ശങ്കരൻ അവർകളുടെ സത്പുത്രനും എൺപതിലധികം സംഗീതകൃതികളുടെ കർത്താവുമായ ഡോ. വി.വി.ഗിരി (റിട്ടയേർഡ് സംസ്കൃതം അസ്സോസിയേറ്റ് പ്രൊഫസർ) അവർകളാണ്.

സേനാവതിരാഗത്തിൽ പ്രസ്തുത പല്ലവി ചിട്ടപ്പെടുത്തുകയും വേദിയിൽ അവതരിപ്പിക്കുകയും ചെയ്യതത് ആർ.എൽ.വി.കോളേജിലെ ഗസ്റ്റ് അദ്ധ്യാപകനായി സേവനം അനുഷ്ഠിച്ചിരുന്ന ആനന്ദ് കെ. രാജ് ആണ്. കൂടെ വയലിനിൽ ആർ. എൽ. വി.കോളേജിലെ ഗസ്റ്റ് അധ്യാപികയായ ആര്യദത്ത കെ.ആർ,വീണയിൽ രണ്ടാം വർഷ എം.എ.വീണ വിദ്യാർത്ഥിനിയായ കൃതി എസ്. രാജ്, മൃദംഗത്തിൽ മൃദംഗവിഭാഗം മേധാവി ഡോ.അനീഷ് കൃഷ്ണൻ, എം എ മൃദംഗം രണ്ടാംവർഷ വിദ്യാർത്ഥികളായ എസ്.നന്ദകിഷോർ, എഡ്വിൻ ജോയ്, വിവേക് കെ., ദേവാനന്ദ് എ.എസ്, രാമാനന്ദ് ആർ, യദുകൃഷ്ണൻ ടി.എസ്, ജിഷ്ണു ആർ വർമ്മ, എസ്.ഗാനമൂർത്തി, ഡി. ചന്ദ്രകാന്ത് എന്നിവരും ഒന്നിച്ചു.