Экологтар тораңғы ағашын сақтап қалудың қарекетіне кірісті

Описание: Балқаш көлін жағалай өскен тораңғы ағашы құрып кетудің аз-ақ алдында тұр.

Осылай деп дабыл қаққан сол өңірдің экологтары Қызыл кітапқа енген сирек кездесетін өсімдікті сақтап қалудың қарекетіне кірісті.

Ардагер, эколог Рымкүл Машұрбекованың айтуынша, қазір Балқаш маңында бар-жоғы 500 түп тораңғы қалыпты. Дана халқымыз бұл ағашты ежелден «шөл даланың падишасы» депе қадір тұтқан.

Шеберлер оның берік діңінен домбыра, қобыз жасаған. Тораңғы шөлді аймаққа төзімді, құм көшкінінен, аптап ыстықтан және жерді тұзданудан қорғайтын қасиеттерімен ерекше.

Өкінішке орай, Балқаш маңайындағы Қызылкеңгір, Ақсор топырақ, Кеңаңғар, Мыңшұқыр, Бақтай, Малөзек, Шұңқыр деп аталатын шағын шоқ тоғайлар қазір жоқ. Біразы өртенді, қалғаны оталып кеткен. Жергілікті табиғат жанашырлары араша түсіп, бірер жыл бұрын тораңғы тоғайын қорыққа айналдыруға ұсыныс жасаған.

Алайда оның аумағы аз болып шығыпты. Қорық мәртебесін алу үшін аумағы кемінде 50 гектардан асу керек көрінеді.

Рымкүл Машұрбекова, эколог

-Құрып кетеді, иә. Сол үшін ғой Қызыл кітапқа енгізіліп отырғаны. Әрине, әрі қарай жұмыс істеп, Үкімет тарапынан қаржы бөлініп, ғалымдар ағашты өсіруге өздерінің көмектерін тигізіп, бір бақ алып өсіретін болса, бұл Балқаштың маңайы меніңше бауға толуға тиіс.