مۇڭزار: ئالدىدا - ئابدۇرېھىم ھېيت Mungzar: Aldida - Abdurehim Heyt

Описание: ئالدىدا
تېكىستى: نىمشېھىت ئەرمىيا ئېلى سايرامى
مۇزىكىسى: ئابدۇرېھىم ھېيت
دۇتار ۋە ناخشىدا: ئابدۇرېھىم ھېيت
«مۇڭزار» ناملىق قاپلىق ئۈنئالغۇ لېنتىسىدىن كىرگۈزۈلگەن
تېكىست قوشۇلۇپ «مۇساپىرمەن» قانىلىدا تارقىتىلدى

ۋەسلىدىن ئۆزگە كېرەكمەس ماڭا جانان ئالدىدا
ئارزۇيۇم سەن ئېرۇرسەن تەن بىلەن جان ئالدىدا
بىر گۈلى رەنا ئېرۇرسەن باغۇ- بوستان ئالدىدا
تا زىيارەت قىلمىسام مەن سېنى ئىمكان ئالدىدا
سەلتەنەتلىك شەۋكىتىڭ بولغاچقا ئىنسان ئالدىدا

دۇنياغا تەڭ ئەيلىمەيمەن تاغلىرىڭنىڭ تاشىنى
سېنى دەپ تاشقا قوشارمەن دۈشمىنىڭنىڭ باشىنى
سەن ئۈچۈن دەريا ئېقىتسام شۇم رەقىبلەر ياشىنى
مۇمكىن ئولغايمۇ كۆرۈشكە ئايغا ئوخشاش قاشىنى
قارا بەختىم ئاق بولۇردى شۇندا رەھمان ئالدىدا

ۋا دەرىخا، قايسى كۈندۇر، شۇم رەقىب باستى ئاياق
سەن كەبى ھۆر- نازىنىنلار ئۈستىگە سالدى تاياق
مەن قۇچاغىڭدا تۇرۇپ تارتتىم ئەجەب دەردۇ- پىراق
نېمىتىڭ لەززەتلىرىدىن ئايرىلىپ قالدىم يىراق
بوينى باغلانغان مۈشۈكتەك ساڭدا چاشقان ئالدىدا

مەن بارۇرمەن، ئەي نىگارىم، سەن ئۈمىدنى ئۈزمىگىن
دۈشمىنىڭنى ئۇر پەقەت، ئەركىنگىنە يۈرگۈزمىگىن
ئالدىنىپ دۈشمەن بىلەن سەن ئەيشى- ئىشرەت تۈزمىگىن
شۇم رەقىبگە باغلىرىڭنىڭ مىۋىسىن ئۈزگۈزمىگىن
ئەسلىگىن خار بولغىنىمنى ئۇندا زىندان ئالدىدا

ئەر ئەمەسمەن دۈشمىنىڭنىڭ قانىنى ئاققۇزمىسام
خائىنلارنىڭ ئەيىبىنى كۆكسىگە تاققۇزمىسام
ئوت- زەھەرلىك نەشتىرىلە ئۆزىنى چاققۇزمىسام
ئەللەي ئېتىپ يەر «بۆشۈك» تە ھەممىسىن ياتقۇزمىسام
شۇندا مەرد نامىنى ئالغۇم شاھى مەردان ئالدىدا

مەيلى مەھبۇب باشىدا قانلىق قىلىچىڭ پارقىرات
مەيلى ۋەھشىيلىك بىلەن ئادەمچىلىك ئاڭنى يوقات
ئىنتىقام ئالغۇم سېنىڭدىن، تا جېنىم تەندە ھايات
ھېچقاچان ئادەم يېڭىلمەس ۋەھشىي ھايۋان ئالدىدا
كۈرىشىم ئارتار تېخى قىز ۋە ئوغلان ئالدىدا
شۇندا ئەۋلادىم تۇرۇر دەۋاغا سۇلتان ئالدىدا


Aldida
Tékisti: Nimshéhit Ermiya Éli Sayrami
Muzikisi: Abduréhim Héyt
Dutar we naxshida: Abduréhim Héyt
"Mungzar" namliq qapliq ün'alghu léntisidin kirgüzülgen
Tékist qoshulup Musapirmen qanilida tarqitildi

Weslidin özge kérekmes manga janan aldida
Arzuyum sen érursen ten bilen jan aldida
Bir güli rena érursen baghu- bostan aldida
Ta ziyaret qilmisam men séni imkan aldida
Seltenetlik shewkiting bolghachqa insan aldida

Dunyagha teng eylimeymen taghliringning tashini
Séni dep tashqa qosharmen düshminingning bashini
Sen üchün derya éqitsam shum reqibler yashini
Mumkin olghaymu körüshke aygha oxshash qashini
Qara bextim aq bolurdi shunda Rehman aldida

Wa derixa, qaysi kündur, shum reqib basti ayaq
Sen kebi hör- nazininlar üstige saldi tayaq
Men quchaghingda turup tarttim ejeb derdu- piraq
Némiting lezzetliridin ayrilip qaldim yiraq
Boyni baghlanghan müshüktek sangda chashqan aldida

Men barurmen, ey nigarim, sen ümidni üzmigin
Düshminingni ur peqet, erkin'gine yürgüzmigin
Aldinip düshmen bilen sen eyshi- ishret tüzmigin
Shum reqibge baghliringning miwisin üzgüzmigin
Esligin xar bolghinimni unda zindan aldida

Er emesmen düshminingning qanini aqquzmisam
Xa'inlarning eyibini köksige taqquzmisam
Ot- zeherlik neshtirile özini chaqquzmisam
Elley étip yer «böshük» te hemmisin yatquzmisam
Shunda merd namini alghum Shahi Merdan aldida

Meyli mehbub bashida qanliq qiliching parqirat
Meyli wehshiylik bilen ademchilik angni yoqat
Intiqam alghum séningdin, ta jénim tende hayat
Héchqachan adem yéngilmes wehshiy haywan aldida
Kürishim artar téxi qiz we oghlan aldida
Shunda ewladim turur dewagha sultan aldida


Алдида
Текисти: Нимшеһит Әрмия Ели Сайраминиң
Музыкиси: Абдуреһим Һейт
Дутар вә нахшида: Абдуреһим Һейт
"Муңзар" намлиқ қаплиқ үнъалғу лентисидин киргүзүлгән
Текист қошулуп Мусапирмән қанилида тарқитилди

Вәслидин өзгә керәкмәс маңа җанан алдида
Арзуюм сән ерурсән тән билән җан алдида
Бир гүли рәна ерурсән бағу- бостан алдида
Та зиярәт қилмисам мән сени имкан алдида
Сәлтәнәтлик шәвкитиң болғачқа инсан алдида

Дуняға тәң әйлимәймән тағлириңниң ташини
Сени дәп ташқа қошармән дүшминиңниң башини
Сән үчүн дәря еқитсам шум рәқипләр яшини
Мумкин олғайму көрүшкә айға охшаш қашини
Қара бәхтим ақ болурди шунда Рәһман алдида

Ва дәриха, қайси күндур, шум рәқип басти аяқ
Сән кәби һөр- назининлар үстигә салди таяқ
Мән қучағиңда туруп тарттим әҗәб дәрду- пирақ
Немитиң ләззәтлиридин айрилип қалдим йирақ
Бойни бағланған мүшүктәк саңда чашқан алдида

Мән барурмән, әй нигарим, сән үмитни үзмигин
Дүшминиңни ур пәқәт, әркингинә йүргүзмигин
Алдинип дүшмән билән сән әйши- ишрәт түзмигин
Шум рәқипкә бағлириңниң мивисин үзгүзмигин
Әслигин хар болғинимни унда зиндан алдида

Әр әмәсмән дүшминиңниң қанини аққузмисам
Хаинларниң әйибини көксигә таққузмисам
От-зәһәрлик нәштирилә өзини чаққузмисам
Әлләй етип йәр "бөшүк" тә һәммисин ятқузмисам
Шунда мәрт намини алғум Шаһи Мәрдан алдида

Мәйли мәһбуб башида қанлиқ қиличиң парқират
Мәйли вәһшийлик билән адәмчилик аңни йоқат
Интиқам алғум сениңдин, та җеним тәндә һаят
Һечқачан адәм йеңилмәс вәһший һайван алдида
Күришим артар техи қиз вә оғлан алдида
Шунда әвладим турур дәваға султан алдида