SIDA GEED CALEENLIYO. MAXAMED AXMED KULUC

Описание:    / jaalleallemagan  
SIDA GEED CALEENLIYO . MAXAMED AXMED KUUC
Sida geed caleenliyo
Ubax guud ka qariyeen
ooy gooni laamaha
ay midiba geesteed
hoobaan is gaadhiyo
guntin midho ah leedahay
oo soo gandoodoo
galka faraqa soo daray
oo godon barwaaqo ah
durdur aan go’ayniyo
gacan webi ku yaaliin
oon gu iyo jiilaal
midab guurin baad tahay.
Gabadh yahay kalgacalbaan
goortaan ku eegoba
qalbigayga gelisaa
waxse aanan garanayn
ii gunuday caashaqe
halka aad i gaadhsiin.
Sidaad tahay gamaan faras
senge geesi daaqsaday
oo uu garduur miray
sodon beri iyo gawdeed
uu goobay farowgii
sararta iyo gaadada
oo galangalcooboo
cududuhu gamuurmeen
oo galaba loo raro
sida ramad guyaal dhalay
hadba kaynta geedo leh
oon guluf colaadiyo
weli socoto dheer gelin
Gabadh yahay kalgaclbaad
goortaan ku eegoba
qalbigayga gelisaa
waxse aanan garanayn
ii gunuday caashaqe
halka aad i gaadhsiin.
Sida gubanka qaarkii
dhul gargoorku siman yahay
ama maadh galdhiidhoo
gubatiyo ku taal hawd
oo laba gardhooboo
badhba gees u seexdeen
dharabka iyo geedaha
quruxdooda gaarka ah
ama haro gingimanoo
guud ka xarfanaysoo
shinbiruhu ka giigeen
oon gu iyo jiilaal
midab guurin baad tahay
Gabadh yahay kalgacalbaan
goortaan ku eegoba
qalbigayga gelisaa
waxse aanan garanayn
ii gunuday caashaqe
halka aad i gaadhsiin…