តើអាវុធអ្វីខ្លះដែលចិនដាក់សម្ញែង ក្នុងព្យុហយាត្រាយោធា ?

Описание: If you enjoyed this video, please click the like button, leave a comment and subscribe to my channel.
តើអាវុធអ្វីខ្លះដែលចិនដាក់សម្ញែង ក្នុងព្យុហយាត្រាយោធា?
03-09-2025
(ប៉េកាំង)៖ ប្រធានាធិបតីចិន លោក ស៊ី ជីនពីង នៅថ្ងៃពុធ ទី៣ ខែកញ្ញា បានចុះត្រួតពិនិត្យដោយផ្ទាល់ការធ្វើព្យុហយាត្រាយោធាដ៏ធំសម្បើមមិនធ្លាប់មានរបស់ចិន ដើម្បីប្រារព្ធខួបលើកទី៨០ នៃការចុះចាញ់របស់ជប៉ុន ក្នុងសង្រ្គាមលោកលើកទី២ ដែលក្នុងប្រទេសចិនត្រូវបានគេហៅថាជាទីវាជ័យជម្នះថ្ងៃទី៣ ខែកញ្ញា។ ខាងក្រោមនេះគឺជាអាវុធមួយចំនួនរបស់កងទ័ពរំដោះប្រជាជនចិន PLA ដែលត្រូវបានដាក់សម្ញែងក្នុងព្យុហយាត្រាយោធា ដើម្បីបង្ហាញពីឬទ្ធិអំណាចយោធាចិន៖
មីស៊ីល៖ ចិនបានបញ្ចេញមីស៊ីលមានសមត្ថភាពបំពាក់ក្បាលគ្រាប់នុយក្លេអ៊ែរដែលអាចបាញ់ចេញពីលើដីគោក សមុទ្រ និងអាកាសក្នុងពេលជាមួយគ្នា ហើយនេះជាលើកដំបូងបំផុតដែលចិនបង្ហាញអាវុធនុយក្លេអ៊ែរទាំង៣ ក្នុងពេលជាមួយគ្នា។ មីស៊ីលទាំងនោះរួមមានមីស៊ីលរយៈចម្ងាយ Jinglei-1 បាញ់ចេញពីយន្ដហោះចម្បាំង មីស៊ីលអន្តរទ្វីប Julang-3 បាញ់ចេញពីនាវាមុជទឹក និងមីស៊ីលអន្តរទ្វីបបាញ់ចេញពីដីគោក Dongfeng-61 (DF-61) និង Dongfeng-31 ដែលសុទ្ធសឹងជាប្រភេទអាវុធដែលត្រូវបានទីភ្នាក់ងារសារព័ត៌មានចិនចាត់ទុកថាជាអាវុធយុទ្ធសាស្ត្រដ៏មានអំណាចរបស់ចិនដើម្បីការពារអធិបតេយ្យ និងភាពថ្លៃថ្នូររបស់ជាតិ។
មីស៊ីល Dongfeng-5C (DF-5C) ក៏ត្រូវបានបង្ហាញក្នុងព្យុហយាត្រាយោធានៅថ្ងៃពុធផងដែរ។ DF-5C គឺជាកំណែចុងក្រោយបំផុតនៃមីស៊ីលបាលិស្ទីគអន្តរទ្វីបដែលត្រូវបានចិនដាក់ឱ្យប្រើប្រាស់ក្នុងទសវត្សរ៍ឆ្នាំ១៩៧០។ មីស៊ីលនេះដំណើរការដោយឥន្ធនៈរាវ និងមានសមត្ថភាពពាំក្បាលគ្រាប់ច្រើនគ្រាប់។ Xinhua បាននិយាយថា DF-5C អាចបាញ់ទៅដល់គ្រប់ទីកន្លែងទាំងអស់នៅជុំវិញពិភពលោក។ ប៉ុន្តែគេមិនទាន់ច្បាស់ថាតើ DF-5C មានលក្ខណៈខុសប្លែកគ្នាយ៉ាងណាពី DF-5B ដែលជាមីស៊ីលបាលិស្ទីគអន្តរទ្វីបដូចគ្នាដែរនោះទេ? ក្រៅពីនេះ មីស៊ីលល្បឿនលឿនជាងសំឡេងប្រឆាំងនាវាចម្បាំងដែលចិនធ្លាប់បានធ្វើតេស្ដបាញ់ក្នុងការហាត់សមបាញ់កម្ទេច នាវាផ្ទុកយន្ដហោះចម្បាំងអាមេរិក ក៏ត្រូវបានដាក់បង្ហាញនៅឯព្យុហយាត្រាយោធាក្នុងទីក្រុងប៉េកាំងដែរ។ មីស៊ីលល្បឿនលឿនជាងសំឡេងទាំងនោះរួមមាន Yingji-19, Yingji-17 និង Yingji-20។ ចំណែក មីស៊ីល ផ្សេងទៀតដែលត្រូវបានដាក់សម្ញែងដែរនោះមានដូចជាមីស៊ីលគ្រូស Changjian-20A, Yingji-18C, Changjian-1000 និងមីស៊ីលល្បឿនលឿនជាងសំឡេងផ្សេងទៀត ដូចជា Yingji-21, Dongfeng-17 និង Dongfeng-26D ដែលជាសុទ្ធសឹងជាប្រភេទអាវុធត្រូវបានទីភ្នាក់ងារសារព័ត៌មានរដ្ឋចិនរាយការណ៍ថាមានសមត្ថភាពប្រយុទ្ធគ្រប់ស្ថានការណ៍។
អាវុធឡាស៊ែរ៖ ចិនបាន និងកំពុងប្រឹងប្រែងអភិវឌ្ឍអាវុធឡាស៊ែរទុកប្រើប្រាស់ជាប្រព័ន្ធប្រឆាំងនឹងការវាយប្រហារពីដ្រូន។ អាវុធឡាស៊ែរប្រឆាំងដ្រូនដែលត្រូវបានចិនដាក់បង្ហាញរួមមានកាំភ្លើងមីស៊ីល អាវុធឡាស៊ែរថាមពលកម្រិតខ្ពស់។
ដ្រូន៖ ចិនបានបង្ហាញដ្រូនដែលមានសមត្ថភាពធ្វើប្រតិបត្តិទាំងនៅក្រោមទឹក ឬសមុទ្រ និងនៅលើអាកាស ក្នុងនោះមានដ្រូនដែលអាចត្រូវបានប្រើប្រាស់ជាដ្រូនស៊ើបការណ៍ និងវាយប្រហារលើគោលដៅ។ មិនតែប៉ុណ្ណោះ ចិនបានបង្ហាញឧទ្ធម្ភាគចក្រគ្មានមនុស្សបើកដែលត្រូវបានរចនាឡើងសម្រាប់ការធ្វើប្រតិបត្តិការចេញពីនាវាចម្បាំង។ ចំណែក អាវុធសម្រាប់កងទ័ពជើងទឹកមានដូចជា នាវាមុជទឹក នាវាចម្បាំង និងប្រព័ន្ធពង្រាយគ្រាប់មីនសមុទ្រ៕