بدلنا الكفته باللحمه و عملنا اطيب طبق شتوي لازم تجربوا كتييير طيب

Описание: بهالطقس البارد خطر عبالي أعمل كفتة مع الرز، بس ما كان عندي كفتة، ومع إنو الله يبعت الخير والدني برا طايفة، فكرة إنو أخطف حالي عند اللحّام كانت مستحيلة 😅
فقلت: لازم نلاقي حل… والحل كان أطيب مما توقعت!
أنا التيتا سوسو، واليوم جايبتلكن أكلة عنجد حتى أنا تفاجأت بطعمتها 🤍
وبسم الله… يلا نبلّش.
بدل الكفتة استعملت تقريبًا كيلو فتيلة لحمة، قطّعتها شرائح متساوية بالحجم كرمال يستووا كلن مع بعض. الليّة مش إجبارية، بس أنا بحبها، فقطّعت قطعة ليّة لثلاث أجزاء وحطّيتن عجنب.
رحت عغرفة المونة وجبت أصغر حبات بطاطا عندي، وقطّعتن أربع أو ثلاث قطع حسب الحجم، المهم يكون التقطيع متناسق حتى الاستواء يكون متوازن.
حضّرت كمان فليفلة ملونة مقطعة، وبصل صغار مقطعين أربع قطع، ورأس ثوم مقشّر.
هيك صارت كل المكونات الأساسية جاهزة:
لحمة مع ليّة، بطاطا، بصل، فليفلة ملونة، ورأس ثوم.
حطّيت طنجرة عالنار مع شوية زيت نباتي، ولما سخن الزيت بلّشت نزّل اللحمة والليّة وحدة ورا التانية، بطريقة بتسمحلي قلّبن بسهولة بدون ما يستووا من جهة أكتر من التانية.
ضلّيت قلّبن لحد ما صار لونن مائل للبني، وبعدها أضفت مي مغلية تغمرن.
نكّهت بورق غار، عود قرفة، ثلاث حبّات هال، شوية كبش قرنفل وبصل، غطّيت الطنجرة وتركتها تطلع الزفرة.
بعد ما شلت الزفرة، ملّحت اللحمة وتركتها تغلي على مهلا لحد ما تستوي.
بهالوقت، ملّحت البطاطا وقلّيتها نص قلية بزيت حامي، دفعة ورا التانية، بدون ما أكتّر، حتى ما تلزق الحبات ببعض. بعدين فرّدت البطاطا بصينية واسعة.
بمقلاية تانية، حطّيت زيت نباتي ونزّلت الطماطم، وشلت الليّة من بين اللحمة وقطّعتها صغار وضفتها فوق الطماطم، وبعدها البصل، ملّحت وحرّكت لحد ما دبِل.
أضفت الفليفلة الملونة وبهّرت بكزبرة يابسة، سبع بهارات، وفلفل أسود.
سكبت شوية من مرقة اللحمة ليسرع الدبلان وتختلط النكهات، وبعدها أضفت عصير البندورة وغطّيت المقلاية لحد ما تستوي الخضرة تمامًا.
ولما جهزت، سكبتها فوق البطاطا بالصينية.
اللحمة كانت استوت، فرتّبتها فوق الخضرة، وكفّيت فرد باقي الخضار فوقها، وحتى الزوم (المرق يلي بيحبوا يزيدوه) نزل بالصينية.
للي بيحبوا الحر، أضفت فليفلة حرّة، وحطّيت ثلاث معالق صغار سمن عالوجه.
غلّفت الصينية بورق ألمنيوم (سنيتا) ودخلتها عالفرن حوالي 45 دقيقة.
بعدها شلت السنيتا وتركتها عشر دقايق إضافية بالفرن حتى يتحمّر الوجه.
وهون… أكلتنا صارت جاهزة للسكب 😍
وهي الوصفة، وغيرا كتير، موجودة على القناة. إذا بعدكن معنا، يعني أكيد حبيتونا، لا تنسوا اللايك، الاشتراك، وتفعيل زر الجرس ليصلكن كل جديد.
عنجد كتيييير طيبة، لازم تجربوها وتكتبولنا بالتعليقات شو رأيكن 🤍
وشكرًا من القلب.