ကူဝိတ်မှာ အမေရိကန် တိုက်လေယာဉ်အချို့ ပျက်ကျ | People's Spring

Описание: ကူဝိတ်မှာ အမေရိကန် တိုက်လေယာဉ်အချို့ ပျက်ကျ

ကူဝိတ်နိုင်ငံမှာ ပျက်ကျခဲ့တဲ့ အမေရိကန် တိုက်လေယာဉ် အရေအတွက်ဟာ တစ်စီးထက်မက ပိုများခဲ့ကြောင်း သိရပါတယ်။

အစောပိုင်းတုန်းက အမေရိကန်ရဲ့ တိုက်လေယာဉ် တစ်စီးဟာ ကူဝိတ်ရဲ့ အယ်လ်ဂျာဟရာ မြို့နားမှာ မတ်လ ၁ ရက်နေ့က ပျက်ကျခဲ့ကြောင်း သတင်းတွေ ထွက်ပေါ်လာခဲ့ပါတယ်။ အဲဒီနောက်မှာတော့ အမေရိကန်ရဲ့ မဟာမိတ် အာရပ်နိုင်ငံ တစ်ခုဖြစ်တဲ့ ကူဝိတ်က ဖြစ်စဉ်နဲ့ ပတ်သက်လို့ အချက်အလက် တချို့ကို ထုတ်ပြန်ခဲ့ပြီး ပျက်ကျတဲ့ လေယာဉ် အရေအတွက်က တစ်စီးမကဘူး ဆိုတာကို အတည်ပြုသွားခဲ့တာ ဖြစ်ပါတယ်။

လူမှုကွန်ရက် မီဒီယာတွေပေါ်မှာ အမေရိကန်ရဲ့ F-15Eလို့ ယူဆရတဲ့ တိုက်လေယာဉ်တစ်စီး ကူဝိတ်ပိုင်နက်ထဲမှာ ချာချာလည်ပြီး ပျက်ကျသွားတဲ့ ဗီဒီယိုတွေ ပျံ့နှံ့နေခဲ့ပါတယ်။ ဗီဒီယိုထဲမှာ လေယာဉ်ရဲ့ အင်ဂျင်နှစ်လုံးထဲက တစ်လုံးမှာ မီးစွဲလောင်နေတာကို မြင်နိုင်ပါတယ်။ အီရန်က အဲဒီ တိုက်လေယာဉ်ကို ပစ်ချခဲ့တာလို့ ကြေညာပေမယ့် အတည်မပြုနိုင်တဲ့ သတင်းတွေ အရတော့ ကူဝိတ်မှာ ရှိနေတဲ့ လေကြောင်းကာကွယ်ရေး စနစ်တွေက မှားယွင်း ပစ်ချခဲ့တာ ဖြစ်နိုင်ကြောင်း သိရပါတယ်။

အမေရိကန် စစ်တပ်ဟာ တိုက်လေယာဉ်တွေ ဆုံးရှုံးခဲ့တာနဲ့ ပတ်သက်ပြီး မတ်လ ၂ ရက်နေ့ ညနေပိုင်းထိ နှုတ်ဆိတ်နေသလို တကယ်ပျက်ကျခဲ့ရင်လည်း ပစ်ချခံရတာလား၊ စက်ချွတ်ယွင်းတာလား၊ တခြားအကြောင်းရင်း တစ်ခုခုကြောင့်လား ဆိုတာကို အသိမပေးသေးပါဘူး။

သတင်းဌာနတွေက လေယာဉ်ပျက်ကျမှု ဗီဒီယိုကို ဆန်းစစ် အတည်ပြုပြီး ကူဝိတ်မှာ အမေရိကန် တိုက်လေယာဉ် ပျက်ကျခဲ့တယ်လို့ ဖော်ပြလာခဲ့ကြပါတယ်။ နာရီပိုင်း အကြာမှာတော့ အမေရိကန် ဆုံးရှုံးခဲ့တဲ့ လေယာဉ် အရေအတွက်က တစ်စီးထက် မကဘူး ဆိုတာကို ကူဝိတ် ကာကွယ်ရေး ဝန်ကြီးဌာနက အသိပေးလာခဲ့တာ ဖြစ်ပါတယ်။

ပျက်ကျခဲ့တဲ့ လေယာဉ်အရေအတွက်၊ ပျက်ကျရတဲ့ အကြောင်းရင်းတွေကို အသေးစိတ် မကြေညာပေမယ့် လေယာဉ်မှူးအားလုံး အသေအပျောက် မရှိခဲ့ဘူးဆိုတဲ့ အချက်ကိုတော့ ကာကွယ်ရေး ဝန်ကြီးဌာနက အတည်ပြုပေးခဲ့ပါတယ်။

လေယာဉ်ပျက်ကျမှုတွေအပြီး ချက်ချင်း အရေးပေါ် ရှာဖွေရေးနဲ့ ကယ်ဆယ်ရေး မစ်ရှင်တွေကို ကူဝိတ် အာဏာပိုင်တွေက အကောင်အထည် ဖော်ခဲ့ကြောင်း၊ လေယာဉ်မှူး အားလုံးကို ရှာဖွေတွေ့ရှိပြီး ဆေးရုံတင်ပို့ခဲ့ကြောင်း၊ အားလုံး အခြေအနေ တည်တည်ငြိမ်ငြိမ် ရှိကြကြောင်း ထုတ်ပြန်ချက်မှာ ပါရှိခဲ့ပါတယ်။

ဗီဒီယိုထဲမှာ တွေ့ရတဲ့ လေယာဉ်ဟာ ကူဝိတ်လေတပ်ရဲ့ F/A-18 တစ်စီးလည်း ဖြစ်ကောင်းဖြစ်နိုင်ကြောင်း ထောက်ပြမှုတွေ အစောပိုင်းမှာ ရှိခဲ့ပေမယ့် ကူဝိတ်ရဲ့ ကြေညာချက်အရ အဲဒါဟာ အမေရိကန် တိုက်လေယာဉ်ဆိုတာ ကျိန်းသေသွားခဲ့ပါတယ်။

လက်ရှိ အီရန်စစ်ပွဲကာလမှာ အမေရိကန်ဟာ စစ်ဆင်ရေး အခင်းအကျင်းတွေနဲ့ ပတ်သက်လို့ ကူဝိတ်နဲ့ ညှိနှိုင်းဆောင်ရွက်မှုတွေလည်း ရှိနေပါတယ်။

အစောပိုင်းမှာ အမေရိကန် သမ္မတ ဒေါ်နယ်လ်ထရမ့်က အီရန်စစ်ပွဲအတွင်း ပထမဆုံး အမေရိကန်ဖက်က သေဆုံးမှုအဖြစ် စစ်သည် ၃ ဦးကို ဆုံးရှုံးခဲ့ကြောင်း ကြေညာခဲ့ပါတယ်။ ထရမ့်က အဲဒီတပ်ဖွဲ့ဝင်တွေ ဘယ်နေရာမှာ သေဆုံးခဲ့သလဲ ဆိုတာကို အတိအကျ မပြောပေမယ့် သတင်းတွေကတော့ ကူဝိတ်က တပ်စခန်းတစ်ခုမှာ အခြေစိုက်ထားတဲ့ စစ်သားတွေလို့ ဖော်ပြထားကြပါတယ်။

ကိုးကား: CNN, Al Jazeera

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA