Шырша мен қарағайды заңсыз сататындарға жаза қандай?

Описание: Еліміздің солтүстігінде шырша мен қарағайды заңсыз сатқандарға айыппұл салынып жатыр. Өйткені қылқан жапырақты ағаштарды саудаға шығарғандардың көбінің рұқсат қағазы болмай шыққан. Әрі көбі белгіленбеген орындарда саудасын қыздырғаны үшін жазаланды.
Жаңа жылдың шырайын келтіретін шыршаларға сұраныс артты. Соған сәйкес жасанды емес, табиғи қылқан жапырақты ағаштардың саудасы қызып тұр. Елімізде шырша мен қарағайды кесуге тыйым салынғандықтан, бәрі көрші Ресейден жеткізілген.
ДМИТРИЙ ШТРИБЕЛЬ, сатушы:
Ресейдің Башқұртстан өңірінен, Челябі, Новосібір облыстарынан жеткізіп жатырмыз. Көбіне жас ағаштар. Бағасы 5 мыңнан 12 мың теңгеге дейін жетеді. Құны шыршының биіктігіне байланысты. Табиғи ағаштарға сұраныс өте жоғары.
Шырша мен қарағай сататындардың бәрі заңға бағынып жатқан жоқ. Көшелерде, ашық алаңдарда саудасын қыздырған кәсіпкерлердің дені заңсыз жұмыс істеген болып шықты. Мәселен мына азаматтар тура жолдың бойында тұрып, екі күннен бері қылқан жапырақты ағаштарды сатқан. Бірақ қолдарында бірде бір рұқсат қағаздары жоқ. Яғни, ағаштар Ресейден жеткізілді ме, өзіміздің орманнан отап алынды ма белгісіз.
ДЕНИС ДУХОВ, сатушы:
Менің бір құжатым ғана дайындалып үлгермеді. Ол фитосанитарлық құжат. Мамандардан алып үлгерген жоқпын. Бір-екі сағаттың ішінде әзір болады. Барлығымен келісемін. Заңға бағынған дұрыс.
Бір күннің ішінде заң бұзған онға жуық адам анықталды. Барлығы әкімшілік жауапкершілікке тартылды.
МАРАТ ЖҰМӘЛИЕВ, Петропавл қаласы полиция басқармасының бастығы:
Әкімшілік кодекстің 204 бабына сәйкес алдымен ескерту беріледі. Кейін айыппұл салынады. Оның көлемі 40 мың теңгені құрайды. Ал шыршаны кескен адамдарға жаза қатаң. Бір шыршаны кессеңіз, 80 мың теңге төлейсіз. Ал шығын көлемі 400 мың теңгеден асса, қылмыстық жауапкершілік қарастырылған.
РУСЛАН ЖАСҰЛАНҰЛЫ, тілші:
Қылқан жапырақтыларды мереке аяқталғаннан кейін қоқысқа тастауға да тыйым салынады. Ол үшін 80 мың теңге көлемінде айыппұл қарастырылған. Әкімшілік жазаны арқаламас үшін шырша мен қарағайды қоқыс полигонына немесе арнайы орындарға апарып тапсыру керек. Жергілікті билік өкілдері полициямен бірге оны да бақылауда ұстайтын болады.



#Информбюро #31арна #БастыЖаңалықтар #Новости #31канал