قصيدة الطير - محمد بن اسلوم

Описание: يا أهل القنص لواع بانت مواريه
اللي تقاطيعه تبرر لحوقه

اشقر وحجله سايق الريش مضفيه
خطرٍ سراويله اتغبّي اسبوقه

ماكن زوره لا تقلط محانيه
رجمٍ خلاوي راسياتٍ اطبوقه

عز الله انها وافياتٍ مجانيه
حتى النظر من زود ما به يبوقه

وزودٍ على طيبه يجي طيب راعيه
ابوحمد للجود ما غط موقه

عون الضعيف و ما تخونه هقاويه
ونفسه على ربعه ما تاتي حموقه

قولة نعم لا قلت ما هيب تخطيه
يفداه من فرق قرايب اعموقه

والحمد للي واسع الكون منشيه
قلايد الوسمي تلاحت ابروقه

في قافرٍ يزهاه خضرة مفاليه
وراع الولع بالطير عينه شفوقه

يبغي هداده يوم شنذر قواصيه
واصبح على التلواح ضاري املوقه

لواع يا لواع حوشٍ عثى فيه
لك ضربةٍ للروح دايم زهوقه

ضربة شجاع امفزعينه عوانيه
ما يطرح الا كل قبّا سبوقه

واللي عليه الدين لزمٍ يوفيه
لو ان تعومس دون دينه وفوقه

مير انت يا لواع كل دين تقضيه
لا جت عواينها مع اول شروقه

فز وتبسم و استقبّت مباديه
ساعة خذوا عنه و بيّن طفوقه

و حوّل على حوشٍ تحامى حباريه
من بينهم خربٍ اتلاعٍ اعنوقه

دواغره بيضٍ كبارٍ ثناديه
بالوصف هرشٍ بين حشوان نوقه

اما إلطمه لطمة عدوٍ معاديه
والا تنكّس من على الراس فوقه

و ان كان عزّم ايتغلّق و يخفيه
انا اشهد انه لأبرق الريش عوقه

رقى له وكن الطويله تناديه
وخزه ابرمحٍ حين مكّن وثوقه

ما بين تاج الراس وأول علابيه
مشلوع كنْك اتشوف دله فهوقه

يستاهل الناموس رجلٍ يداريه
اللي توالف مع هل السمْت ذوقه

عنده على المتكاه دايم يخاويه
خوة رفيقٍ ما يبور ابرفوقه