សន្និសីទអាហារបួសប្រចាំឆ្នាំ លើកទី៦ របស់សមាគមន៍អីគ័នតាវ

Описание: សមាគមអ៊ីគ័នតាវប្រចាំព្រះរាជាណាចក្រកម្ពុជា រៀបចំសន្និសីទអាហារបួសប្រចាំឆ្នាំ លើកទី៦ដោយមានអ្នកចូលរួម ជិតមួយពាន់នាក់ មកពីប្រទេសផ្សេងៗ

សមាគមន៍អីគ័នតាវ ប្រចាំព្រះរាជាណាចក្រកម្ពុជា បានរៀបចំសន្និសិទជំរុញអាហារបួស ប្រចាំឆ្នាំលើកទី៦របស់ខ្លួន កាលពីល្ងាចថ្ងៃទី១៣ ខែមករា ឆ្នាំ២០១៩ នៅមជ្ឈមណ្ឌលកោះពេជ្រ ក្នុងរាជធានីភ្នំពេញ ដោយមានអ្នកចូលរួមជាង១ពាន់នាក់ ជាមួយនិងការដាក់តាំងបង្ហាញ មុខម្ហូបបួស ជាង២០០ ប្រភេទផ្សេងៗគ្នា ដែលចំអិនដោយចុងភៅ មកពីប្រទេសថៃ កម្ពុជា ហុងកុង ប្រទេសចិន និង កោះតៃវ៉ាន់ ហើយដែលពិធីនេះធ្វើឡើង ក្រោមវត្តមានឯ.ឧ ឆេង សារឿន រដ្ឋលេខាធិការប្រចាំការ តំណាងលោកជំទាវឧបនាយករដ្ឋមន្ត្រី ម៉ែនសំអន រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធភា និងអធិការកិច្ច។
ប្រធានគណ:កម្មាធិការនាយក នៃសមាគមអ៊ីគ័នតាវ ប្រចាំព្រះរាជាណាចក្រកម្ពុជា អ្នកគ្រូឧបជ្ឈា ឡាយ ស៊ូឈុន បានថ្លែងថា ការជំរុញអាហារបួស គឺជាគោលដៅដែលសមាគមអ៊ីគ័នតាវ តែងតែខិតខំប្រឹង ប្រែង លើកកម្ពស់ ជារៀងរហូតមក។ ជាក់ស្តែងនៅក្នុងឆ្នាំនេះ យើងបានលើកជាប្រធានបទ (អាហារបួស បណ្តុះចិត្តបរិសុទ្ធ ចិត្តព្រះ ចិត្តមេត្តាករុណា ហើយក៏ពឹងទៅលើកម្មវិធីនេះ និងធ្វើអោយមនុស្ស កាន់តែ ច្រើន អាចស្វែងយល់អំពីអាហារបួសនិងចូលចិត្តអាហារបួសដើម្បីមានផាសុខភាព។
បើតាម លោកស្រី ឡាយ ស៊ូឈុន អត្ថប្រយោជន៍ នៃអាហារបួសមានយ៉ាងច្រើន ហើយក្រៅពីសំរាប់ ថែទាំ សុខភាព ការទទួលទានអាហរបួស ធ្វើអោយមនុស្ស ចេះស្រឡាញ់ថែរក្សាសត្វនិងគោរពដល់ជីវិត និងជាការចូលរួម ការពារកំដៅនៃភពផែនដីផងដែរ ខណះការហូបបួស កំពុងតែពេញនិយមជាងគេ ក្នុង សកលលោកនាពេលបច្ចុប្បន្ន ក្រោយទស្សនវិស័យ ហូបបួសដើម្បីសុខភាព ហូបបួសដើម្បីបរិស្ថាន។
ឯ.ឧ ឆេង សារឿន បានចាត់ទុកកម្មវិធីជម្រុញអាហារបួស នៅកម្ពុជា លើកទី៦ ឆ្នាំ២០១៩នេះ គឺជាពេលវេលាដ៏ល្អប្រសើរ គឺស្របពេលដែលកម្ពុជាកំពុងមានកំណើនសេដ្ឋកិច្ចខ្ពស់ និងមានកំណើន ភ្ញៀវទេសចរណ៍មកពីគ្រប់ទិសទីនៃពិភពលោក ចូលមកទស្សនាប្រទេសកម្ពុជាកើនឡើងជាលំដាប់។ ជាងនេះទៀតពិធីនេះ ក៏បានចូលរួមចំណែកយ៉ាងសំខាន់ នៅក្នុងការអភិវឌ្ឍន៍សង្គមកិច្ច ជាមួយរាជរដ្ឋា ភិបាល ជាមួយសមាគមន៍អីគ័នតាវ ប្រចាំព្រះរាជាណាចក្រកម្ពុជា លើវិស័យទេសចរណ៍ វិស័យអប់រំ វិស័យសុខាភិបាល វិស័យបរិស្ថាន និងវិស័យវប្បធម៌ និងវិស័យធម្មការ និងសាសនាជដើម ពិសេស អាហារបួសជាជម្រើសថ្មីមួយទៀត លើផ្នែកម្ហូបអាហារ ស្របពេលនិន្នាការចាប់អារម្មណ៍របស់ ប្រជាជនលើពិភពលោកមួយចំនួនធំ ក្នុងនោះប្រជាជនកម្ពុជាផងដែរ កំពុងងាកមកចាប់អារម្មណ៍ ការថែរក្សាសុខភាពតាមរយៈការទទួលទានអាហារសុខភាពជាបន្លែផ្លឈឺ ជាប្រចាំថ្ងៃ ជំនួសការទទួលទាន អាហារដែលជាប្រភេទសាច់។
ឯ.ឆេងសារឿន ក៏បានថ្លែងអំណរគុណ ចំពោះសាមាគមន៍ អីគ័នតាវប្រចាំកម្ពុជា ដែលបានរៀនបចំ ជម្រុញអោយមាន សន្និសិទជំរុញអាហារបួសប្រចាំឆ្នាំ ដែលឆ្នាំនេះជាឆ្នាំទី៦ និងបានគាំទ្រសកម្មភាព របស់សមាគមន៍នេះ ដែលកន្លងមកក៏ដូចបច្ចុប្បន្ន បានចូលរួមចំណែកយ៉ាងខ្លាំងជាមួយរាជរដ្ឋាភិបាល ដែលមកដល់ពេលនេះមានរយៈពេល២០ឆ្នាំហើយ ក្នុងការងារអភិវឌ្ឍន៍ ធនធានមនុស្ស និងសង្គមកិច្ច និងអនាម័យបរិស្ថាននៅក្នុងប្រទេសកម្ពុជា៕