Ministrja Kodheli prezanton projektligjin për Policinë Ushtarake

Описание: Ministrja e Mbrojtjes, znj. Mimi Kodheli, ka prezantuar sot para drejtuesve kryesorë të Policisë Ushtarake projektligjin për Policinë Ushtarake (PU). Ishin të pranishëm edhe zëvendësministri i Mbrojtjes z. Petro Koçi, shefi i Shtabit të Përgjithshëm i FA, gjeneralmajor Jeronim Bazo, deputetë, anëtarë të Komisionit Parlamentar të Sigurisë. Ky projektligj është përgatitur nga një grup specialistësh nga Ministria e Mbrojtjes dhe është diskutuar në Këshillin e Ministrave.
Në fjalën e saj ministrja Kodheli u shpreh se, më vjen mirë që ky projektligj i ri për Policinë Ushtarake vjen si propozim i juaj dhe nevojë për të ndryshuar bazën ligjore mbi të cilën ngrihet veprimtaria juaj. Ajo theksoi se, kjo nevojë erdhi edhe si një domosdoshmëri e ndryshimeve të bazës ligjore mbi të cilat ngrihet veprimtaria e Ministrisë së Mbrojtjes dhe FA me futjen e Shqipërisë në NATO pesë vjet e gjysmë më parë, si dhe me ndryshimet legjislative që kanë ndodhur në vite, të cilat nuk janë reflektuar në ligjin që rregullon veprimtarinë e PU. Iniciativa për miratimin e këtij projektligji vjen edhe si një domosdoshmëri e faktit që veprimtaria e realizimit të misionit të PU ka pasur zhvillime në këto vite për shkak edhe të ndryshimeve, shpeshherë drastike, që kanë ndodhur në situatën gjeopolitike në të cilat veprojnë FA të Shqipërisë, por edhe për shkak të kompleksitetit në të cilin ndodhet situata e sigurisë në vend dhe qytetarëve shqiptarë dhe padyshim për shkak të sofistikimit që vjen nga kërcënime të natyrave dhe dimensioneve të ndryshme. Jo më larg se dje, u shpreh ajo, jemi të gjithë dëshmitarë të një akti terrorist, të cilin mbarë bota demokratike e ka cilësuar si një ndër aktet më të rënda që i ka ndodhur jo vetëm botës mediatike, por pa as më të voglin dyshim, gjithë botës demokratike.