ԱՄՆ-ում բուժվող Պարգև Սրբազանը՝ տարօրինակ պատերազմի, չկոտրվելու, պատմության ու ապագայի մասին

Описание: Առողջական խնդրի պատճառով Պարգև Սրբազանը ստիպված էր ժամանակավորապես տեղափոխվել Միացյալ Նահանգներ: Այստեղ նա բուժում է ստանում և սպասում սրտի փոխպատվաստման իր հերթին: Սիրտ, որ չդիմացավ ցավերին, որ հույսով բաբախում էր 2020-ի ցուրտ և չարագուշակ գիշերներին, երբ քամին կարծես ասես օր օրի տանում էր մեզանից հաղթանակի հույսը:

Կալիֆորնիայի անձրևի հանդարտ շշուկների ներքո նրա աղոթքները ուղղվում են Հայաստան, հեռավոր ժամանակների արձագանքի պես, երբ մեր մեջ կասկածող չկար, որ Հայաստանի մի մասը Արցախն է...

Այստեղ մեր բաց թողնված հնարավորություններն են, որ մենք՝ որպես ժողովուրդ, չկարողացանք ուժերը մեկտեղել և դառնալ անառիկ ամրոց։ Արբեցած 90-ականներին կերտած հաղթանակներով, մեծամտությանը, հպարտությանը, գոռոզությանը, պարծենկոտությանը, սնապարծությանն ու ինքնահավանությանը մենք թույլ տվեցինք բույն դնել մեր հոգիներում՝ ինքներս մեզ հնարավորություն չտալով ազնվորեն տեսնել սեփական թերությունները: Երբ մեզանից շատերը, մոլորված պատրանքների մեջ, բաց էին թողնում և սեփական սխալները տեսնելու և, որպես արդյունք, զարգանալու հնարավորությունը:

Պարգև արքեպիսկոպոսի հոգու խորքում անհանգստության ստվերներ են: Երբ տեսնում է, որ մեր ժողովուրդը, կարծես մթագնած, աչքաթող է անում իր կենսական սպառնալիքները։ Ու անցյալի այս խավարի և ապագայի անորոշության մեջ զարմանալի է, որ հույսի բոցը նույնպես փայլում է Սրբազանի՝ այդքան ցավ տեսած աչքերում։

Մեզ բաժին ընկած փորձությունները, ցավերի ու կորստի փոթորիկները խարխլել են հույսը։ Սակայն եթե թույլ տանք, որ մեր տառապանքը դառնա անսահման ինքնախղճահարության աղբյուր, կկանգնենք ինքնաոչնչացման առաջ։ Ցավը երգի վերածելն ու անպտուղ նվնվոցի մեջ ընկղմվելը կործանման ճանապարհն է:

Նա տասնյակ անգամներ հայտնվում է կյանքի ու մահվան եզրին, ու ամեն անգամ Աստծո անտեսանելի ձեռքը պահպանել է նրան։ Այս պահերից յուրաքանչյուրում, երբ մահն անցնում էր Պարգև Սրբազանի կողքով, նա հասկանում էր, որ դեռ առաքելություն ունի:

Պարգև Սրբազանին գերում է հայոց պատմության եզակի գաղտնիքները բացահայտելը համաշխարհային պատմական իրադարձությունների համատեքստում։ Նրա խորը հետազոտություններն ընդգրկում են հայոց պատմության ամենայուրահատուկ կողմերը՝ բացահայտելով միստիկական առեղծվածներ, որոնք դարեր ի վեր մնացել են ժամանակի ստվերում։ Նա հետաքրքրական բացահայտումներ ունի հայոց լեզվի առեղծվածների վերաբերյալ՝ հիմնավորելով այլ հին լեզուների վրա հայերենի ունեցած ահռելի ազդեցությունը։
Սրբազանի մտահղացմամբ ու դիտարկումների մի փոքր մասի հիման վրա տարիներ առաջ նկարահանվեց «Միստիկ երկիր առան» ֆիլմը: Նրա խորը գիտելիքներն ու ճշմարտությանը հասնելու կիրքը բացում են գաղտնիքների ու հին իմաստության անհավանական աշխարհի դուռը: Մենք պատրաստվում ենք հատուկ տեսաշարք նվիրել Պարգև Սրբազանի այս եզակի ուսումնասիրություններին՝ հասկանալու մեր պատմության և լեզվի մեջ թաքնված գանձերը և ճանաչելու ինքներս մեզ:

Խորապես հասկալով հոգևոր գաղտնիքները, Պարգև Սրբազանը մեծագույն նշանակություն է տալիս խորհրդանիշներին. նրա համար խորհրդանիշները պարզապես պատկերներ չեն, այլ մեր վիճակի բանալիները։ Հայ ժողովրդին գրաբարից պոկելը նա մեր դեմ ուղղված ծրագրի մաս է համարում:

Մեր ժողովրդին կյանքը կրկին հրավիրում է ոտքի կանգնել, մեկտեղել ուժերը և պայքարել: Եվ նույնիսկ ցավի մեջ սկսել հարթել ճանապարհը դեպի հաղթանակ՝ ներսում ունեցած, վերջին տարիների հիասթափություններից հետո փոքր-ինչ աննշմար, բայց իրականում աստվածային այդ վիթխարի ուժի ոգեշնչման ներքո: