Ақтауда қала сыртынан мәйіті табылған 33 жастағы азаматтың туыстары әділдік іздейді

Описание: Ақтауда із-түссіз жоғалып, қала сыртынан мәйіті табылған 33 жастағы азаматтың туыстары әділдік іздейді. Марқұмның жақындары күдіктілер Александр Насибариді аяусыз пышақтап, денесін көміп кеткен деп отыр. Олар қанды қылмысқа қатысы бар адамдардың бостандықта жүргеніне наразы. Және қара жамылған отбасы полицияның әрекетсіздігінен сезіктілердің шетел асып кеткенін айтады. Екі адамға қазір халықаралық іздеу жарияланған екен.
33 жастағы азамат былтыр қараша айында үйінен шығып, қайта оралмаған. Екі аптаға жалғасқан іздестіру жұмыстарының нәтижесінде Александр Насибаридің мәйіті қала сыртынан табылыпты. Жерге көмілген денесінде пышақ іздері де болған. Қара жамылған отбасы «біз күдіктілерді атадық, бірақ полиция тергемеді» деп күйінеді.
РЕНАТА НАСИБАРИ, марқұмның әпкесі:
Інімді 24 қараша күні таңғы сағат ондар шамасында үйден алып кеткен. Біз осы адамдарға күдік келтіріп, полицияға арыз жазғанбыз. Себебі інім жоғалардан үш күн бұрын Эльдармен жанжалдасып қалған. Мұны дүкендегі адамдар да көрген. Жанжалдың неден шыққанын нақты білмейміз. Ақша үшін болды деп ойламаймын. Бұл жерде мүлдем басқа мәселе бар сияқты.
Жақындарының айтуынша, күдікке әкесі мен баласы ілінген. Олар марқұммен бірге көлік жөндеумен айналысқан. Алайда Александр екі жыл бұрын бір үйдің адамдарымен жұмыс істеуді тоқтатқан екен. Тараптар арасындағы кикілжің сол кезде туындаған көрінеді.
РЕНАТА НАСИБАРИ, марқұмның әпкесі:
Інімнің мәйіті қаладан 30 шақырым жерден табылды. Оның денесінде 15 пышақ жарақаты болған. Қылмыскерлер оны аяусыз өлтіріп, жерге көміп кеткен. Біз күдіктілерді өзіміз көрсетіп бергенімізге қарамастан, полиция оларды бірден тергеуге алмай, қашып кетуге мүмкіндік берді. Соның салдарынан екі адам шекара асып кеткен.
Қара жамылған отбасы мәйіттің қайда жатқанын айтқан азаматтың мәртебесін куәгерден күдіктіге ауыстыруды сұрайды. Ал полиция қылмыстық іс қозғап, екі адамға халықаралық іздеу жариялапты.
МАҢҒЫСТАУ ОБЛЫСТЫҚ ПОЛИЦИЯ ДЕПАРТАМЕНТІНІҢ БАСПАСӨЗ ҚЫЗМЕТІ:
Оқиғаға қатысты қылмыстық іс қозғалды. Қазіргі уақытта тергеу жұмыстары жалғасып жатыр. Екі күдікті ресми түрде халықаралық іздеуге берілді. Қазақстанның құқық қорғау органдары Ресей Федерациясының тиісті қызметтерімен бірлесіп, іздестіру жұмыстарын жүргізуде.

Александр Насибаридің артында ұлы мен қызы қалды. Жалғыз асыраушысынан айырылған жанұя қанды қылмысқа қатысы бар барлық күдіктілердің ұсталып, заң алдында лайықты жазасын алуын талап етіп отыр.
#Информбюро #31арна #БастыЖаңалықтар #Новости #31канал