Meshi Asem - Tsüpong Imchen & Chubatsür Jamir (AMR)

Описание: Otsüla opola nonger mapang, meshi nong Cylinder gas aki sorochioktsüba otsü jempitsü yabo pongmangji doktsür, merang aki meshi ana yanglor sorochiokba ya maliasü. Saka long asem azüng aser yangji libo (ali jibo) nong chi aser aon soroba mapang liasü. Sorochiokba long asem dangji Aor-i nüngtoko süa MESHI ASEM ta aja. Parnok mapang kipong ajak nong nebener kipong akinüba mapang liasü. Iba ama poto ka nong, asen limai kaketrijo aro. Joko kipong ka nong kaketrijo azüngtsü tanor ajak yoktsübo tsürabor-i mekoki aküm. Iba jaki tanor rongnong kati pei taküm tenlar ama, kaketrijo doktsür teno nongertem kaketrijo züngdaktsütsü meji, tsürabor den alo wadang külemi inyak. Pa/la dangji NEBENERTSÜNGMEN ta ajar. Koba tetezü nebener kipong ajak tetsüng ajemeter atodak. Yimya aki nebenertsüngmen ji tanor rongnong tambolen mesüra tantsülen asür. Kechiaser tsürabor den külemi wadang inyaktsü, item ji tama nepo ajonger.
Kodang tanortem ajak nepo jonga aküm. Parnok ajak züngteta akümer asünong, sorkar mapa palala ngor jila palala nong inyaktep. Yimya aki tsürabortem ji, arishir kümer asür. Nebenertsüngmen to mazüngji pa/la dang yimdak alitsüsa akümer. Nebenertsüngmen teno nongertem ji sahib tesa asünong, teno nongertem jibo, takar tesa. Kimong kilir aser ki teperi kar. Teno nungertem jaki, nebenertsüngmen nemjia sorkar 4th grade post kabo odang akütsüteta liasü. Saka keja hao ta mali yimdak temeimtsü ka dang yotsü. Parnoki tsümar tem nemang, 4 grade post ji akütsür, pei pei ki meküta yaritepdaktsüba otsü. Lanowa parnok kaketrijo azüngba mapang, tetirtem mapa tajong to pilemtetangma no ta Iba otsü nongi akiteter, MESHI ASEM ken ya yangloba lir. Saka otsü kaketbo ano release masü. Amanger iba noksaket (video) repranger ajak temoatsü angotsü. - AMR

MESHI ASEM (13:03:2017) MESHI - Tsüpong Imchen & Chubatsür Jamir (AMR)
Lyrics - Talitemjen Imchen
Composer - Wati Jamir
Music & Sound Editing - Sosang Longkümer
Video - Imti Imchen
Video Editing - Charle sCrezen

Anepdang yakta saker meshi asem nong
Ojala aser obalai tongmelang aki
Sayobentsü, aji ajemtsü aki
Meperi tera dang süaka
Teronem menema küno pilemtet

Tanü na takar tashir tolortem kümer
Sünglaki tazüng tera sempaa reprang ama
Anüng ozü metem anünglak nong yimzür
Ari ari ta tsürabor meshi asem nongi lir

Meshi ana nong jipo metongdaktet ama
Tilar-i asentsü sena meranga inyakyong
Tanü yimsüsür menden tolor ji na lir
Ne yimli mapang arodang
Nai tsürabor mapa pilemtetang

Tanü na takar tashir tolortem kümer
Sünglaki tazüng tera sempaa reprang ama
Anüng ozü metem anünglak nong yimzür
Ari ari ta tsürabor meshi asem nongi lir

Bendang lima nong jopar ki ama
Kimongtem alidena ki tajong yanglor alir
Kidang aben süoshi aser kilirtem
Teti dang peria kar
Tsüraborbo meshi asem nongsa litar

Tanü na takar tashir tolortem kümer
Sünglaki tazüng tera sempaa reprang ama
Anüng ozü metem anünglak nong yimzür
Ari ari ta tsürabor meshi asem nongi lir