შეღავათიანი აგროკრედიტის პროექტში ცვლილებები შევიდა

Описание: შეღავათიანი აგროკრედიტის სახელმწიფო პროექტში განხორციელებული ცვლილებების შედეგად, პროექტის ძირითადი საშუალებების კომპონენტს ემატება ორი ახალი ქვეკომპონენტი:
1) შეღავათიანი აგროკრედიტი სასოფლო-სამეურნეო დანიშნულების მექანიზაციისთვის, რომელიც გულისხმობს შეღავათიანი აგროკრედიტის გაცემას სასოფლო-სამეურნეო დანიშნულების ტექნიკისა და/ან იმპლემენტის შესაძენად;
2) შეღავათიანი აგროლიზინგი სასოფლო-სამეურნეო დანიშნულების მექანიზაციისთვის, რომელიც გულისხმობს შეღავათიანი აგროლიზინგის გაცემას სასოფლო-სამეურნეო დანიშნულების ტექნიკისა ან/და იმპლემენტის დასაფინანსებლად.
შეღავათიანი აგროკრედიტის პროექტს გარემოს დაცვისა და სოფლის მეურნეობის სამინისტროს სოფლის მეურნეობის პროექტების მართვის სააგენტო 4 წელიწადზე მეტია ახორციელებს.
პროექტის ძირითად ამოცანებს ფერმერების და სოფლის მეურნეობაში ჩართული მეწარმეების იაფი, გრძელვადიანი და ხელმისაწვდომი ფულადი სახსრებით უზრუნველყოფის გზით, სოფლის მეურნეობის პირველადი წარმოების, გადამამუშავებელი და შენახვა-რეალიზაციის საწარმოო პროცესების გაუმჯობესება წარმოადგენს.
ქვეკომპონენტის ფარგლებში, შეღავათიანი აგროკრედიტი განისაზღვრება 7000 ლარიდან 1 500,000 ლარის ჩათვლით, რომლის ფარგლებშიც, სოფლის მეურნეობის პროექტების მართვის სააგენტო არაუმეტეს 66 თვის განმავლობაში უზრუნველყოფს საპროცენტო განაკვეთის თანადაფინანსებას, წლიური 11%-ის ოდენობით. აგროლიზინგის ქვეკომპონენტის ფარგლებში კი სოფლის მეურნეობის პროექტების მართვის სააგენტოს მიზნობრივი თანადაფინანსების ოდენობა შეადგენს ლიზინგის გამცემის ინვესტიციის წლიურ 12%-ს.
წარმოდგენილი ცვლილებების შედეგად, მოხდება ადგილობრივ ბაზარზე სასოფლო-სამეურნეო ტექნიკის განახლების და რაოდენობის გაზრდის სტიმულირება, რაც დადებითად აისახება სოფლის მეურნეობის დარგზე.