ទេសរដ្ឋមន្ត្រី សក់ សេដ្ឋា៖ រដ្ឋចាត់ទុកវិស័យឯកជន ជាក្បាលម៉ាស៉ីននៃកំណើនសេដ្ឋកិច្ច, វិស័យឯកជនខ្លាំង...

Описание: ទេសរដ្ឋមន្ត្រី សក់ សេដ្ឋា៖ រដ្ឋចាត់ទុកវិស័យឯកជន ជាក្បាលម៉ាស៉ីននៃកំណើនសេដ្ឋកិច្ច, វិស័យឯកជនខ្លាំង ទាល់តែមានស្ថាប័នរដ្ឋមួយដែលរឹងមាំ ពូកែ និងខ្លាំង ដែលរៀបវរៈគោលនយោបាយដ៏សំខាន់របស់រដ្ឋាភិបាល (Video inside)

(ភ្នំពេញ)៖ លោក សក់ សេដ្ឋា ទេសរដ្ឋមន្ដ្រីទទួលបន្ទុកបេសកកម្មពិសេស និងជាអនុប្រធានអចិន្ដ្រៃយ៍គណៈកម្មាធិការជាតិ សម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ បានលើកឡើងថា រាជរដ្ឋាភិបាលបានចាត់ទុកវិស័យឯកជនជាក្បាលម៉ាស៉ីននៃកំណើនសេដ្ឋកិច្ច ហើយថាវិស័យឯកជនខ្លាំង ទាល់តែមានស្ថាប័នរដ្ឋមួយដែលរឹងមាំ ពូកែ និងខ្លាំង ដែលរៀបវរៈគោលនយោបាយដ៏សំខាន់របស់រាជរដ្ឋាភិបាល។

ការលើកឡើងរបស់ទេសរដ្ឋមន្ត្រី សក់ សេដ្ឋា ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «ស្មារតីជាតិលើ​ការពង្រឹង​ស្ថាប័ន​​​សេដ្ឋកិច្ច​​ ដើម្បី​អភិវឌ្ឍកម្ពុជា»។

ទេសរដ្ឋមន្ត្រី សក់ សេដ្ឋា បានថ្លែងឲ្យដឹងថា «រដ្ឋបានចាត់ទុកវិស័យឯកជនជាក្បាលម៉ាស៊ីននៃកំណើន ប៉ុន្ដែចំពោះការដើរទៅបានដោយប្រសើរទាល់តែមានអ្នកនាំផ្លូវម៉ាស៊ីននេះដើរ ទើបម៉ាស៊ីននេះដំណើរការ និងដើរទៅដោយរលូន។ ក្នុងនោះអ្នកដែលអាចដឹកនាំក្បាលម៉ាស៊ីននៃកំណើនបាន គឺស្ថាប័នរដ្ឋដែលខ្លាំង និងឆ្លាតវៃ នេះជារបៀបនយោបាយដ៏សំខាន់របស់រដ្ឋាភិបាល និតិកាលទី៧ ដែលយើងបាននិងកំពុងធ្វើរាល់ថ្ងៃនេះ»។

ទេសរដ្ឋមន្ត្រី សក់ សេដ្ឋា បានបន្ដថា ក្នុងនោះយើងមានកិច្ចការសំខាន់២-៣យ៉ាង ដែលត្រូវផ្ដោតក្នុងនោះរួមមាន តួនាទីច្បាស់លាស់ ដោយអនុញ្ញាតឲ្យស្ថាប័នបន្ដធ្វើ ដោយមិនចាំបាច់ សុំការអនុញ្ញាតពីថ្នាក់លើ។ ជាក់ស្ដែងកន្លងមកយើងបានផ្ទេរមុខងារសុខាភិបាល មន្ទីរពេទ្រ មណ្ឌលសុខភាព ក្រោមរដ្ឋាបាលខេត្ត ដោយក្នុងបានផ្ទេរទាំងថវិកា ដើម្បីផ្ដល់ជូនពួកគាត់ ក្នុងការបម្រើសេវាជូនដល់ប្រជាពលរដ្ឋ។

ទេសរដ្ឋមន្ត្រី សក់ សេដ្ឋា បានបន្ដថា ក្នុងនោះការកសាងសមត្ថភាពរបស់មន្រ្ដីជារឿងសំខាន់ ដែលមិនអាចខ្វះបាន ដោយក្នុងនោះត្រូវបណ្ដុះបណ្ដាលការងារ ដែលមន្រ្ដីធ្វើជារៀងរាល់ថ្ងៃ ដើម្បីពង្រឹងសមត្ថភាពឲ្យកាន់តែខ្ពស់ឡើងតាមរយៈការធ្វើផង រៀនផង ផ្ដល់បទពិសោធន៍ផង និងអភិវឌ្ឍន៍សមត្ថភាពផងដែរ៕

សូមស្តាប់ការលើកឡើងរបស់ទេសរដ្ឋមន្ត្រី សក់ សេដ្ឋា៖