ධම්මපදය - භික්ඛු වග්ගය (පූජ්‍ය අලව්වේ අනෝමදස්සී ස්වාමීන්වහන්සේගේ දේශනාවකින් උපුටා ගන්නා ලදී.)

Описание: පූජ්‍ය අලව්වේ අනෝමදස්සී ස්වාමීන්වහන්සේගේ දේශනාවකින් උපුටා ගන්නා ලදී.
සම්පූර්ණ දේශනාව    • සං‍යුත්ත නිකාය-4 සූත්‍ර විවරණ #2  (2021.04...  
ධම්මපදය - තණ්හා වර්ගය https://tipitaka.lk/kn-dhp-25
1.(360) චක‍්ඛුනා සංවරො සාධු සාධු සොතෙන සංවරො
ඝානෙන සංවරො සාධු සාධු ජිව‍්හාය සංවරො.
2.(361) කායෙන සංවරො සාධු සාධු වාචාය සංවරො
මනසා සංවරො සාධු සාධු සබ‍්බත්‍ථ සංවරො.
සබ‍්බත්‍ථ සංවුතො භික‍්ඛු සබ‍්බදුක‍්ඛා පමුච‍්චති.
3.(362) හත්‍ථසඤ‍්ඤතො පාදසඤ‍්ඤතො
වාචාය සඤ‍්ඤතො සඤ‍්ඤතුත‍්තමො
අජ‍්ඣත‍්තරතො සමාහිතො
එකො සන‍්තුසිතො තමාහු භික‍්ඛුං.
4.(363) යො මුඛසඤ‍්ඤතො භික‍්ඛු මන‍්තභාණී අනුද‍්ධතො
අත්‍ථං ධම‍්මං ච දීපෙති මධුරං තස‍්ස භාසිතං.
5.(364) ධම‍්මාරාමො ධම‍්මරතො ධම‍්මං අනුවිචින‍්තයං
ධම‍්මං අනුස‍්සරං භික‍්ඛු සද‍්ධම‍්මා න පරිහායති.
6.(365) සලාභං නාතිමඤ‍්ඤෙය්‍ය නාඤ‍්ඤෙසං පිහයං චරෙ
අඤ‍්ඤෙසං පිහයං භික‍්ඛු සමාධිං නාධිගච‍්ඡති.
7.(366) අප‍්පලාභො’පි චෙ භික‍්ඛු සලාභං නාතිමඤ‍්ඤති.
තං වෙ දෙවා පසංසන‍්ති සුද‍්ධාජීවිං අතන්‍දිතං.
8.(367) සබ‍්බසො නාමරූපස‍්මිං යස‍්ස නත්‍ථි මමායිතං
අසතා ච න සොචති ස වෙ භික‍්ඛූ’ති වුච‍්චති.
9.(368) මෙත‍්තාවිහාරී යො භික‍්ඛු පසන‍්නො බුද‍්ධසාසනෙ.
අධිගච‍්ඡෙ පදං සන‍්තං සඞ‍්ඛාරූපසමං සුඛං.
10.(369) සිඤ‍්ච භික‍්ඛු ඉමං නාවං සිත‍්තා තෙ ලහුමෙස‍්සති
ඡෙත්‍වා රාගං ච දොසං ච තතො නිබ‍්බාණමෙහිසි.
11.(370) පඤ‍්ච ඡින්‍දෙ පඤ‍්ච ජහෙ පඤ‍්ච චුත‍්තරි භාවයෙ
පඤ‍්චසඞ‍්ගාතිගො භික‍්ඛු ඔඝතිණ‍්ණො’ති වුච‍්චති.
12.(371) ඣාය භික‍්ඛු මා ච පමාදො
මා තෙ කාමගුණෙ භමස‍්සු චිත‍්තං
මා ලොහගුළං ගිලී පමත‍්තො
මා කන්‍දි දුක‍්ඛමිදන‍්ති ඩය‍්හමානො.
13.(372) නත්‍ථි ඣානං අපඤ‍්ඤස‍්ස පඤ‍්ඤා නත්‍ථි අඣායතො
යම‍්හි ඣානං ච පඤ‍්ඤා ච ස වෙ නිබ‍්බාණසන‍්තිකෙ.
14.(373) සුඤ‍්ඤාගාරං පවිට‍්ඨස‍්ස සන‍්තචිත‍්තස‍්ස භික‍්ඛුනො
අමානුසී රති හොති සම‍්මා ධම‍්මං විපස‍්සතො.
15.(374) යතො යතො සම‍්මසති ඛන්‍ධානං උදයබ‍්බයං
ලභතී පීතිපාමොජ‍්ජජං අමතං තං විජානතං.
16.(375) තත්‍රායමාදි භවති ඉධ පඤ‍්ඤස‍්ස භික‍්ඛුනො.
ඉන්‍ද්‍රියගුත‍්ති සන‍්තුට‍්ඨි පාතිමොක‍්ඛෙ ච සංවරො.
17.(376) මිත‍්තෙ භජස‍්සු කල්‍යාණෙ සුද‍්ධාජීවෙ අතන්‍දිතෙ
පටිසන්‍ථාරවුත‍්ත්‍යස‍්ස ආචාරකුසලො සියා
තතො පාමොජ‍්ජබහුලො දුක‍්ඛස‍්සන‍්තං කරිස‍්සසි.
18.(377) වස‍්සිකා විය පුප‍්ඵානි මද‍්දවානි පමුඤ‍්චති.
එවං රාගං ච දොසං ච විප‍්පමුඤ‍්චෙථ භික‍්ඛවො.
19.(378) සන‍්තකායො සන‍්තවාචො සන‍්තවා සුසමාහිතො
වන‍්තලොකාමිසො භික‍්ඛු උපසන‍්තො’ති වුච‍්චති.
20.(379) අත‍්තනා චොදයත‍්තානං පටිමාසෙ’ත‍්තමත‍්තනා
සො අත‍්තගුත‍්තො සතිමා සුඛං භික‍්ඛු විහාහිසි.
21.(380) අත‍්තා හි අත‍්තනො නාථො අත‍්තා හි අත‍්තනො ගති
තස‍්මා සඤ‍්ඤමයත‍්තානං අස‍්සං භද්‍රං’ව වාණිජො.
22.(381) පාමොජ‍්ජබහුලො භික‍්ඛු පසන‍්නො බුද‍්ධසාසනෙ
අධිගච‍්ඡෙ පදං සන‍්තං, සඞ‍්ඛාරූපසමං සුඛං.
23.(382) යො හවෙ දහරො භික‍්ඛු යුඤ‍්ජති බුද‍්ධසාසනෙ
සො ඉමං ලොකං පභාසෙති අබ‍්භා මුත‍්තො’ව චන්‍දිමා.
Web Site : https://anomadassi.lk/
All Sutta : https://suthra.lk/
All Sakachcha : https://suthra.lk/sakachcha
All Deshana : https://suthra.lk/deshana
Youtube Channel :    / @ven.alawweanomadassithero49