ჯანსაღი ცხოვრების წესი და მავნე ჩვევები - შესავალი

Описание: ჯანსაღი ცხოვრების წესის პოპულარიზაცია და მავნე ჩვევების ჩამოყალიბებისაგან მოზარდის დაცვა სამოქალაქო საზოგადოების ერთ-ერთი მნიშვნელოვანი ამოცანაა. მოცემული რესურსის მიზანია ჯანსაღი ცხოვრების წესის არსის შესახებ მოსწავლეთა შეხედულებების გააქტიურება და ჯანსაღი ცხოვრების წესის დაცვის აუცილებლობაზე მოზარდების დაფიქრება.

თანამედროვე მსოფლიოში, ტექნოლოგიებისა და ინტერნეტის გამოჩენასთან ერთად, მოზარდებს უფრო მარტივად უყალიბდებათ მავნე ჩვევები. მოცემული რესურსის მიზანია მოზარდების ინფორმირება ისეთ საკითხებთან დაკავშირებით, როგორებიცაა: ჯანსაღი ცხოვრების არსი და მნიშვნელობა; აზარტულ თამაშებზე დამოკიდებულება და სამართლებრივი პასუხისმგებლობა;  ინტერნეტ და ვიდეოთამაშებზე დამოკიდებულება; მსუბუქი ნარკოტიკების მოხმარების შედეგები და სამართლებრივი პასუხისმგებლობა.

აღნიშნული რესურსი შედგება ორი ნაბიჯისაგან. პირველ ნაბიჯში განვიხილავთ ისეთ საკითხებს, როგორებიცაა: ჯანსაღი ცხოვრების წესი და დამოკიდებულება აზარტულ თამაშებზე, ხოლო მეორე ნაბიჯი მოზარდებს სთავაზობს  მნიშვნელოვან ინფორმაციას მსუბუქი ნარკოტიკის, მარიხუანის, მოხმარების უარყოფითი შედეგებზე.

აღნიშნული საკითხები მოზარდისთვის მარტივად აღსაქმელი ან გასაგები შეიძლება არ იყოს, ამიტომ შევეცადეთ, მოსწავლისათვის ნაცნობი საკითხების შესახებ მსჯელობისა და სავარჯიშოების საშუალებით ახალგაზრდები მარტივად მიგვეხვედრებინა, რატომ შეიძლება ჩაითვალოს რაიმე ქცევა მავნედ და რატომ არის აუცილებელი ჯანსაღი ცხოვრების წესის არჩევა. რესურსი მოწოდებულია, რომ მოსწავლეები ლოგიკურად, მსჯელობით მივიდნენ დასკვნებამდე და გამოსავლის გზებზეც თავადვე იმსჯელონ.