សង្ខេបព័ត៌មានអន្តរជាតិសំខាន់ៗ ប្រចាំថ្ងៃទី១១ ខែធ្នូ ឆ្នាំ២០២៥

Описание: ---
១. នាថ្ងៃទី១០ ខែធ្នូ អង្គការ UNESCO បង្ហាញការព្រួយបារម្ភយ៉ាងខ្លាំងចំពោះភាពតានតឹងដែលបានកើតឡើងជាថ្មីរវាងកម្ពុជា និងថៃ រួមទាំងនៅតំបន់ជុំវិញប្រាសាទព្រះវិហារ ដែលជាទីតាំងបេតិកភណ្ឌពិភពលោករបស់អង្គការ UNESCO ។ អង្គការ UNESCO បានចេញសេចក្តីថ្លែងការណ៍ដោយបានអំពាវនាវឱ្យមានការការពារជាបន្ទាន់ចំពោះបេតិកភណ្ឌវប្បធម៌គ្រប់ទម្រង់ទាំងអស់នៅក្នុងតំបន់នេះ។ អង្គការ UNESCO អះអាងថានឹង បន្តតាមដានស្ថានការណ៍ទាក់ទងនឹងបេតិកភណ្ឌវប្បធម៌ក្នុងតំបន់ ក្នុងគោលបំណងធានាការពារ សម្បត្តិវប្បធម៌ទំាងនោះ។ ដើម្បីសម្រេចគោលដៅនោះ, អង្គការ UNESCO បានជូនដំណឹងដល់ភាគីពាក់ព័ន្ធទាំងអស់អំពីទីតាំងភូមិសាស្ត្រ ដែលស្ថិតក្នុងបញ្ជីបេតិកភណ្ឌពិភពលោក ក៏ដូចជាទីតាំងដែលមានសារៈសំខាន់ ដើម្បីជៀសវាងការខូចខាត ដែលអាចកើតមានឡើង៕
ប្រភព៖ UNESCO (https://whc.unesco.org/en/news/2849)

២. បណ្តាញផ្សព្វផ្សាយនានាបានរាយការណ៍កាលពីថ្ងៃពុធ ទី១០ ខែធ្នូថា តំបន់កាស៊ីណូមួយក្នុងខេត្តឧត្តរមានជ័យនៃប្រទេសកម្ពុជា បានរងគ្រាប់កាំភ្លើងធំរបស់ថៃ បណ្តាលឲ្យមានរបួសដល់ជនជាតិចិន ដែលនៅទីនោះ។ ជុំវិញព័ត៌មាននេះ ស្ថានទូតចិនប្រចាំកម្ពុជា កំពុងធ្វើការផ្ទៀងផ្ទាត់បន្ថែម។ នេះបើយោងតាមសេចក្តីថ្លែងការណ៍ ដែលចេញផ្សាយដោយស្ថានទូតចិនលើគណនី WeChat ផ្លូវការរបស់ខ្លួន។ ស្ថានទូតចិនប្រចាំកម្ពុជាបានណែនាំសាជាថ្មីម្តងទៀតដល់ពលរដ្ឋចិននៅកម្ពុជា ជាពិសេសអ្នកដែលស្ថិតនៅក្នុងខេត្តព្រះវិហារ, ឧត្តរមានជ័យ, បន្ទាយមានជ័យ, បាត់ដំបង និងខេត្តពោធិ៍សាត់ ដែលស្ថិតនៅជិតតំបន់ព្រំដែនកម្ពុជា-ថៃ ត្រូវផ្លាស់ទីទៅកាន់តំបន់សុវត្ថិភាពឲ្យបានឆាប់តាមដែលអាចធ្វើទៅបាន។ ចំណែក ចំពោះពលរដ្ឋចិន ដែលស្ថិតនៅតាមតំបន់ផ្សេងទៀតនៃប្រទេសកម្ពុជា, ស្ថានទូតបានណែនាំមិនឲ្យធ្វើដំណើរទៅកាន់តំបន់ព្រំដែនកម្ពុជា-ថៃ សម្រាប់ពេលបច្ចុប្បន្ននេះទេ។ សេចក្តីថ្លែងការណ៍ដដែលបានបន្ថែមថា ក្នុងករណីមានភាពអាសន្ន ត្រូវរាយការណ៍ទៅកាន់ប៉ូលិសមូលដ្ឋានឲ្យបានឆាប់រហ័ស និងស្វែងរកជំនួយពីស្ថានទូតចិនប្រចាំកម្ពុជា៕
ប្រភព៖ Global Times (https://www.globaltimes.cn/page/20251...)

៣. នាយករដ្ឋមន្ត្រីថៃ លោក អនុទីន ចានវីរៈគុល កំពុងប្រើប្រាស់ជម្លោះព្រំដែនថ្មីៗជាមួយកម្ពុជា ដើម្បីទាញយកការគាំទ្រពីមនោសញ្ចេតនាជាតិនិយមក្នុងប្រទេស មុនពេលការបោះឆ្នោតមកដល់។ តាមរយៈការធ្វើបែបនេះ លោក អនុទីន កំពុងប្រថុយលេងល្បែងភ្នាល់មួយ ខណៈលោកជឿជាក់ថា នឹងមិនធ្វើឱ្យលោក ដូណាល់ ត្រាំ ខឹងថៃទេ។ លោក អនុទីន ដែលលោកធ្លាប់ទទូចថា ជម្លោះជាមួយកម្ពុជាគឺជារឿងដាច់ដោយឡែកពីការចរចាពាណិជ្ជកម្មរបស់ថៃជាមួយសហរដ្ឋអាមេរិក។ ទោះជាយ៉ាងណា លោក ដូណាល់ ត្រាំធ្លាប់បានភ្ជាប់រឿងទាំងពីរជាមួយគ្នាពីមុនមក។ ជាក់ស្តែង លោក ដូណាល់ ត្រាំ បានគំរាមប្រើប្រាស់ទណ្ឌកម្មពាណិជ្ជកម្ម ដើម្បីជំរុញឲ្យថៃ និងកម្ពុជា សម្រេចឱ្យបានកិច្ចព្រមព្រៀងបទឈប់បាញ់ កាលពីខែកក្កដា។ រដ្ឋមន្ត្រីការបរទេសអាមេរិក លោក Marco Rubio ថ្មីៗនេះ ក៏បានចេញសេចក្តីថ្លែងការណ៍មួយកាលពីថ្ងៃអង្គារ ទី៩ ខែធ្នូ ដោយជំរុញយ៉ាងខ្លាំងឲ្យមាន«ការបញ្ឈប់អរិភាពជាបន្ទាន់ ការពារជនស៊ីវិល និងឲ្យភាគីទាំងពីរត្រឡប់ទៅរកវិធានការបន្ធូរបន្ថយភាពតានតឹង» ដែលបានចែងក្នុងកិច្ចព្រមព្រៀងសន្តិភាពថ្ងៃទី២៦ ខែតុលា៕
ប្រភព៖ The Star & Bloomberg (https://www.thestar.com.my/aseanplus/...)

៤. ប្រមុខអង្គការណាតូ លោក Mark Rutte និងរដ្ឋមន្ត្រីការពារជាតិជប៉ុន បានលើកឡើងរួមគ្នានូវ «ក្តីបារម្ភយ៉ាងខ្លាំង» ជុំវិញការល្បាតរួមគ្នាថ្មីៗនេះ ដោយយន្តហោះចម្បាំងរបស់ចិន និងរុស្ស៊ី។ នេះបើតាមការអះអាងរបស់ជប៉ុន។ ហេតុការណ៍ដែលបានកើតឡើង កាលពីថ្ងៃអង្គារ ទី៩ ខែធ្នូ គឺស្របពេលដែលទំនាក់ទំនងជប៉ុន-ចិន កាន់តែអាក្រក់ទៅៗ បន្ទាប់ពីការលើកឡើងរបស់នាយករដ្ឋមន្ត្រីជប៉ុន លោកស្រី Sanae Takaichi អំពីតៃវ៉ាន់ ដែលបានធ្វើឱ្យទីក្រុងប៉េកាំងខឹងសម្បារយ៉ាងខ្លាំង។ សូមបញ្ជាក់ថា កាលពីថ្ងៃអង្គារ មានយន្តហោះទម្លាក់គ្រាប់បែករុស្ស៊ីប្រភេទ Tu-95 ដែលមានសមត្ថភាពផ្ទុកគ្រាប់នុយក្លេអ៊ែរ ចំនួនពីរគ្រឿង បានហោះចេញពីសមុទ្រជប៉ុន ទៅជួបជាមួយយន្តហោះទម្លាក់គ្រាប់បែកចិនប្រភេទ H-6 ចំនួនពីរគ្រឿង នៅសមុទ្រចិនខាងកើត បន្ទាប់មកបានហោះហើររួមគ្នាជុំវិញប្រទេសជប៉ុន។ ក្រោយពីទទួលបានព័ត៌មាននេះ ជប៉ុនបានបញ្ជូនយន្តហោះរបស់ខ្លួន ដើម្បីឆ្លើយតប៕
ប្រភព៖ CNA (https://www.channelnewsasia.com/world...)

Facebook:   / preah.khan.khmer  
Telegram: https://t.me/preah_khan
TikTok:   / preah_khan