လူသားနဲ့ လမ်းလျှောက်ခြင်းအကျိုး (၅) မျိုး

Описание: လူသားဘဝ နေထိုင်ကြရာမှာ ကျန်းမာခြင်းဟာ အရေးကြီးလှပါတယ်။ ကျန်းမာနေရင် ရှိနေတဲ့ စည်းစိမ်ဥစ္စာကိုလည်း ခံစားနိုင်၊
မရှိသေး၊ မရသေးတဲ့ စည်းစိမ်ဥစ္စာပဲဖြစ်ဖြစ်၊ တရားဘက်မှာပဲ ဖြစ်ဖြစ်၊ မရှိသေးတာ မရသေးတာ မှန်သမျှ ရှိလာ၊ ရလာအောင် စွမ်းဆောင်နိုင်ပါတယ်။
ကျန်းမာခြင်းရဲ့ တန်ဖိုးကို မကျန်းမာမှ ပိုသိလာရပါတယ်။

ကျန်းမာနေသူမှာ သွားနိုင်၊ လာနိုင်၊ ရှာဖွေနိုင်ပြီး ခရီးသွားလိုက်၊ စီးပွားရှာလိုက်၊ ရလာတာနဲ့ သုံးလိုက်၊ စားလိုက်၊
ကုသိုလ်ပြုလိုက်နဲ့ တွေ့နေရတာ အားကျစရာပါ။ မကျန်းမာသူမှာတော့ ကယ်ပါ၊ ကူပါ အော်ဟစ်နေရသူရော၊
သွားလေရာရာ ဆေးထုပ်ပိုက်ကာ နာတာရှည် ရောဂါကုသနေရသူရော စုံလို့ပါပဲ။

ကျန်းမာရေးဆိုတာ ပျက်လာပြီဆိုရင် ပြင်ရခက်ပါတယ်။ ဒါ့ကြောင့် ကိုယ်လည်း ကျန်းမာ၊ စိတ်လည်း ကျန်းမာဖို့
လိုအပ်ပါတယ်။

ကျန်းမာရေး ပတ်သက်လို့ ဘုရားရှင်က စက်မနသုတ်မှာ လမ်းလျှောက်ခြင်းအကျိုး (၅) မျိုး ဟောပြထားပါတယ်။
၁။ ခရီးရှည် သွားနိုင်ခြင်း
၂။ အလုပ်ကို ပိုမို ကြိုးစား လုပ်ကိုင်နိုင်ခြင်း၊
၃။ အနာရောဂါ ကင်းခြင်း
၄။ အစာကြေကျက်ခြင်း၊
၅။ စိတ်တည်ငြိိမ်မှုအား ပိုကောင်းမွန်ဆိုတဲ့ အချက်တွေပဲ ဖြစ်ပါတယ်။

ဆေးပညာရှင်များကတော့ ကိုယ်ကျန်းမာ၊ စိတ်ကျန်းမာဖို့ (၄) ချက် လိုက်နာကြဖို့ တိုက်တွန်းထားပါတယ်။
၁။ ပိုမိုကောင်းမွန်စွာ စားသောက်ပါ၊
၂။ အိပ်စက်မှုကို ချိန်ညှိပါ၊
၃။ ပုံမှန် အားကစား ပြုလုပ်ပါ၊
၄။ သေချာ အနားယူပါ။

ပိုမိုကောင်းမွန်စွာ စားသောက်ပါဆိုရာမှာ -
တစ်နေ့တာလုံးမှာ ရေဓာတ်မခန်းခြောက်အောင် ရေများများ သောက်သုံးဖို့၊ ကဖင်းနဲ့ အယ်လ်ကိုဟော ပါတဲ့အရည်များ
အလွန်အကျွံ မသောက်မိဖို့၊ လတ်ဆတ်တဲ့ သစ်သီးနဲ့ ဟင်းသီးဟင်းရွက်များကိုသာမက ကစီဓာတ် ဒြပ်ပေါင်းများကိုလည်း
စားဖို့ တိုက်တွန်းထားပါတယ်။

အိပ်စက်မှုကို ချိန်ညှိပါဆိုရာမှာ-
အိပ်ရာဝင်ချိန်ကို မိမိဘာသာ သတ်မှတ်ကာ မအိပ်မီ မီနစ် (၃၀)နဲ့ တစ်နာရီအကြား အနားယူထားဖို့၊ အဲဒီလို အနားယူထားရင်
ပြေလျော့ပြီး အိပ်ပျော်ဖို့ အခွင့်အလမ်း ပိုများကြောင်းနဲ့ အိပ်ရာထချိန်ကိုလည်း နံနက်ခင်းမှာ နှိုးစက်သံမြည်တာနဲ့ ပြန်အိပ်မယ့်အစား
ချက်ချင်း အိပ်ရာထသင့်ကြောင်း အကြံပြုထားပါတယ်။

ပုံမှန် အားကစားပြုလုပ်ပါဆိုရာမှာ-
လမ်းလျှောက်ခြင်း၊ ပြေးခြင်း၊ ရေကူးခြင်း ဒါမှမဟုတ် အားကစားရုံသို့သွားခြင်း စတဲ့ အားကစားလှုပ်ရှားမှုများ ပြုလုပ်သင့်ကြောင်း
တိုက်တွန်းထားပါတယ်။

သေချာ အနားယူပါဆိုရာမှာလည်း -
လမ်းလျှောက်ခြင်း၊ ရေချိုးခြင်း၊ စာဖတ်ခြင်း ဒါမှမဟုတ် တီဗွီကြည့်ခြင်းစတဲ့ နေ့စဥ် ကိုယ်နှစ်သက်တာ တစ်ခုခု လုပ်ဆောင်ပြီး အနားယူဖို့
ဆေးပညာရှင်များက အကြံပြုထားပါတယ်။

ဒီနေရာမှာ ဘုရားဟောနဲ့ ဆေးပညာရှင်များ တိုက်တွန်းချက် တူနေသည့်အချက်များကို တွေ့ရှိနိုင်ပါတယ်။

ဒါ့ကြောင့် ဘုရားရှင်က လမ်းလျှောက်ရင် အကျိုးတရား (၅) ပါး ရတယ်လို့ ဟောထားသလို၊ ဆေးပညာရှင်များကလည်း ကိုယ်ကျန်းမာ၊ စိတ်ကျန်းမာဖို့
လမ်းလျှောက်ခြင်းကို ထည့်ထားတာ တွေ့ရလို့ လမ်းလျှောက်ကြဖို့ တိုက်တွန်းပါတယ်။

ဒီတရားနာကြားပြီး -
(က) ကျန်းမာရေး ကောင်းပါရဲ့လား?
(ခ) လမ်းရောလျှောက်ဖြစ် ပါရဲ့လား?
(ဂ) ကျန်းမာရေး အလေးထားပါရဲ့လား?

ဖြေကြားကာ ကိုယ်ရော, စိတ်ပါ ကျန်းမာအောင် ပုံမှန်လမ်းလျှောက်ခြင်းဖြင့် ကျန်းမာပျော်ရွှင်တဲ့ဘ၀ကို တည်ဆောက်နိုင်ကြပါစေ …။ (၁၈. ၅. ၂၃)