ჟურნალ „ჭოროხის“ გამოცემა შეჩერდა

Описание: ავტორები: სულხან მესხიძე, თორნიკე პატარაია |
ჟურნალმა, არსებობის მანძილზე, სახელი სულ ორჯერ შეიცვალა. სირთულეების მიუხედავად, „ჭოროხი“ პერიოდულობის დაცვას ყოველთვის ახერხებდა. რედაქციამ ფინანსების არარსებობის გამო, წელს ჟურნალის დაბეჭდვა ვერ მოახერხა. ანაზღაურება არ მიუღია გამოცემის ოთხ თანამშრომელს. რედაქტორისთვის ჯერჯერობით უცნობია, როდის განახლდება ნახევარ საუკუნეზე მეტი ხნის „ჭოროხის“ გამოცემა.

„ჭოროხს“ საქართველოს მწერალთა კავშირის აჭარის ორგანიზაცია სახელმწიფო ბიუჯეტით გამოსცემდა. ჟურნალს, ბოლო პერიოდში, აჭარის განათლების, კულტურისა და სპორტის სამინისტრო აფინანსებდა. გამოცემას, გასულ წელს, 30 000 ლარი გამოეყო. რედაქცია წელს დაფინანსების გაზრდასაც ითხოვდა, თუმცა საერთოდ უფულოდ დარჩა.

მწერალთა კავშირის და ჟურნალ „ჭოროხის“ დაფინანსება არ შეწყვეტილა, საკითხი მხოლოდ გაჭიანურდა - განმარტავენ სამინისტროში. განათლების, კულტურისა და სპორტის მინისტრის მოადგილე აცხადებს, რომ დღეს მოქმედი კანონი მედიასაშუალების დაფინანსებას კრძალავს, ამიტომ ნათია სირაბიძის თქმით, სამომავლოდ შეიქმნება აიპი „მწერალთა სახლი“, რომლის 100 პროცენტიანი მეწილე სამინსიტრო იქნება.

ჟურნალი „ჭოროხი“ 1958 წლიდან გამოდის. გამოცემა 300 ეგზემპლარად იბეჭდება.