မြန်မာဟာကိုယ့်ကိုယ်ကိုယ်ဖျက်ဆီးတဲ့လမ်းကြောင်းဆီဦးတည်နေတယ်လို့ကုလအထူးကိုယ်စားလှယ်ပြော|People's Spring

Описание: မြန်မာဟာ ကိုယ့်ကိုယ်ကိုယ် ဖျက်ဆီးတဲ့ လမ်းကြောင်းဆီ ဦးတည်နေတယ်လို့ ကုလအထူးကိုယ်စားလှယ်ပြော

ဇွန် - ၁၂၊ ၂၀၂၅ / People's Spring

မြန်မာဟာ ကိုယ့်ကိုယ်ကိုယ် ဖျက်ဆီးတဲ့ လမ်းကြောင်းဆီ ဦးတည်နေတယ်လို့ မြန်မာနိုင်ငံဆိုင်ရာ ကုလသမဂ္ဂ အထူးကိုယ်စားလှယ် ဂျူလီဘိရှော့က ပြောကြားခဲ့ပါတယ်။

ဇွန်လ ၁၀ ရက်က ကုလသမဂ္ဂအထွေထွေညီလာခံဆီ တင်ပြတဲ့ အစီရင်ခံမှုမှာ ဘိရှော့က ပြည်တွင်းစစ်သာ ဆက်လက် ရှည်ကြာနေမယ်ဆိုရင် မြန်မာနိုင်ငံဟာ အလုံးစုံ ပျက်စီးသွားလိမ့်မယ်လို့ မှတ်ချက်ပေးသွားခဲ့ပါတယ်။

အပစ်အခတ်ရပ်စဲရေး၊ ပဋိပက္ခတွေ အရှိန်လျှော့ချရေး၊ ပြည်သူလူထုရဲ့ လိုအပ်ချက်တွေကို မျက်နှာမူရေးအတွက် စစ်မှန်တဲ့ အားထုတ်မှုတွေ မရှိသရွေ့ အဓွန့်ရှည်တဲ့ ငြိမ်းချမ်းရေးလည်း ရနိုင်မှာ မဟုတ်ဘူးလို့ ကုလအထူးကိုယ်စားလှယ်က ဆိုပါတယ်။

စစ်ဒဏ်ရော၊ ငလျင်ဒဏ်ပါ ခံစားခဲ့ရတဲ့ မြန်မာနိုင်ငံမှာ အသက်ရှင်ကျန်ရစ်သူတွေအနေနဲ့ အေးအေးချမ်းချမ်း နေချင်တာကြောင့် တိုက်ပွဲတွေကို ရပ်တန့်စေချင်နေကြပြီလို့ သူက ပြောပါတယ်။

လက်နက်ကိုင် ပဋိပက္ခတွေဟာ ပြန်လည်တည်ဆောက်ရေးနဲ့ လူသားချင်းစာနာမှု လုပ်ငန်းတွေ အကောင်အထည်ဖော်တာကိုလည်း အတားအဆီးဖြစ်စေတယ်လို့ ဘိရှော့က မှတ်ချက်ပေးခဲ့ပါတယ်။

ကုလအထူးကိုယ်စားလှယ်က မြန်မာနိုင်ငံမှာ ရန်လိုတိုက်ခိုက်မှုတွေ အားလုံးကို ရပ်တန့်ဖို့ ထပ်လောင်း တောင်းဆိုခဲ့ပြီး အများလက်ခံနိုင်တဲ့ ရည်မှန်းချက်တွေနဲ့ အရှည်တည်တံ့စေမယ့် ငြိမ်းချမ်းရေးကို အကောင်အထည် ဖော်ရာမှာ အရပ်သားပြည်သူတွေကို အကာအကွယ်ပေးဖို့ ဆိုတာက ဦးစားပေးကိစ္စ ဖြစ်ဖို့ လိုကြောင်းလည်း ထောက်ပြပါတယ်။

ရန်လိုတိုက်ခိုက်မှုတွေ အဆုံးမသတ်သေးသရွေ့ မြန်မာဟာ ကိုယ့်ကိုယ်ကိုယ် ဖျက်ဆီးတဲ့ လမ်းကြောင်းဆီ ဆက်လက် ဦးတည်နေလိမ့်မယ်လို့ သူက ဆိုပါတယ်။

နောက်ပြီး မြန်မာနိုင်ငံမှာ အကြမ်းဖက်ရန်လိုမှုတွေ မရပ်တန့်သရွေ့၊ အစုအဖွဲ့ပေါင်းစုံ ပါဝင်ပြီး ပွင့်လင်းမြင်သာတဲ့ ရွေးကောက်ပွဲမျိုး မကျင်းပနိုင်သရွေ့၊ လက်နက်ကိုင် တော်လှန်မှုတွေနဲ့ မတည်ငြိမ်မှုတွေ ဆက်လက် ပြင်းထန်နေလိမ့်မယ်လို့ သတိပေးခဲ့ပါတယ်။

လောလောဆယ် အာဏာသိမ်းစစ်ကောင်စီကတော့ အဲဒီအခြေအနေတွေနဲ့ ဆန့်ကျင်ဘက်ကိစ္စတွေကိုပဲ လုပ်ဆောင်နေတယ်လို့ ကုလအထူးကိုယ်လှယ်က ဆိုပါတယ်။

နိုင်ငံရေးခေါင်းဆောင်အများအပြားကို စစ်ကောင်စီက ဖမ်းဆီးထားတဲ့ အခြေအနေမျိုးမှာ ကျင်းပမယ့် ရွေးကောက်ပွဲဟာ အစုအဖွဲ့ပေါင်းစုံ ပါဝင်ပါတယ်ဆိုတာကို စဉ်းစားပုံဖော်ကြည့်လို့တောင်မဖြစ်နိုင်ကြောင်း ဘိရှော့က ပြောပါတယ်။

ကုလသမဂ္ဂအနေနဲ့ မြန်မာအစိုးရခေါင်းဆောင် ဒေါ်အောင်ဆန်းစုကြည်နဲ့ တခြားတရားလက်မဲ့ ဖမ်းဆီးခံထားရသူတွေ အားလုံး လွတ်မြောက်ရေးအတွက် ဖိဖိစီးစီး တောင်းဆိုဖို့လိုကြောင်းလည်း ထပ်လောင်းတိုက်တွန်းသွားခဲ့ပါတယ်။

မြန်မာနိုင်ငံမှာရှိနေတဲ့ လူ့အဖွဲ့အစည်းအသီးသီးရဲ့ လုံခြုံရေး၊ အခွင့်အလမ်းနဲ့ ရပိုင်ခွင့်တွေ အားလုံးကို အာမခံချက် ပေးနိုင်ဖို့ဆိုရင် လက်ရှိ ပဋိပက္ခတွေရဲ့ ဇစ်မြစ်ကိုရော၊ ပုံစံအမျိုးမျိုးနဲ့ ခွဲခြားဆက်ဆံမှုနဲ့ နိုင်ငံသားဖြစ်ခွင့် ပိတ်ပင်မှုကိစ္စတွေကိုပါ ဦးတည် ဖြေရှင်းဖို့ လိုကြောင်းလည်း ဘိရှော့က ပြောကြားသွားပါတယ်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring