​ក្រុងសៀមរាបត្រៀមខ្លួនប្រឡងប្រណាំង "ទីក្រុងស្អាត" លើកទី៤ នឹងរំពឹងដណ្ដើមបានផ្ការំដួល ៣ទង បន្តទៀត

Описание: អាជ្ញាធរក្រុង៖ ក្រុងសៀមរាបត្រៀមខ្លួនប្រឡងប្រណាំង "ទីក្រុងស្អាត" លើកទី៤ នឹងរំពឹងដណ្ដើមបានផ្ការំដួល ៣ទង បន្តទៀត

អាជ្ញាធរក្រុងសៀមរាប បានអះអាងថា ក្រុងទេសចរណ៍ប្រវត្តិសាស្ត្រមួយនេះ បាននិងកំពុងរៀបចំខ្លួនឱ្យកាន់តែប្រសើរឡើង នៅក្នុងការចូលរួមចលនាប្រឡងប្រណាំងទីក្រុងស្អាត លើកទី៤ សម្រាប់សុពលភាពឆ្នាំ២០២៦-២០២៩ ដោយរំពឹងថានឹងបន្តទទួលបានជ័យលាភីផ្ការំដួលបីទង។

ក្នុងកិច្ចប្រជុំផ្ទៀងផ្ទាត់ និងវាយតម្លៃចលនាប្រឡងប្រណាំងទីក្រុងស្អាត លើកទី៤ បេក្ខភាព “ក្រុងសៀមរាប” នៅថ្ងៃទី១១ ខែវិច្ឆិកា ឆ្នាំ២០២៥នេះ លោក ស៊ាន គឹមឋាន អភិបាលរងក្រុងសៀមរាប បានលើកឡើងថា ក្រុងទេសចរណ៍ប្រវត្តិសាស្ត្ររបស់កម្ពុជាមួយនេះបានត្រៀមខ្លួនរួចជាស្រេចដើម្បីចូលរួមក្នុងចលនាប្រឡងប្រណាំងទីក្រុងស្អាតលើកទី៤។ ក្រុងសៀមរាបបានខិតខំធ្វើយ៉ាងណាឱ្យបានកាន់តែល្អសម្រាប់ចលនានេះ ដោយរំពឹងថានឹងទទួលបានជ័យលាភី “ផ្ការំដួលបីទង” ជាទីក្រុងស្អាត បន្តទៀត បន្ទាប់ពីធ្លាប់ទទួលបានចំណាត់ថ្នាក់ខ្ពស់បំផុតនេះទាំង ៣ លើករួចមកហើយ។

លោក ស៊ាន គឹមឋាន បន្តថា ដើម្បីងាយស្រួលក្នុងការអភិវឌ្ឍក្រុង ដែលជាផ្នែកមួយក្នុងការរៀបចំជាទីក្រុងស្អាតនោះ រដ្ឋបាលក្រុងបានបែងចែកក្រុងសៀមរាបជាតំបន់ផ្សេងគ្នាដូចជា៖ តំបន់កណ្ដាលក្រុង, តំបន់ការពារបេតិកភណ្ឌ ឬតំបន់ឧទ្យានអង្គរ និងតំបន់មាត់បឹងទន្លេសាប ដែលការបែងចែកនេះនឹងធ្វើឱ្យមានភាពងាយស្រួល និងចំគោលដៅនៅក្នុងការអភិវឌ្ឍតាមតំបន់នីមួយៗ។

គួរឱ្យដឹងថា ចលនាប្រឡងប្រណាំងទីក្រុងស្អាតលើកទី៤ មានសុពលភាពរយៈពេល ៤ឆ្នាំ គឺពីឆ្នាំ ២០២៦-២០២៩ ហើយស្ដង់ដារទីក្រុងស្អាតថ្មីរួមមាន៖ ៧ សូចនាករគោល, ៤១ សូចនាករលំអិត, ១១៣ លក្ខណវិនិច្ឆ័យ ដែលស្មើនឹង ១២០ពិន្ទុ។ ចលនានេះត្រូវបានរៀបចំឡើងក្នុងគោលបំណងលើកកម្ពស់សោភ័ណភាព បរិស្ថានអនាម័យ និងសណ្ដាប់ធ្នាប់នៅក្រុង និងខណ្ឌ រួមចំណែកដល់ការអភិវឌ្ឍវិស័យទេសចរណ៍ និងការរីកចម្រើននៃសង្គមជាតិ ជំរុញ និងលើកទឹកចិត្តឱ្យក្រុង និងខណ្ឌក្លាយជា ទីក្រុងស្អាត ឆ្លាត បៃតង ផ្ដល់នូវបដិសណ្ឋារកិច្ចល្អ និងភាពកក់ក្ដៅ និងរក្សាបាននូវតុល្យភាពរវាងការអភិវឌ្ឍសេដ្ឋកិច្ចសង្គម និងការអភិរក្សសម្បត្តិធនធានធម្មជាតិ វប្បធម៌ និងបរិស្ថាន។

ចលនានេះតម្រូវឱ្យមានការទទួលខុសត្រូវរួមគ្នាពីគ្រប់តួអង្គពាក់ព័ន្ធដូចជា ក្រសួង-ស្ថាប័ន អាជ្ញាធរមូលដ្ឋាន វិស័យឯកជន ព្រមទាំងប្រជាពលរដ្ឋ ដើម្បីរៀបចំក្រុង និងខណ្ឌឱ្យកាន់តែរស់រវើក មានផាសុកភាពក្នុងការរស់នៅ និងជាទីទាក់ទាញសម្រាប់ទេសចរជាតិ និងអន្តរជាតិ៕

អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ