ព្រះយេស៊ូវបង្រៀនពួកសិស្សពីរបៀបអធិស្ឋានទៅព្រះវរបិតា

Описание: #តើយើងត្រូវអធិស្ឋានទៅអ្នកណា ទៅព្រះយេស៊ូវ ឬ ព្រះវរបិតា?

ជាការពិតណាស់ ព្រះយេស៊ូវតែងតែលើកតម្កើងព្រះវរបិតា មើលទ្រង់ក៏បង្រៀនយើងឲ្យអធិស្ឋានទៅព្រះវរបិតា មិនមែនអធិស្ឋានទៅទ្រង់ទេ តែការអធិស្ឋានរបស់យើងគឺដោយនូវព្រះនាមទ្រង់វិញ។ ទោះបីជាយើងជឿថាព្រះវរបិតា ព្រះរាជបុត្រា និង ព្រះវិញ្ញាណបរិសុទ្ធរួមគ្នាតែ១ តែគួរឲ្យយើងអធិស្ឋានទៅព្រះវរបិតា នោះត្រឹមត្រូវជាង ហើយគាប់ព្រះហឫទ័យទ្រង់ តាមព្រះបន្ទូលទ្រង់។ ប៉ុន្តែបងប្អូនអើយ សេចក្តីដែលលើកនិយាយនេះ មិនបាននិយាយដោយបញ្ញាចិត្តសៅហ្មងទេ ឬបង្អាក់ចិត្តបងប្អូនណាដែលចូលចិត្តអធិស្ឋានទៅព្រះយេស៊ូវទេ តែខ្ញុំនិយាយដោយយល់ដល់ព្រះបន្ទូលបង្រៀនយើងប៉ុណ្ណោះ។ ដូច្នេះទោះបីជាបងប្អូនទម្លាប់អធិស្ឋានទៅព្រះយេស៊ូវក៏មិនខុសទាស់អ្វីដែរ ពីព្រោះព្រះវរបិតា ព្រះរាជបុត្រា និង ព្រះវិញ្ញាណបរិសុទ្ធ រួមគ្នាជាតែ១ ជាព្រះត្រៃឯក (ប៉ុន្តែ ទាំង៣អង្គផ្សេងគ្នា តែរួមគ្នាតែ១ ដ្បិតព្រះវរបិតា មិនមែនជាព្រះរាជបុត្រា ហើយព្រះរាជបុត្រាក៏មិនមែនជាព្រះវរបិតាដែរ ហើយព្រះវិញ្ញាណបរិសុទ្ធក៏មិនមែនជាព្រះវរបិតា ឬជាព្រះរាជបុត្រាដែរ គឺជាព្រះវិញ្ញាណរបស់ព្រះ ជាអង្គបុគ្គល១អង្គទៀតដែលព្រះវរបិតាចាត់មកផែនដី។

ប៉ុន្តែយ៉ាងណាបំណងព្រះហឫទ័យរបស់ព្រះយេស៊ូវ គឺបង្គាប់យើងឲ្យអធិស្ឋានទៅព្រះវរបិតា តែសេចក្តីអធិស្ឋាននោះទូលសូមដោយនូវព្រះនាមទ្រង់ ដ្បិតព្រះវរបិតាបានចាត់ឲ្យទ្រង់មក។ បានជាយើងតែងតែអធិស្ឋាន ហើយបញ្ចប់ដោយនូវព្រះនាមព្រះយេស៊ូវគ្រីស្ទ ឬ ក្នុងព្រះនាមព្រះយេស៊ូវគ្រីស្ទ ហើយបញ្ចប់ដោយថា "អាម៉ែន"។

📕យ៉ូហាន ១៤.១០-១១, ១៣-១៤
តើអ្នកមិនជឿថា ខ្ញុំនៅក្នុងព្រះវរបិតា ហើយព្រះវរបិតាគង់នៅក្នុងខ្ញុំទេឬអី អស់ទាំងពាក្យដែលខ្ញុំប្រាប់ដល់អ្នករាល់គ្នា នោះខ្ញុំមិនមែនប្រាប់ ដោយអាងខ្លួនខ្ញុំទេ គឺជាព្រះវរបិតាដែលគង់ក្នុងខ្ញុំ ទ្រង់ធ្វើការទាំងនោះវិញ ចូរជឿខ្ញុំថា ខ្ញុំនៅក្នុងព្រះវរបិតា ហើយព្រះវរបិតាក៏គង់ក្នុងខ្ញុំ ពុំនោះសោត ឲ្យជឿខ្ញុំដោយព្រោះការទាំងនោះឯងចុះ
ហើយការអ្វីក៏ដោយ ដែលអ្នករាល់គ្នានឹងសូម ដោយនូវឈ្មោះខ្ញុំ នោះខ្ញុំនឹងសំរេចឲ្យ ដើម្បីឲ្យព្រះវរបិតាបានដំកើងឡើងក្នុងព្រះរាជបុត្រា បើអ្នករាល់គ្នានឹងសូមអ្វី ដោយនូវឈ្មោះខ្ញុំ នោះខ្ញុំនឹងសំរេចឲ្យ។

📕យ៉ូហាន ១៥.៧
បើអ្នករាល់គ្នានៅជាប់នឹងខ្ញុំ ហើយពាក្យខ្ញុំនៅជាប់ក្នុងអ្នករាល់គ្នា នោះចូរសូមអ្វីតាមតែប្រាថ្នាចុះ សេចក្ដីនោះនឹងបានសំរេចដល់អ្នករាល់គ្នាជាមិនខាន។