ලලිතා සහස්‍රනම් ස්තෝත්‍රය ||| Lalitha sahasranam sthothra with lyrics |||

Описание: ලොව පුරා මව් දෙවඟනගේ ගුණ වර්ණනා කිරීම පිණිස බොහෝ ස්තෝත්‍ර ගීතිකා ගායනා කරනු ලබන අතර හින්දු ධර්මය තුළ මව් දෙවඟන වෙනුවෙන් ගැයෙන ස්තෝත්‍ර අතරින් ලලිතා සහශ්‍රනාම ස්තෝත්රයට හිමි වන්නේ ඉතා අද්විතීය ස්ථානයකි. සහශ්‍රනාම ස්තෝත්රයක් යනු යම් දෙවි කෙනෙක් වෙනුවෙන් භාවිතා කරන නාමයන් දාහක් එකට එකතු කර නිර්මාණය කරන ලද ස්තෝත්රයකි. මේවා අතරින් පරාශක්ති මාතාව හෙවත් සියලු ශක්තීන්ට ඉහලින් සිටින, සියලු ශක්තීන්ගේ මූලය වන, පාර්වතියගේ පූර්ණ ස්වරූපය වන, සියලු දෙවඟනන්ගේ ඒක ස්වරූපය වන විශ්වයේ මාතෘ ශක්තිය වන ලලිතා පරමේශ්වරිය වෙනුවෙන් රචනා කරන ලද ලලිතා සහශ්‍රනාම ස්තෝත්රය සියලු සහශ්‍රනාම ස්තෝත්‍ර අතරින් බලවත්ම ස්තෝත්රය වේ.

ලලිතා සහශ්‍රනාම ස්තෝත්‍රය ගායනා කිරීමෙන් සියලු ආධ්යාත්මික සහ ලෞකික දියුණුව සැලසෙන අතර සියලු දුක් කරදර විපත් දුරු වී සියලු සෞභාග්‍ය උදා කරයි.
මෙය ගායනා කරන විට අපගේ සිරුර හරහා ශක්තීන් ගමන් කරන මාර්ග හා චක්‍ර විවෘත වී පිරිසිදු වන අතර විශ්ව ශක්තිය සමඟ ඒකාත්මික වීමට උපකාර කරයි.
අපගේ හිස්මුදුනේ තිබෙන සහස්රාර චක්රයේ (පෙති දාහකින් යුත් නෙලුම) එක පෙත්තකට එක නාමය බැගින් ලලිතා සහශ්‍රනාමයේ සෑම නාමයක්ම බලවත් වන අතර එය ගායනා කරන විට සහස්රාරයද විවෘත වේ. සියලු ලෞකික දියුණුව උදා කරන විෂ්ණු සහශ්‍රනාමය සියලු සහශ්‍රනාම අතරින් බලවත් වේ, සියලු ආධ්යාත්මික දියුණුව සලසන ශිව සහශ්‍රනාමය එයටත් වඩා උතුම් වන අතර ලෞකික සහ ආධ්යාත්මික යන මාර්ග දෙකටම සහය වන ලලිතා සහශ්‍රනාමයම සියල්ලටම වඩා උතුම් වේ.

ලලිතා සහශ්‍රනාමය ශ්‍රී විද්යාවේ(මාතාවගේ විද්යාව) එන වැදගත්ම ස්තෝත්‍ර වලින් එකක් වන අතර එය බ්‍රහ්මාණ්ඩ පුරාණයේ එන ස්තෝත්‍රයකි. වශිනි,කාමේශ්වරී, මෝදිනි විමලේ, අරුනේ, ජයිනි,සර්වේශ්වරී, කෞලිනී යන වාග් දේවතාවන් විසින් මුලින්ම ගායනා කරන ලද මෙය හයග්රීව දෙවියන්ගෙන් අගස්ත්ය සෘෂිතුමා හරහා මනු ලොවට ලැබුනි. සියලු සහශ්‍රනාම අතරින් එකම නාමය නැවත නැවත සදහන් නොවන එකම ස්තෝත්රයද මෙයයි.

ලලිතා යන නාමයේ අර්ථය 'ක්‍රීඩා කරන්නිය' යන්නයි. තම දරුවා වන විශ්වය සමඟ සතුටින් සෙල්ලම් කරන බැවින් මෙනමින් එතුමියව හදුන්වයි. 'ශ්‍රී මාතා' හෙවත් සියලු සෞභාග්‍යයන්ගේ උල්පත ලෙස හදුන්වමින් ආරම්භ වන මෙම ස්තෝත්‍රය පුරාම පිළිවෙලින් ඇගේ රූපකාය, ඇයගේ ක්රියාවන්, ආශිර්වාදයන් මෙන්ම ඇගේ කතාවද හොදින් විස්තර කරන මෙම ස්තෝත්‍රය අන් සැමටම වඩා අද්විතීය නිර්මාණයක් වීමට එයද හේතු වී ඇත. එමෙන්ම මෙම ස්තෝත්‍රය බොහෝ ආධ්‍යාත්මික දැනුමකින් සෑදුන දැණුම් සාගරයක් වැනිය.

මෙම නම් 1000 න්,
සියලු නාමයන් සහ ස්වරූපයන් ඇයගේ බව පැවසීමට නම් 27ක් 'රූපා' ලෙසද 40 ක් 'රූපිනී' ලෙසද අවසන් වේ. ඇය වාසය කරන තැන් පිළිබඳව කියවෙන 'නිළයා' ලෙස අවසන් වන නම් 12ක්ද, '-ස්ථා' ලෙස අවසන් වන නම් 22ක්ද, ඇය ප්‍රිය කරන දේවල් 24ක් 'ප්‍රියා' ලෙස අවසන් වන නම් 24 කින්ද, ඇය දානය කරන දේවල් 25ක් 'දා' ලෙස අවසන් වන නම් 25 කින්ද, ඇය නොවන දේවල් 40ක් 'නි'ලෙස ආරම්භ කරමින්ද මෙම ස්තෝත්‍රය පුරා ඉදිරිපත් කර ඇත.

පංච බ්‍රහ්මාසනය මත උක් දුන්නක්, පුෂ්ප පහක හීයක්, පාශයක් සහ අංකුශයක් දරාගෙන සිටින, උදෑසන නැගෙන හිරු මෙන් බබළන, නෙත් තුනක් ඇති, සර්වාභරණයෙන් අලංකෘත මාතාවගේ රූප කාය හා මාතාව සහ භන්ඩාසුර අතර ඇති වූ යුද්ධය පිළිබඳවද, එහිදී මාතාවගේ විවිධ ශක්තින් මාතාවට සහය වු අයුරුද (මාතාවගේ උක් දණ්ඩෙන් උපන් මන්ත්‍රිනී හෙවත් රාජ මාතාංගි දෙවඟන අගමැති ලෙසද, මල් හීයෙන් උපන් දණ්ඩනාථා හෙවත් වාරාහි දෙවඟන සේනාපති ලෙසද, අංකුශයෙන් උපන් සම්පත්කරී දෙවඟන ඇත් සේනාවේ නායිකාව ලෙසද, පාශයෙන් උපන් අශ්වාරූඩා දෙවඟන අස් සේනාවේ නායිකාව ලෙසද, ශක්ති දෙවඟනන් හා නිත්‍යා දෙවඟනගේ සේනාවක් ලෙසද, ජ්වාලාමාලිනී දෙවඟන අග්නි ප්‍රාකාරයක් නිර්මාණය කිරීමෙන්ද, බාලා දෙවඟන භණ්ඩපුත්රයන් පරාජය කිරීම ආදී ලෙස) සහ එතුමියගේ ස්වාමියා වන කාමේශ්වර හෙවත් සදා ශිව සහ එතුමිය අතර ඇති බැදීම ගැනද මෙම ස්තෝත්‍රය පුරා සදහන් වේ.

ලලිතා සහශ්‍රනාමයට අනුව නිර්මාණය, පැවැත්ම, විනාශය, සුක්ෂ්ම ස්වභාවයට පත් කිරීම(පරමාණුව පවා බිදී ගොස් සූක්ෂ්ම ස්වභාවයට පත් වීම) සහ නැවත ඇතිවීම යන පංච කෘත්‍යන් පංච බ්‍රහ්මයන්ට (බ්‍රහ්ම, විෂ්ණු, ශිව, ඊෂ්වර, සදාශිව) පවරන එතුමිය පංච බ්‍රහ්මයන්ගෙන් සෑදුන ආසනය මත වාඩි වී සිටී. පංච කෝෂයන්ට ඉහලින් එතුමිය සිටී. ඇය පංච යග්නයන්ට (දිව්‍ය, මනුෂ්‍ය, මුතුන් මිත්තන්ගේ ආත්ම, සියලු ජිවීන් සහ පර බ්‍රහ්ම උදෙසා කරන පුදසත්කාර) වලින් ඇය ප්රීතිමත් වේ. එතුමිය පංච භූතයන් සහ පංච නිරූපණය කරන මල් ඊතල පහක්ද මනස නිරූපනය කරන උක් දණ්ඩකින් සෑදූ දුන්නක්ද දරා සිටී.

ආරම්භයේදී මාතාවගේ සගුණ ස්වරූපය(භෞතික ස්වරූපය) විස්තර කරන අතර එය අවසානය වන විට ඇගේ නිර්ගුණ ස්වරූපය(ස්වරූපයක් රහිත බව, ශක්ති ස්වරූපය) විස්තර කරයි. ඇයව විවිධ ප්‍රතිවිරුද්ධ යුගල වශයෙන්ද හදුන්වයි. රූපයක් ඇති - නැති බව, විද්යාව සහ අවිද්යාව ලෙස, ශක්තිය සහ විඥානය ලෙස ආදී ලෙස ඇයව හදුන්වයි(මෙහි බොහෝ කරුණු අවබෝධ කරගත හැක්කේ ආධ්යාත්මිකව දියුණු වූ මනසකටය).

මෙහි සිරුරේ චක්‍ර හත පිළිබදවද, ඒ සෑම චක්රයකටම අධිපති වන මෑණියන්ගේ ස්වරූප ගැනද මෙහි සදහන් වේ.
මෙහි අවසන් කොටස තුල මාතාවගේ ආධ්‍යාත්මික ලෝකෝත්තර ස්වභාවය ගැන විස්තර කරන අතර ඇය වෙත ලං වන අයුරු,ඇයට වන්දනා කළ යුතු අයුරු(උපචාර, මුද්‍රා ආදී) සහ ඇගේ කාරුණික බව ගැනද කියවේ.

කලියුගයේදී දෙවියන් වෙත ළඟා විය හැකි පහසුම මාර්ගය දෙවියන්ගේ නම් ගායනා කිරීමයි. ලලිතා සහශ්‍රනාමයේ පල ශෘතියට අනුව අතීතයේ මෙවන් බලගතු ස්තෝත්රයක් නොතිබුන අතර ආනාගතයේද බිහි නොවේ.

මෙය ඔබට දිනපතා වුවද ගායනා කළ හැකි අතර දිනකට නම් කිහිපය බැගින් වුවද මෑණියන් සිහි කරමින් ගායනා කළ හැකිය. මාතාව තමන්ගේ හදවතේ වාසය කරන බව සිතමින් මෙය ගායනා කිරීම අති ප්‍රබලය.
සිකුරාදා දිනවල සහ පුර පසළොස්වක වැනි මාතාවට විශේෂ වන දිනවල ඕනෑම දේව මාතාවක් ඉදිරියේ පහන් ආලෝකයක් දල්වා ඔබට මෙම ස්තෝත්‍රය ගායනා කළ හැකිය.
(ගණ දෙවියන් සිහි කර එතුමාගෙන් අවසර ගැනීමෙන් පසුව)
#lalithasahasranamam #manthra #sthothra