ਅੰਤਰਰਾਸ਼ਟਰੀ ਸਰਬਸਾਂਝਾ ਸਾਹਿਤਕ ਮੰਚ(ਰਜਿ.)ਕਨੇਡਾ ਵੱਲੋਂ ਕਰਵਾਏ ਗਏ ਕਵੀ ਦਰਬਾਰ ਵਿੱਚ ਲੱਗੀ ਹਾਜ਼ਰੀ

Описание: ਅੰਤਰਰਾਸ਼ਟਰੀ ਸਰਬ ਸਾਂਝਾ ਸਾਹਿਤਕ ਮੰਚ (ਰਜਿ.) ਕੈਨੇਡਾ ਅਤੇ ਭਾਰਤ ਅਤੇ ਰਾਮਗੜ੍ਹੀਆ ਸਿੱਖ ਫਾਊਂਡੇਸ਼ਨ ਆਫ਼ ਓਂਟਾਰੀਓ ਕੈਨੇਡਾ ਦੇ ਚੇਅਰਮੈਨ ਸ. ਦਲਜੀਤ ਸਿੰਘ ਗੈਦੂ ਅਤੇ ਸ੍ਰੀਮਤੀ ਕੁਲਵੰਤ ਕੌਰ ਗੈਦੂ ਵੱਲੋਂ ਆਪਣੇ ਸਤਿਕਾਰਯੋਗ ਮਾਤਾ-ਪਿਤਾ ਜੀ ਦੀ ਪਵਿੱਤਰ ਯਾਦ ਵਿੱਚ ਪਿੰਡ ਜੈ ਸਿੰਘ ਵਾਲਾ ਵਿਖੇ ਇੱਕ ਬੇਹੱਦ ਪ੍ਰਭਾਵਸ਼ਾਲੀ ਅਤੇ ਯਾਦਗਾਰੀ ਸਮਾਗਮ “ਲਫ਼ਜ਼ਾਂ ਦੀ ਖ਼ੁਸ਼ਬੂ” ਕਵੀ ਦਰਬਾਰ ਆਯੋਜਿਤ ਕੀਤਾ ਗਿਆ। ਇਹ ਸਮਾਗਮ ਅੰਤਰਰਾਸ਼ਟਰੀ ਮਾਂ ਬੋਲੀ ਪੰਜਾਬੀ ਦਿਵਸ ਨੂੰ ਸਮਰਪਿਤ ਸੀ।
ਆਰ.ਐਸ.ਐੱਫ.ਓ. ਦੇ ਮੀਡੀਆ ਇੰਚਾਰਜ ਭਗਵੰਤ ਸਿੰਘ ਮਣਕੂ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਸ ਕਵੀ ਦਰਬਾਰ ਵਿੱਚ ਲਗਭਗ 50 ਉੱਚ ਕੋਟੀ ਦੇ ਕਵੀਆਂ ਨੇ ਸ਼ਿਰਕਤ ਕੀਤੀ। ਤਿੰਨ ਘੰਟਿਆਂ ਤੋਂ ਵੱਧ ਸਮੇਂ ਤੱਕ ਚੱਲਿਆ ਇਹ ਪ੍ਰੋਗਰਾਮ ਬੜੀ ਹੀ ਸ਼ਾਂਤਮਈ ਅਤੇ ਸੁਚੱਜੀ ਵਿਵਸਥਾ ਨਾਲ ਸੰਪੰਨ ਹੋਇਆ।
ਮੰਚ ਉੱਤੇ ਸ. ਦਲਜੀਤ ਸਿੰਘ ਗੈਦੂ ਅਤੇ ਸ੍ਰੀਮਤੀ ਕੁਲਵੰਤ ਕੌਰ ਗੈਦੂ ਤੋਂ ਇਲਾਵਾ ਸਾਹਿਤਕ ਮੰਚ ਕੈਨੇਡਾ ਦੇ ਪ੍ਰਧਾਨ ਜਰਨੈਲ ਸਿੰਘ ਮਠਾੜੂ, ਇੰਡੀਆ ਦੇ ਪ੍ਰਧਾਨ ਡਾ. ਹਰਮੀਤ ਕੌਰ ਮੀਤ, ਚੀਫ਼ ਕੋਆਰਡੀਨੇਟਰ ਡਾ. ਸੁਰਜੀਤ ਕੌਰ ਭੋਗਪੁਰ, ਵਿਸ਼ਵ ਪੰਜਾਬੀ ਸਭਾ ਦੀ ਕੌਮੀ ਪ੍ਰਧਾਨ ਮੈਡਮ ਬਲਬੀਰ ਕੌਰ ਰਾਏਕੋਟੀ (ਵਿਸ਼ੇਸ਼ ਮਹਿਮਾਨ), ਆਰ.ਐਸ.ਐੱਫ.ਓ. ਕੈਨੇਡਾ ਦੇ ਮੀਤ ਪ੍ਰਧਾਨ ਸ. ਬਲਦੇਵ ਸਿੰਘ ਮਣਕੂ, ਕਰਨੈਲ ਸਿੰਘ ਅਸਪਾਲ (ਸਿਰਸਾ, ਹਰਿਆਣਾ), ਸੁਖਮੰਦਰ ਸਿੰਘ ਗਿੱਲ (ਮਲੋਟ) ਅਤੇ ਕਰਨੈਲ ਸਿੰਘ (ਦਸਮੇਸ਼ ਕੰਬਾਈਨ, ਮਾਲੇਰਕੋਟਲਾ) ਪ੍ਰਧਾਨਗੀ ਮੰਡਲ ਵਿੱਚ ਸੁਸ਼ੋਭਿਤ ਸਨ।
ਸਮਾਗਮ ਦਾ ਮੰਚ ਸੰਚਾਲਨ ਉੱਘੇ ਕਵੀ ਅਤੇ ਲੇਖਕ ਕੁਲਵਿੰਦਰ ਸਿੰਘ ਗਾਖਲ (ਸਟੇਟ ਐਵਾਰਡੀ) ਨੇ ਬੜੀ ਹੀ ਸੁਚੱਜੀ ਅਤੇ ਪ੍ਰਭਾਵਸ਼ਾਲੀ ਅੰਦਾਜ਼ ਵਿੱਚ ਕੀਤਾ, ਜਿਸ ਦੀ ਸਾਰੇ ਹਾਜ਼ਰ ਕਵੀਆਂ, ਲੇਖਕਾਂ ਅਤੇ ਪਤਵੰਤੇ ਮਹਿਮਾਨਾਂ ਵੱਲੋਂ ਖੂਬ ਸ਼ਲਾਘਾ ਕੀਤੀ ਗਈ।
ਇਸ ਮੌਕੇ ਜਰਨੈਲ ਸਿੰਘ ਮਠਾੜੂ, ਕੁਲਵੰਤ ਕੌਰ ਗੈਦੂ, ਡਾ. ਹਰਮੀਤ ਕੌਰ ਮੀਤ, ਡਾ. ਸੁਰਜੀਤ ਕੌਰ ਭੋਗਪੁਰ, ਬਲਬੀਰ ਕੌਰ ਰਾਏਕੋਟੀ, ਜਸਵਿੰਦਰ ਕੌਰ ਜੱਸੀ, ਕਰਨੈਲ ਸਿੰਘ ਅਸਪਾਲ, ਕੁਲਵਿੰਦਰ ਸਿੰਘ ਗਾਖਲ, ਪ੍ਰੋ. ਪਵਨ ਖਿੱਚੀ, ਮੁਖਤਿਆਰ ਸਿੰਘ ਸ਼ਿਵਾਨ, ਕੁਲਦੀਪ ਸਿੰਘ ਰਤਨ, ਦਲਜੀਤ ਕੁਮਾਰ ਮਹਿਮੀ, ਨਾਨਕ ਚੰਦ ਵਿਰਲੀ, ਸੁਖਦੇਵ ਸਿੰਘ ਗੰਢਵਾਂ, ਸਾਹਿਬਾ ਜੀਟਨ ਕੌਰ, ਕੁਲਦੀਪ ਕੌਰ ਦੀਪ ਲੁਧਿਆਣਵੀ, ਪਰਵਿੰਦਰ ਕੌਰ ਲੋਟੇ, ਰੁਪਿੰਦਰ ਰਿੰਪੀ, ਮਨੀ ਹਠੂਰ, ਹਰੀਸ਼ ਪਟਿਆਲਵੀ, ਇਕਬਾਲ ਘਾਰੂ, ਜਸਜੋਤ ਸਿੰਘ, ਡਾ. ਵਰਿੰਦਰ ਗੋਗਨਾ, ਨਾਜਮਾਂ ਖਤੂਨ ਨਾਜ, ਰਾਜਵਿੰਦਰ ਕੌਰ ਲੜੋਆ, ਅਮਨਦੀਪ ਸਿੰਘ, ਸੁਖਵਿੰਦਰ ਆਹੀ, ਲੱਕੀ ਸਿੰਘ, ਕਰਮਜੀਤ ਕੌਰ, ਸਵਰਨ ਸਿੰਘ ਧੰਜਣ, ਸੰਦੀਪ ਕੌਰ ਧੰਜਣ, ਗੁਰਪ੍ਰੀਤ ਕੌਰ ਅਤੇ ਅਮਿਤ ਕੌਰ ਸਮੇਤ ਕਈ ਹੋਰ ਕਵੀਆਂ ਨੇ ਸ਼ਿਰਕਤ ਕਰਕੇ ਆਪਣੀਆਂ ਇੱਕ ਤੋਂ ਇੱਕ ਵਧੀਆ ਰਚਨਾਵਾਂ ਪੇਸ਼ ਕੀਤੀਆਂ।
ਸਰਦੂਲ ਸਿੰਘ ਭੱਲਾ ਜੀ ਸਿਹਤ ਠੀਕ ਨਾ ਹੋਣ ਕਾਰਨ ਹਾਜ਼ਰ ਨਾ ਹੋ ਸਕੇ, ਪਰ ਉਨ੍ਹਾਂ ਦੀ ਕਵਿਤਾ ਸੁਣਾ ਕੇ ਉਨ੍ਹਾਂ ਦੀ ਹਾਜ਼ਰੀ ਦਰਜ ਕਰਵਾਈ ਗਈ।
ਸਾਰੇ ਕਵੀਆਂ ਨੇ ਆਪਣੀਆਂ ਰਚਨਾਵਾਂ ਰਾਹੀਂ ਸਮਾਜ ਦੇ ਵੱਖ-ਵੱਖ ਪਹਿਲੂਆਂ ਨੂੰ ਛੂਹਦਿਆਂ ਮਨੁੱਖੀ ਭਾਵਨਾਵਾਂ ਨੂੰ ਸੁੰਦਰ ਢੰਗ ਨਾਲ ਪ੍ਰਗਟ ਕੀਤਾ। ਇਹ ਕਵੀ ਦਰਬਾਰ ਸੱਚਮੁੱਚ ਇੱਕ ਯਾਦਗਾਰੀ ਅਤੇ ਪ੍ਰੇਰਣਾਦਾਇਕ ਸਮਾਗਮ ਸਾਬਤ ਹੋਇਆ।
ਇਸ ਮੌਕੇ ਅੰਤਰਰਾਸ਼ਟਰੀ ਸਰਬ ਸਾਂਝਾ ਸਾਹਿਤਕ ਮੰਚ (ਰਜਿ.) ਕੈਨੇਡਾ ਵੱਲੋਂ ਭਾਰਤੀ ਇਕਾਈ ਦੇ ਗਠਨ ਦਾ ਐਲਾਨ ਵੀ ਕੀਤਾ ਗਿਆ। ਭਾਰਤੀ ਇਕਾਈ ਦੀ ਪ੍ਰਧਾਨ ਡਾ. ਹਰਮੀਤ ਕੌਰ ਮੀਤ ਨੇ ਸਮੂਹ ਕਵੀਆਂ ਅਤੇ ਸਰੋਤਿਆਂ ਦਾ ਧੰਨਵਾਦ ਕੀਤਾ।
ਅੰਤ ਵਿੱਚ ਮੰਚ ਦੇ ਚੇਅਰਮੈਨ ਸ. ਦਲਜੀਤ ਸਿੰਘ ਗੈਦੂ ਨੇ ਸਾਰੇ ਸਾਹਿਤਕਾਰਾਂ ਅਤੇ ਪਤਵੰਤੇ ਸੱਜਣਾਂ ਦਾ ਆਪਣੀ ਕੀਮਤੀ ਵਿਅਸਤਤਾ ਵਿੱਚੋਂ ਸਮਾਂ ਕੱਢ ਕੇ ਸ਼ਮੂਲੀਅਤ ਕਰਨ ਲਈ ਤਹਿ ਦਿਲੋਂ ਧੰਨਵਾਦ ਕੀਤਾ ਅਤੇ ਉਨ੍ਹਾਂ ਨੂੰ ਬਣਦਾ ਮਾਣ-ਸਨਮਾਨ ਭੇਟ ਕੀਤਾ ਗਿਆ।
ਮੰਚ ਦੇ ਕੈਨੇਡਾ ਪ੍ਰਧਾਨ ਜਰਨੈਲ ਸਿੰਘ ਮਠਾੜੂ ਨੇ ਵੀ ਹਾਜ਼ਰ ਕਵੀਆਂ, ਲੇਖਕਾਂ, ਬੁੱਧੀਜੀਵੀਆਂ ਅਤੇ ਸਾਹਿਤਕਾਰਾਂ ਦਾ ਦਿਲੋਂ ਅਭਾਰ ਪ੍ਰਗਟ ਕਰਦਿਆਂ ਭਵਿੱਖ ਦੇ ਸਮਾਗਮਾਂ ਵਿੱਚ ਵੱਧ ਚੜ੍ਹ ਕੇ ਭਾਗ ਲੈਣ ਦੀ ਅਪੀਲ ਕੀਤੀ। ਭਾਰਤੀ ਇਕਾਈ ਦੇ ਸਮੂਹ ਅਹੁਦੇਦਾਰਾਂ ਦਾ ਵੀ ਉਚੇਚਾ ਧੰਨਵਾਦ ਕੀਤਾ ਗਿਆ।
ਇਹ ਸਮਾਗਮ ਮਾਂ ਬੋਲੀ ਪੰਜਾਬੀ ਪ੍ਰਤੀ ਪਿਆਰ, ਸਤਿਕਾਰ ਅਤੇ ਵਚਨਬੱਧਤਾ ਦਾ ਜੀਵੰਤ ਪ੍ਰਤੀਕ ਬਣ ਕੇ ਇਤਿਹਾਸਕ ਯਾਦਾਂ ਵਿੱਚ ਦਰਜ ਹੋ ਗਿਆ।