ငွေဆောင်ကမ်းခြေက ကိုသန်းဇော် Part (2)

Описание: ငွေဆောင်ဒေသခံ ကိုသန်းဇော်ဟာ မထင်မှတ်ဘဲ ကမ္ဘာကျော်သွားသူ တယောက်ပါ။ သူဟာ အွန်လိုင်းမှာ လူချစ်လူခင်များနေတာကို သူကိုယ်တိုင်တောင် အချိန်အတန်ကြာတဲ့အထိ မသိရှိခဲ့ပါဘူး။ ဖြစ်ပုံက ဒီလိုပါ။

ကမ္ဘာပတ်ပြီး ပေါက်ပေါက်ရှာရှာ ဗီဒီယိုတွေလုပ်ရင်းက နာမည်ကြီးလာတဲ့ Small Brained American အမည်ရ အမေရိကန် YouTuber နဲ့အတူ ငွေဆောင်တခွင် တပျော်ကြီးလှည့်ခဲ့ကြတဲ့ ဗီဒီယိုဟာ YouTube မှာ ကြည့်ရှုမှုကြိမ်ရေ ၁ ဒသမ ၂ သန်း ကျော်သွားပြီဖြစ်ပါတယ်။ ဒီဗီဒီယိုထဲမှာ သူဟာ အဓိကဇာတ်ဆောင်ဖြစ်နေခဲ့ပြီး သူ့ရဲ့ ဖြူစင်ရိုးသားမှုနဲ့ ပျော်ပျော်နေတတ်ပုံက ကြည့်ရှုသူတွေကို အပျော်ကူးစက်စေတာပါပဲ။ TikTok မှာလည်း မြန်မာစာတန်းထိုးနဲ့ ဗီဒီယိုအတိုလေးတွေဖြတ်ပြီး တင်ထားတာတွေရှိနေပါတယ်။

ဒီနိုင်ငံခြားသားဟာ သူ့အတွေ့အကြုံကို အမှတ်တရဗီဒီယို ရိုက်ကူးသွားတယ်လို့ပဲ ကိုသန်းဇော်က ထင်မှတ်နေခဲ့တာပါ။ နိုင်ငံခြားသားက ကမ်းခြေကိုအပန်းဖြေလာတယ်ဆိုတာထက် ဒေသခံတွေရဲ့ နေ့စဉ်ဘဝဖြတ်သန်းမှုကို ပိုပြီး သိရှိလိုဟန်တူပါတယ်။ ကိုသန်းဇော်တို့သောက်တဲ့ ၁၀၀/၂၀၀ ကျပ်တန် အရက်တွေလည်း မြည်းစမ်းကြည့်သွားခဲ့တာပါ။ ဒီခရီးစဉ်အတွေ့အကြုံကို သရုပ်မှန်ဟာသဇာတ်လမ်းတိုဆန်ဆန် မိနစ် ၃၀ ဝန်းကျင် ဗီဒီယို ၂ ခု YouTube မှာတင်ထားတာဖြစ်ပါတယ်။

ကိုသန်းဇော်ဟာ အတန်းပညာကို ၄ တန်းအထိသာသင်ကြားခဲ့ဖူးပေမယ့် ဝါသနာအရ အင်္ဂလိပ်စကားပြောကို သင်ယူခဲ့သူပါ။ ငွေဆောင်မှာ ကမ်းခြေဖော်ဆောင်ပြီးတဲ့နောက် ပေါ်ပေါက်လာတဲ့ စားသောက်ဆိုင်တွေမှာ လုပ်ကိုင်ခဲ့ဖူးပြီး နိုင်ငံခြားသားတွေနဲ့ ထိတွေ့ခွင့်ရလာခဲ့ပါတယ်။ တရုတ်ဘာသားစကားကိုလည်း ထမင်းစားရေသောက် ပြောတတ်ပါတယ်။ လက်ရှိမှာတော့ ဆိုင်ကယ်ကယ်ရီဆွဲတဲ့အလုပ်လုပ်ရင်း နေ့စဉ်ဘဝကို ပျော်ရွှင်စွာဖြတ်သန်းနေသူပါ။ ကိုသန်းဇော်ဟာ ရွာသားဆိုပေမယ့် ကင်မရာမကြောက်တတ်ဘဲ သူ့ဆီမှာ ပုန်းကွယ်နေတဲ့ ပင်ကိုယ် အရည်အသွေးတခုခုရှိနေတယ်လို့ ထင်မှတ်ရပါတယ်။

“ငွေဆောင်ကမ်းခြေရွာကလေးကနေ ကမ္ဘာကျော်သွားတဲ့ ကိုသန်းဇော်” အကြောင်း ဗီဒီယိုကို News Watch facebook စာမျက်နှာများမှာ မကြာခင် ဆက်လက်တင်တက်ပေးသွားပါမယ်။

Some footages from    / @smallbrainedamerican   are used as short inserts to make our narrative complete. Please support "Small Brained American" channel as well. Thank you.