សង្ខេបព័ត៌មានជាតិសំខាន់ៗ ប្រចាំថ្ងៃទី១១ ខែធ្នូ ឆ្នាំ២០២៥

Описание: ---
១. ជនស៊ីវិលខ្មែរស្លាប់កើនដល់១១នាក់ ក្នុងនោះមានទារកម្នាក់ ខណៈជនស៊ីវិលរបួស កើនដល់៧៤នាក់ គិតត្រឹមម៉ោង១២ថ្ងៃត្រង់ ថ្ងៃទី១១ ខែធ្នូនេះ។ នេះបើតាមលោកជំទាវ ម៉ាលី សុជាតា អ្នកនាំពាក្យក្រសួងការពារជាតិកម្ពុជា។ ទន្ទឹមនឹងនេះ ចំនួនជនភៀសសឹកសរុបកើនដល់ ៦៥, ៣១៤គ្រួសារ ស្មើនឹងមនុស្ស ២២៦, ៩៩៧នាក់។
ប្រភព៖ ក្រសួងការពារជាតិកម្ពុជា (https://t.me/RoyalGovernmentSpokesper...)

2. បន្ទាប់ពីទទួលរងការបាញ់បំផ្លាញយ៉ាងធ្ងន់ធ្ងរពីសំណាក់យោធាថៃ កាលពីថ្ងៃទី៩ ខែធ្នូ, ប្រាសាទតាក្របីដែលជាទីសក្ការៈរបស់កម្ពុជា គឺបន្តទទួលរងការបាញ់កម្ទេចជាថ្មីបណ្តាលឱ្យរូបរាង និងរចនាសម្ព័ន្ធប្រាសាទត្រូវបានបំផ្លាញទាំងស្រុង នាថ្ងៃទី១០ ខែធ្នូ ឆ្នាំ២០២៥។ នេះបើតាមសេចក្ដីថ្លែងការណ៍របស់ក្រសួងវប្បធម៌ និងវិចិត្រសិល្បៈ នាថ្ងៃទី១១ ខែធ្នូនេះ។ ក្រសួងវប្បធម៌ និងវិចិត្រសិល្ប: បានថ្កោលទោសយ៉ាងដាច់អហង្ការចំពោះទង្វើដ៏ឃោរឃៅរបស់យោធាថៃ ក្នុងការប្រមាថមាក់ងាយដល់វប្បធម៌ អរិយធម៌ និងជាទីសក្ការៈមរតកមនុស្សជាតិ។ ក្រសួងវប្បធម៌និងវិចិត្រសិល្បៈ បន្ដថា «ទោះជាប្រាសាទតាក្របីត្រូវបានបំផ្លាញស្ទើរអស់រូបរាងដោយស្នាដៃយ៉ាងសាហាវរបស់យោធាថៃ ប៉ុន្តែប្រាសាទនេះនៅតែឈរជានិមិត្តរូបនៃវប្បធម៌អរិយធម៌ខ្មែរ»។
ប្រភព៖ ក្រសួងវប្បធម៌និងវិចិត្រសិល្បៈ (  / 1cioike9sv  )

៣. ក្រសួងការពារជាតិកម្ពុជាបានទាត់ចោលចំពោះខ្លឹមសារដែលបានចុះផ្សាយដោយបណ្ដាញសារព័ត៌មានថៃ ដោយចោទប្រកាន់មកលើកម្ពុជា ថា បានប្រើទាហានស៊ីឈ្នួលបរទេសមកជួយបង្ហោះដ្រូនអត្តឃាត ក្នុងជម្លោះព្រំដែនកម្ពុជា-ថៃ។ ក្រសួងការពារជាតិ បានអះអាងនៅថ្ងៃព្រហស្បតិ៍នេះ ថា ការផ្សព្វផ្សាយរបស់សារព័ត៌មាន Amarin News គឺជាព័ត៌មានភូតកុហុក និងជាព័ត៌មានប្រឌិត ក្លែងក្លាយ និងលាបពណ៌មកលើកម្ពុជាតែប៉ុណ្ណោះ។ ជាមួយគ្នានេះ ក្រសួងការពារជាតិកម្ពុជាទាមទារឱ្យ ភាគីថៃបញ្ឈប់រាល់ការផ្សព្វផ្សាយព័ត៌មានមិនពិតដោយចេតនា ក្នុងគោលដៅបង្វែរការចាប់អារម្មណ៍អំពីការរំលោភបំពានច្បាប់អន្តរជាតិរបស់ខ្លួនដោយលាបពណ៌កម្ពុជា ដើម្បីយកលេសប្រើប្រាស់អាវុធកាន់តែសាហាវមកលើកម្ពុជា។
ប្រភព៖ ក្រសួងការពារជាតិ (https://t.me/modgovkhm/4345)

៤. លោក ឌឿក វណ្ណរិទ្ធិ អគ្គទីប្រឹក្សាអមស្ថានតំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានលើកឡើងពីការវាយប្រហាររបស់យោធាថៃមកលើកម្ពុជា ប្រាប់ទៅកាន់មហាសន្និបាតអង្គការសហប្រជាជាតិ កាលពីថ្ងៃទី១០ ខែធ្នូនេះ។ អគ្គទីប្រឹក្សាអមស្ថានតំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានលើកឡើងពីសកម្មភាពឈ្លានពានរបស់យោធាថៃ ដោយរួមមាន ការប្រើប្រាស់អាវុធធុនធ្ងន់គ្រប់ប្រភេទ និងការទម្លាក់គ្រាប់បែក មានទាំងការបាញ់ផ្សែងពុល ដោយមិនរើសទីតាំងលើទឹកដីកម្ពុជា។ តំណាងកម្ពុជា អំពាវនាវឱ្យថៃត្រូវអនុវត្តឡើងវិញនូវសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពទីក្រុងគូឡាឡាំពួ។
ប្រភព៖ កម្ពុជាថ្មី (https://www.kampucheathmey.com/local-...)

៥. «នៅពេលដែលប្រជាជាតិមួយមិនអាចដណ្តើមយកទឹកដីរបស់អ្នកបាន វានឹងបំផ្លាញព្រលឹងរបស់អ្នក!» នេះជាការលើកឡើងរបស់ ឯកឧត្ដម ទេសរដ្ឋមន្រ្ដី លី ធុជ អនុប្រធានទី១ អាជ្ញាធរមីន នៅថ្ងៃទី១១ ខែធ្នូនេះ។ ឯកឧត្ដម បន្ដថា «អ្វីដែលយោធាថៃបានធ្វើចំពោះប្រាសាទតាក្របីមិនមែនជាឧបទ្ទវហេតុនៃសង្គ្រាមនោះទេ។ វាជាការបំផ្លាញដោយចេតនានៃអត្តសញ្ញាណរបស់កម្ពុជា»។ អនុប្រធានទី១ អាជ្ញាធរមីន បន្ដថា កម្ពុជាតែងតែបើកទ្វារសម្រាប់ការស៊ើបអង្កេតរួមគ្នា អព្យាក្រឹតភាព និងសច្ចភាព តែប្រទេសថៃបានឆ្លើយតបទៅនឹងភាពបើកចំហនោះដោយកាំភ្លើងធំ។
ប្រភព៖ ឯកឧត្ដម លី ធុជ (  / 1mfn9ybrru  )

Facebook:   / preah.khan.khmer  
Telegram: https://t.me/preah_khan
TikTok:   / preah_khan