လေးကေ့ကော်ဒေသကို တော်လှန်ရေးတပ်တွေဘယ်လိုခုခံနေလဲ | People's Spring

Описание: လေးကေ့ကော်ဒေသကို တော်လှန်ရေးတပ်တွေဘယ်လိုခုခံနေလဲ

နေ့သစ်/People's Spring

ကရင်ပြည်နယ် ၊ လေးကေ့ကော်ဒေသ တိုက်ပွဲတွေနဲ့ ပတ်သက်ပြီး အခုတစ်ပါတ်ပြောပြပါမယ်။

စစ်တပ်က ကော့ကရိတ်-မြဝတီ အာရှအဝေးပြေးလမ်းမ ၊ သက်န်းညီနောင် ဗျူဟာ ၊လက်ခတ်တောင်တာဝါတိုင်စခန်းကုန်း စတာတွေကို ပြန်လည်ထိန်းချုပ်နိုင်ခဲ့ပြီးနောက် လေးကေ့ကော်ဒေသကို စက်တင်ဘာလ ၂၃ ရက်မှာ စတင်းထိုးစစ်ဆင်ခဲ့ပါတယ် ။

KNLA ၊ PDF နဲ့ မဟာမိတ်တပ်တွေက လေးကေ့ကော်မြို့သစ်ကို ၂၀၂၄ အောက်တိုဘာ ၁၇ ရက်မှာ အပြီးသတ်သိမ်းပိုက်နိုင်ခဲ့တာဖြစ်ပါတယ် ။ လေးကေ့ကော်မြို့သစ်မှာ စစ်တပ်ရဲ့နောက်ဆုံးကျန်တဲ့ စွယ်တော်ကုန်းကို တော်လှန်ရေးတပ်တွေက ၂၀၂၄ အောက်တိုဘာ ၁၇ မှာ အပြီးသတ်သိမ်းပိုက်ပြီး ထိန်းချုပ်နိုင်ခဲ့တာဖြစ်ပါတယ် ။

ဦးသိန်းစိန် အစိုးရလက်ထက် ၂၀၁၅ ခုနှစ်မှာ ငြိမ်းချမ်းရေးမြို့သစ်အဖြစ် နီပွန်ဖောင်ဒေးရှင်းအကူအညီနဲ့ အကောင်အထည်ဖော်ခဲ့တာဖြစ်ပါတယ် ။ အိမ်ခြေ ၆၀၀ ကျော်ရှိပါတယ် ။ မြို့သစ်လုံခြုံရေးကို KNU/KNLA တပ်မဟာ (၆)ကတာဝန်ယူခဲ့တာပါ။ စစ်တပ် အာဏာသိမ်းပြီးနောက်မှာ ငြိမ်းချမ်းစွာဆန္ဒပြတဲ့ ပြည်သူတွေကို ပစ်ခတ်သတ်ဖြတ်တဲ့ စစ်တပ်ကို တော်လှန်ဖို့ တော်လှန်ရေးစိုးမိုးရာဒေသကိုထွက်လာတဲ့ လူငယ်တွေ ၊ နိုင်ငံရေးသမားတွေ ၊ CDM ဝန်ထမ်းတွေ ၊အာဏာသိမ်းမှုကို ဆန့်ကျင်တဲ့ သူတွေ လေးကေ့ကော်မြို့သစ်မှာ လာရောက်ခိုလှုံကြပါတယ် ။

အာဏာသိမ်းစစ်တပ်က လေးကေ့ကော်မြို့သစ် မှာခိုလှုံနေတဲ့ လွတ်တော်အမတ်တွေ ၊ CDM ဝန်ထမ်းတွေ ၊စစ်တပ်ဆန့်ကျင်သူတွေကို ၂၀၂၁ ဒီဇင်ဘာလမှာ လာရောက်စီးနင်းဖမ်းဆီးတာကြောင့် KNLA ဦးဆောင်တဲ့တော်လှန်ရေးတပ်တွေနဲ့ စစ်တပ်တို့ တိုက်ပွဲတွေဖြစ်ပွားခဲ့ပါတယ်။

အဲဒီ ဒေသတိုက်ပွဲတွေကတော့ နာမည်ကျော်စစ်ကြောင်းမှူးနဲ့ စစ်ကြောင်း ဖြစ်လာတဲ့ KNLA နဲ့စစ်တပ်ကိုတော်လှန်လိုတဲ့ PDF တွေပူးပေါင်းထားတဲ့ ကော်ဘရာစစ်ကြောင်း နဲ့ ဗိုလ်ဒါဘောတို့ ပေါ်ထွက်လာခဲ့တာဖြစ်ပါတယ် ။

တိုက်ပွဲတွေ ဖြစ်ပွားပြီး စစ်တပ်က လေးကေ့ကော်ဒေသမှာ တပ်စွဲပြီး ထိန်းချုပ်ထားခဲ့ပါတယ် ။ ဒါပေမယ့် KNLA နဲ့ ပူးပေါင်းတပ်တွေက ၂၀၂၄ မတ်လ ဆန်းမှ စတဲ့ ထိုးစစ်မှာစစ်တပ်စခန်းအများအပြားကို ဆက်တိုက်သိမ်းခဲ့သလို ၂၀၂၄ ခုနှစ်အောက်တိုဘာလ ၁၇ ရက်မှာ KNLA ၊ PDF နဲ့ပူးပေါင်းတပ်တွေကစစ်တပ်စခန်းတွေကို ထိုးစစ်ဆင်ပြီး လေးလေးကေ့ကော်ပြန်သိမ်းပိုက်ထိန်းချုပ်နိုင်ခဲ့တာ ဖြစ်ပါတယ် ။

ဒါပေမယ့် တစ်နှစ်ခန့်အကြာမှာ စစ်တပ်က DKBA ဗိုလ်ဘိ ရဲခွဲထွက်အဖွဲ့အကူအညီ နဲ့ ကော့ကရိတ်-မြဝတီလမ်းကို ပြန်ထိန်းချုပ်နိုင်ခဲ့သလို သက်န်းညီနောင် ဗျူဟာ ၊လက်ခတ်တောင်တာဝါတိုင်စခန်းကုန်း စတာတွေကို ထိန်းချုပ်ပြီးနောက်မှာ လေးကေ့ကော်ဒေသကို စက်တင်ဘာ ၂၃ ကစပြီး တန်ပြန်ထိုးစစ်ဆင်လာပါတယ် ။

စစ်တပ်က လေးကေ့ကော်ဒေသကို ၂၀၂၅ စက်တင်ဘာ၂၃ရက်ကစပြီးတပ်မ(၂၂)လက်အောက်ခံ တပ်ရင်းတွေကို သုံးရင်းတစ်ဗျူဟာဖွဲ့ပြီး ဗျူဟာ ၃ ခုနဲ့ ခွဲပြီး စစ်ကြောင်းထိုးတိုက်ခိုက်နေတာပါ။ ဗျူဟာ (၂၂၁) ၊ ဗျူဟာ(၂၂၂)၊ ဗျူဟာ(၂၂၃) ဆိုတဲ့ သုံးဗျူဟာနဲ့ တစ်ဗျူဟာ အင်အား ၄၀၀ ကျော်နဲ့ စုစုပေါင်း အင်အား ၁၂၀၀နဲ့ စစ်ကြောင်းထိုးလာတာလို့ တပ်မဟာ ၆ က တော်လှန်ရေးတပ်ရင်းတွေကို ပူးပေါင်းထားတဲ့ ၃၂ ဗျူဟာ ရဲ့ ပူးပေါင်းစစ်ဆင်ရေးမှူး ဗိုလ်မှူးသူရစောဒါဘောက လူထုနွေဦးကို ပြောကြားပါတယ်။

"တပ်မ တစ်ခု တပ်ရင်း ၁၀ရင်းနဲ့ စစ်မြေပြင်မှာတော့ တပ်ရင်း ကိုးရင်း ဗျူဟာ သုံးဗျူဟာနဲ့ ထိုးစစ်ဆင်နေတယ်။ တစ်ဗျူဟာကတော့ တောင်ရှည် ၊ကျောက်ဂူဘက်က ထိုးစစ်ဆင်တယ်။ တစ်ဗျူဟာက လေးကေ့ကော်ထဲကို ထိုးစစ်ဆင်တယ်။ တစ်‌ဗျူဟာကတော့ ထီမယ်ဝါးခီး ဘက်ကနေ ထိုးစစ်ဆင်တယ်"လို့ပူးပေါင်းစစ်ဆင်ရေးမှူးက People's Spring ကို ပြောပါတယ် ။

KNU) /KNLA အောက်က ဗျူဟာအမှတ် (၃၂) ဆိုတာ ကော်ဘရာစစ်ကြောင်း ၊ကျားသစ်နက်စစ်ကြောင်း ဗွီနွန်စစ်ကြောင်း ၊ Justice Solider စတဲ့မဟာမိတ် စစ်ကြောင်းတွေပူးပေါင်းထားတာဖြစ်ပါတယ် ။

တစ်လတာအတွင်း တိုက်ပွဲပေါင်း ၄၅ ကြိမ်ခန့်ဖြစ်ခဲ့ပါတယ် ။ နေ့စဉ်ရက်ဆက်တိုက်ပွဲတွေဖြစ်ခဲ့ပြီး တချို့နေ့တွေမှာ တစ်ရက်တည်း တိုက်ပွဲ ၃ ၊ ၄ ကြိမ်ဖြစ်ပါတယ် ။ ယခုရက်ပိုင်းတိုက်ပွဲတွေမှာလည်း စစ်တပ်အထိနာပြီး ဖရိုဖရဲဖြစ်နေတယ်လို့လည်း ဗိုလ်မှူးက ဆိုပါတယ်။

"လေးကေ့ကော်တိုက်ပွဲက ၂၃ ရက်ကစတာ၊ အခုဆိုရင် တစ်လပေါ့။ တစ်လအတွင်းထဲမှာ ရန်သူအမြောက်အမြား ထိခိုက်သေဆုံးမှုတွေရှိတယ်။ တစ်လအတွင်းမှာ လက်နက်နဲ့လေးဦးအလင်းဝင်လာတယ်။ မြေပြင်မှာ သိမ်းဆည်းရမိတဲ့ လက်နက်က ၅ လက်။ ဖမ်းဆီးရမိ တစ်ဦး။ ဗျူဟာသုံးဗျူဟာနဲ့ထိုးစစ်ဆင်လာတယ်။ ၅၀၀တော့မရှိဘူး။ စလာကတည်းက ၁၂၀၀ ဆိုတော့ တစ်ဗျူဟာကို အင်အား ၄၀၀ လောက်ပေါ့။ အခုဆိုရင် သူတို့ဖွဲ့စည်းပုံတော်တော်လေးကို ဖရိုဖရဲဖြစ်နေပြီ။ အခုဆို တစ်ဗျူဟာသုံးရာလောက်ပဲကျန်တော့တယ်"လို့ ဗိုလ်မှူးသူရစောဒါဘောက ပြောပါတယ်။

စက်တင်ဘာ ၂၃ရက်ကစတဲ့ လေးကေ့ကော်ဒေသတိုက်ပွဲ တစ်လအတွင်းမှာ စစ်ကောင်စီတပ်က ဒုတပ်ရင်းမှူးတစ်ဦးအပါအဝင် ၁၅၀ လောက် သေဆုံးပြီး ၂၀၀ကျော် ဒဏ်ရာရတယ်လို့လည်း ဗိုလ်မှူးက ဆက်ပြောပါတယ်။

"သေဆုံးတာက အတည်ပြုလို့ရတာ မြေပြင်မှာကတော့ ၁၅၀လောက်ရှိတယ်။ ထိခိုက်ဒဏ်ရာရတာက ၂၀၀ လောက်ရှိတယ်။သေဆုံးတဲ့အထဲမှာ ရာထူးအမြင့်ဆုံးက ဒုရင်းမှူး တစ်ယောက်ပါတယ်"လို့ ပြောပါတယ်။

လေးကေ့ကော်ဒေသတိုက်ပွဲ တစ်လအတွင်းမှာ စစ်ကောင်စီတပ်က လက်နက်နဲ့ လေးဦးအလင်းဝင်လာပြီး မြေပြင်မှာ သိမ်းဆည်းရမိတာက လက်နက် ၅လက်နဲ့ စစ်သား တစ်ဦး ဖမ်းဆီးရမိတယ်လို့လည်း ဆိုပါတယ်။

KNU က စစ်တပ်ရဲ့ ကျားဖြန့်နဲ့ပတ်သက်ပြီးစွပ်စွဲချက်တွေအပေါ် မကြာခင်တရားဝင်တုံ့ပြန်ဖြေရှင်းဖွယ်ရှိပါတယ် ။တိုက်ပွဲတွေကြောင့် ထွက်ပြေးနေရတဲ့ ဒေသခံပြည်သူတွေဟာလည်း လောလောဆယ်ကျားဖြန့်ရုံတွေကထွက်ပြေးသူတွေ လောက်အများရဲ့အာရုံစိုက်မှု မရသေးပါဘူး။

စစ်တပ်ရဲ့ ကျားဖြန့်နှိမ်နင်းရေး ဟန်ပြလုပ်ရပ်တွေကြားမှာ လေးကေ့ကော်ဒေသမှာ စစ်ရေးအခြေအနေတွေဘယ်လိုဆက်ဖြစ်လာမလဲ ဆိုတာကတော့ဆက်လက်စောင့်ကြည့်ကြရမှာဖြစ်ပါတယ် ။ ။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring