7.8 % տնտեսական աճ

Описание: 7,8 տոկոս տնտեսական աճ 2012թ. առաջին կիսամյակում: ՀՀ էկոնոմիկայի նախարար Տիգրան Դավթյանն այսօր ներկայացրեց 2012թ. առաջին կիսամյակի ամփոփ տվյալները. «Տնտեսությունը ցույց է տալիս բավականին դրական զարգացումներ, տեղի են ունենում կառուցվածքային փոփոխություններ տնտեսության մեջ, եւ այդ փոփոխությունները կգնահատեի դրական եւ ընդհանուր առմամբ նկատվում է տնտեսական ակտիվություն»:

Նախարարը հույս հայտնեց, որ այս դինամիկան կպահպանվի մինչեւ տարեվերջ: Նա նաեւ վստահեցրեց, թե առաջիկայում նոր ձեռնարկություններ կգործարկվեն. «Մենք վերականգնում ենք մեր տնտեսությունը, մեր արդյունաբերական պոտենցիալը, բայց սկզբունքորեն նոր, ժամանակակից հենքի վրա»:

Թե որոնք են այդ ձեռնարկությունները, Տիգրան Դավթյանը չմանրամասնեց, այլ միայն նշեց, որ այս նպատակով նախարարությունը մոնիթորինգ է իրականացնում շուրջ 200 ձեռնարկությունում, իսկ 60 ձեռնարկության էլ տարբեր աջակցություններ է տրամադրելու. «Դա եւ հարկային որոշակի ռեժիմների տրամադրումն է, դա առանձնահատուկ մաքսային ռեժիմների տրամադրումն է, դա անմիջական վարկավորման մեխանիզմներն են, որոնք մենք նախատեսել ենք այդ ոլորտների համար»:

Բոլոր այս ծրագրերում նախարարությունը նախապատվություն է տալիս այն մեթոդներին, որոնք իրականացվում են պետություն-մասնավոր հատված-միջազգային կազմակերպություններ համատեղ գործողությունների շրջանակներում: Ի դեպ, ինչ վերաբերում է ՓՄՁ ոլորտին, ապա նախարար Դավթյանը հպարտորեն հայտարարեց, որ բավարարվել է 4400 ընկերության հայտ, որոնցից 93 տոկոսը մարզային ձեռնարկություններ կլինեն, եւ միայն 7 տոկոսը` երեւանյան: Այս ընկերություններից 21-ն արդեն վարկավորվել են 1,3 մլրդ դրամով: