كلمات : نايف ابالعون اداء : فهد بن فصلا و شبل الدواسر

Описание: قريحة الشعر ماموره ومنهيه
وحنا على الدرب نجلس ونتحراها

لوكان للشعر والشعار جنيه
كان ارسلوها عليها لين تلقاها

الشعر يمكن يجيبه صوت قمريه
والا خلوج تلفت دون مفلاها

والا هوى خفرة بأوصاف حورية
لامرت اهل القلوب الخضر تشعاها

والا مدح طيبٍ يمناه ديميه
لوهو بكيفه قطع يمناه واعطاها

بعض القصايد تقل فنجال بريه
تجلى خوى الراس يوم انك تقهواها

وبعض القصايد تقل بطناج مسحيه
ودك تخلص على طول وتعداها

وبعض القصايد كثر ماهي بملويه
تتعبك حتى القرايه وانت تقراها

وبعض القصايدجفول وصيد محميه
ماكل واحد معه تصريح يقواها

ترتع بخبت مناويعه طبيعيه
غير المطر والهواء الذعذاع ماجاها

جروم رمثه على الجيلان مبريه
يطرق ثراها بسيله لين عراها

حتى غدا الجال والجرمة على طيه
بندق شجيع على مركاه راكاها

ماهي من اللي من الشعارمرمية
ترفع عن الرمي يسراها ويمناها

وبعض القصايد على وزنه وقافيه
تبدأ وتقضي ولاادري وين معناها

وبعض القصايد تقل كبسة عزوبيه
اما نقص ملحها والا نقص ماها

وانا نقيت البيوت وجبت منقيه
تعجب راع الذوق والعدوان تفحاها

قريحتي دون واجب حرب نشميه
تكحل هدب عينها وتحط حناها

عيد ونشاما وحفلة غير عادية
مافيه احد من رجال الطيب ماجاها

الا الذي تمنعه حاجة ضرورية
الناس تقوى الضروف ونوب تقواها

سقنا التراحيب مربوعة ومثنيه
باسم القبيلة على الحضار نقداها

يامرحبا كثر ماالسحب الركامية
هلت على وجه الأرض وسالت ارجاها

في كل عام لقبيلة حرب ماريه
في صفحة المجد والتاريخ تلقاها

ابراج الأمجاد للأجيال مبنيه
لين شلعت للسحاب وطال مبناها

في سادس العيد سوو حرب عيديه
للشاعر اللي على الساحة تبناها

اللي يمثل قبيلة حرب بالهية
بين الجموع المغيره ويتحداها

من حول عشرين عام وزود هجريه
بسط نفوذه على الساحة ورقاها

رحل من رموزها تسعين بالمية
حتى طلع معتق الحربي وواساها

فزع لها فزعة الحربي لحربية
لاطنبت بالصياح وطاح مغطاها

قام يتعزوى على ضهر الصويتيه
واضفى عليها عباته لين غطاها

قال استريحي وانا معتق عن السية
انا زعيم الديار وحامي حماها

شعر ورجوله وقوة باس وحميه
كل الصفات الكريمة قام يقناها

ماجته الامداح والتمجيد عاريه
يمشي عليها العياضي ويتنقاها

يستاهل انه يكرم كل حوليه
الشاعر اللي عن الباقين كفاها

واجمل تحيه لحكام السعوديه
اللي بالأعمار والأموال نفداها