ថ្ងៃទី២៥ កញ្ញា៖ ជីវិតដែលពឹងផ្អែកទៅលើព្រះបន្ទូលព្រះ

Описание: ថ្ងៃទី២៥ កញ្ញា៖ ជីវិតដែលពឹងផ្អែកទៅលើព្រះបន្ទូលព្រះ
-----------------------------------------------------------
នោះលោកក៏មានប្រសាសន៍ថា “ចូរយកចិត្តទុកដាក់នឹងពាក្យទាំងអស់ដែលអញបានប្រាប់ដល់ឯងរាល់គ្នានៅថ្ងៃនេះចុះ ដើម្បីនឹងបង្គាប់ដល់កូនចៅឯងរាល់គ្នា ឲ្យប្រយ័ត្ននឹងប្រព្រឹត្តតាមដែរ គឺជាអស់ទាំងពាក្យក្នុងក្រឹត្យវិន័យនេះ នេះមិនមែនជាសេចក្តីឥតប្រយោជន៍ដល់ឯងរាល់គ្នាទេ គឺជាជីវិតដល់ឯងរាល់គ្នាវិញ ហើយដោយសារសេចក្តីនេះ នោះឯងរាល់គ្នានឹងបានជីវិតជាយូរអង្វែងតទៅ នៅក្នុងស្រុកដែលឯងរាល់គ្នា នឹងឆ្លងទន្លេយ័រដាន់ចូលទៅចាប់យកនោះ”។ (ចោទិយកថា ៣២:៤៦-៤៧)
ព្រះបន្ទូលព្រះមិនមែនជាពាក្យមានតម្លៃតិចតួចនោះឡើយ តែព្រះបន្ទូលព្រះអង្គមានសារៈសំខាន់យ៉ាងខ្លាំង ចំពោះការស្លាប់រស់របស់យើង។ បើអ្នកចាត់ទុកព្រះគម្ពីរជាពាក្យមិនសូវសំខាន់ ឬពាក្យទទេ នោះមានន័យថា អ្នកបានបោះបង់ចោលជីវិតខ្លួនឯងហើយ។
សូម្បីតែជីវិតខាងសាច់ឈាមរបស់យើងក៏ពឹងផ្អែកទៅលើព្រះបន្ទូលព្រះអង្គ ព្រោះព្រះអង្គបានបង្កើតយើងមក ដោយប្រើព្រះបន្ទូលព្រះអង្គ(ទំនុកដំកើង ៣៣:៦ ហេព្រើរ ១១:៣) ហើយ “ព្រះអង្គទ្រទ្រង់ចក្រវាល ឲ្យមានដំណើរទៅមុខទៀត ដោយព្រះបន្ទូលនៃព្រះចេស្តារបស់ព្រះអង្គ”(ហេព្រើរ ១:៣)។
ហើយជីវិតខាងវិញ្ញាណរបស់យើងក៏ចាប់ផ្តើម ដោយព្រះបន្ទូលព្រះអង្គ គឺដូចមានសេចក្តីចែងថា “ទ្រង់បានបង្កើតយើងរាល់គ្នាមកតាមព្រះហឫទ័យទ្រង់ ដោយសារព្រះបន្ទូលដ៏ពិត”(យ៉ាកុប ១:១៨)។ “ដ្បិតព្រះបានបង្កើតអ្នករាល់គ្នាជាថ្មី មិនមែនពីពូជដែលតែងតែពុករលួយនោះទេ គឺពីពូជដែលមិនចេះពុករលួយវិញ គឺជាព្រះបន្ទូលដ៏រស់ ហើយនៅជាប់លាប់”(១ពេត្រុស ១:២៣)។
យើងមិនគ្រាន់តែចាប់ផ្តើមរស់នៅ ដោយព្រះបន្ទូលព្រះប៉ុណ្ណោះទេ តែយើងក៏បន្តរស់នៅ ដោយព្រះបន្ទូលព្រះអង្គផងដែរ គឺដូចមានសេចក្តីចែងថា “«មនុស្សមិនមែនរស់ ដោយសារតែនំបុ័ងប៉ុណ្ណោះទេ គឺរស់ដោយសារគ្រប់ទាំងព្រះបន្ទូល ដែលចេញពីព្រះឱស្ឋព្រះមកដែរ»(ចោទិយកថា ៤:៤ ចោទិយកថា ៨:៣)។
ជីវិតខាងរូបកាយរបស់យើង ត្រូវបានបង្កើតមក និងទ្រទ្រង់ ដោយព្រះបន្ទូលព្រះ ហើយជីវិតខាងវិញ្ញាណយើង ក៏បានទទួលការជំរុញ និងទ្រទ្រង់ដោយព្រះបន្ទូលព្រះផងដែរ។ តើគេអាចប្រមូលផ្តុំរឿងច្រើនប៉ុណ្ណា ដើម្បីធ្វើបន្ទាល់ អំពីព្រះចេស្តានៃព្រះបន្ទូលព្រះ ដែលប្រទានជីវិត។
ជាការពិតណាស់ ព្រះគម្ពីរមិនមែនជា “ពាក្យទទេ” សម្រាប់អ្នក តែព្រះគម្ពីរជាជីវិតរបស់អ្នក! ជីវិតគឺជាមូលដ្ឋានគ្រឹះនៃក្តីអំណរគ្រប់យ៉ាង។ គ្មានអ្វីដែលមានលក្ខណៈមូលដ្ឋានជាងជីវិត និងការរក្សាជីវិតរបស់យើង ឲ្យមានវត្តមាន ក្នុងចក្រវាលនេះទេ។
ទាំងអស់នេះគឺសុទ្ធតែដោយសារព្រះចេស្ដានៃព្រះបន្ទូលព្រះ។ ព្រះអង្គបានមានបន្ទូលក្នុងព្រះគម្ពីរ ដើម្បីបង្កើត និងទ្រទ្រង់ជីវិតខាងវិញ្ញាណយើង ដោយព្រះចេស្ដានេះ។ ដូចនេះ ព្រះគម្ពីរមិនមែនជាពាក្យទទេ តែជាជីវិតរបស់អ្នក ជាមូលដ្ឋានគ្រឹះ និងប្រភពនៃក្តីអំណររបស់អ្នក។
#Plovpit
#ផ្លូវពិត
#DirsiringGod
#JohnPiper
#សៀវភៅគ្រីស្ទាន
#SolidJoys