М. Алтынбаев аймақтағы жұмыстарға оң бағасын берді

Описание: #qyzylordatv
Облыс әкімінің орынбасары Мейрамбек Шермағанбет «Халық қаһарманы», армия генералы Мұхтар Алтынбаевпен бірге қаладағы нысандарды аралап, жұмысымен таныстырды.

Мұхтар Алтынбаев алдымен «Қорқыт ата» халықаралық әуежайымен, мұнан кейін Өнер орталығының жұмысымен танысты. Мың орынға арналған көпфункционалды орталық 2024 жылы ашылған. Мұнда симфониялық, эстрадалық және ұлттық өнер бағытындағы концерттік бағдарламалар, түрлі форматтағы қоғамдық іс-шаралар өткізіледі.
Ал балалар мен жасөспірімдерге арналған «Сыр жұлдыздары» шығармашылық-инновациялық академиясы бір мезетте 500, тәулігіне 3 мың оқушыға дейін қабылдайды. Академия қызметі өңір жастарының зияткерлік және шығармашылық әлеуетін дамытуға айтарлықтай үлес қосып келеді.
Мұхтар Қапашұлы, сондай-ақ «Анаға тағзым» орталығында болды. Орталық жұмысы аналардың киелі жолын дәріптей отырып, жас ұрпаққа рухани-адамгершілік тәрбие беруге, отбасы құндылықтарын нығайтуға, салт дәстүр мен төл мәдениетті бойына сіңірген қазақ аруының бейнесін қалыптастыру жұмыстарына үлес қосуға бағытталған. Орталық ашылғалы 2000-нан аса түрлі форматтағы іс-шара өткізіліп, 60 мыңға жуық адамға қызмет көрсетілді.
Ал «Отбасы» орталығының мақсаты – отау құруға ниеттенген жастарға әлеуметтік, рухани қолдау көрсету, өскелең буынға өнегелі отбасылардың өмір жолын үлгі ету, отбасын жоспарлауға қолдау көрсету. Орталықта туу туралы куәлік, неке куәлігі, зейнетақы кітапшалары салтанатты түрде беріледі және алтын той, күміс той, маржан той секілді отбасылық рәсімдер өткізіледі.
Сапар барысында Мұхтар Алтынбаев Сыр өңірінде нәтижелі жұмыстар жүргізіліп жатқанын атап өтіп, алдағы бастамалардың да табысты болуына тілектестігін білдірді.

Сайт - https://qyzylordatv.kz/ru/live
Facebook -   / qyzylordatv  
Instagram -   / qyzylordatv  
Telegram - https://t.me/qyzylorda_tv
Tiktok -   / qyzylorda_tv