ធម្មទេសនាបង្រៀនបែបសមាធិដោយ ព្រះឥន្ទកោសល្យ មុំ សុខគឿន ១៨ ខែធ្នូ ឆ្នាំ២០២១

Описание: មេរៀនសមាធិ (សង្ខេប)
១/ ហេតុអ្វីបានជាយើងគួរធ្វើការសមាធិ?
ការធ្វើសមាធិ គឺពិតជាចាំបាច់ណាស់ដែលមនុស្សជាទូទៅត្រូវតែមានដើម្បីហ្វឹកហាត់ចិត្តឱ្យបានល្អ។ (រៀងរាល់ថ្ងៃយ៉ាងចាំបាច់)
២/ និមយន័យសមាធិ (អត្ថន័យសមាធិ)
សមាធិគឺដំណើរតាំងស៊ុបមាំដោយចិត្ត, ការចុះចិត្តស៊ុប ឬស្លុងចិត្តក្នុងគន្លងអារម្មណ៍ជាកុសលតែមួយ ។
ជាការតម្កល់ចិត្តឬ ធ្វើឱ្យចិត្ដស្ងប់ ឬតម្កល់ចិត្តឱ្យស្ងប់ តាមផ្លូវកាយ-វាចា-ចិត្ត ។
ការសមាធិបែបសកលជាលក្ខណៈងាយៗដែលអាចជួយរម្ងាប់ សេចក្ដីក្រោធ
និងតម្រង់ផ្លូវមករកការគិត និងប្រព្រឹត្ដឱ្យបានត្រឹមត្រូវ ឬផ្លូវវិជ្ជមាន ។
ការអភិវឌ្ឍផ្លូវចិត្ត ឬផ្នត់គំនិត ឬ ការតម្កល់ចិត្តអោយនឺង ការធ្វើចិត្តអោយត្រជាក់ ការធ្វើចិត្តស្ងប់ និងត្រូវបានចែកចេញជាពីរគឺ សមថកម្មដ្ឋាន និង វិប្បសនាកម្មដ្ឋាន ដែលសមថកម្មដ្ឋានគឺជាការហ្វឹកហាត់ចិត្តឲ្យស្ងប់ បង្កើនសន្តិភាពជាមួយខ្លួនឯង (របៀបគ្រប់គ្រងកំហឹង ឬចិត្ត) និងវិប្បសនាកម្មដ្ឋានគឺជាការរៀនដើម្បីបង្កើនបញ្ញាស្មារតី ពោលគឺ ដើម្បីកាត់ផ្តាច់នូវសេចក្តីទុក្ខ (ទោសៈ មោហៈ)។
៣/ សមាធិជាអ្វី?
សមាធិ គឺជាការតម្កល់ចិត្ដឱ្យស្ថិតនៅក្នុងអារម្មណ៍កំពុងរំពឹងចិត្តស្ងប់ក្នុងឈាន
ហៅថា ឧបចារសមាធិ ដែលជិតនឹងបានចុះស្លុងស៊ប់ក្នុងឈនជាដើម។
ដើម្បីឱ្យបានសេចក្ដីសុខស្ងប់ដោយវៀរចាកសេចក្ដីត្រេកត្រអាលដោយកាមច្ឆន្ទៈមានរូបជាដើមលះបង់វាចេញទើបនាំឱ្យមានសេចក្ដីសុខកាយ ត្រជាក់ចិត្ដ។
-ជួយថែរក្សាសុខភាពផ្លូវកាយ ផ្លូវចិត្ត នឹងជួយព្យាបាលរោគឱ្យបានធូរស្រាល ។
៤/ របៀបធ្វើសមាធិ
ឥរិយាបថអង្គុយ នោះយើងអង្គុយពែនភ្នែន ជើងស្តាំដាក់លើជើងឆ្វេង ដៃស្តាំដាក់លើដៃឆ្វេង ដងខ្លួនត្រង់ធម្មតាដោយអត់ប្រឹង ក ត្រង់ មុខឱនចុះបន្តិច ហើយបិទភ្នែក។
ការធ្វើសមាធិគប្បីធ្វើនៅទីកន្លែងដែល ស្ងប់ស្ងាត់ ធំទូលាយ មានខ្យល់អាកាស និងបរិយាកាសល្អ មិនមានការរំខានផ្សេងៗ។
គប្បីផ្ដាច់ចេញឱ្យអស់នូវការគិតខ្វល់ខ្វាយ និង កង្វល់ផ្សេងៗដែលនាំឱ្យចិត្ដកម្រើក ដើម្បីការពារកុំឱ្យមានក្ដីអន្ដរាយដល់គុណធម៌របស់ខ្លួន មុននឹងចូលទៅធ្វើការចម្រើនកម្មដ្ឋាន (កុំគិតរបស់ខាងក្រៅ ) ។
ពេលធ្វើសមាធិ មិនកម្រើក មិននិយាយអ្វីទាំងអស់ មិនមើលមុខគ្នា ឱនមុខចុះបន្ដិច ព្យាយាមមិនគិតអ្វីក្រៅពីកម្មដ្ឋានឡើយ ។
បើចិត្ដមានការកម្រើក គឺមិនមានការស្ងប់ទេ (រូប,សំឡេង ,ក្លិន,រស,សម្ផស្ស)។
៥/ ផលវិបាកនៃការធ្វើសមាធិ
ករណីអង្គុយធ្វើសមាធិយូរអាចបង្កការជាប់ចង្កេះ ស្ពឹកខ្នង ឬដៃជើងជាដើម។
ការចុករួយស្រពន់ដៃជើង ឬភាពធុញថប់នៅអំឡុងពេលសមាធិ
ការធ្វើសមាធិត្រូវអនុវត្ដដោយការរក្សាចិត្ដស្ងប់ បើចិត្ដមិននឹង បញ្ញាមិនលូតទេ មានចិត្ដហើយទើបអាចឈានដល់មានបញ្ញាដែលអាច ឈ្នះអវិជ្ជា។
បើមានចិត្ដខឹង គឺទោសៈ ច្រណែន វានាំឱ្យកើតហេតុផ្សេងៗ មកពីមិនអាចគ្រប់គ្រងចិត្ដខ្លួនឯងបាន។ (ពេលធ្វើសមាធិ )
សមាធិព្រោះចង់ឃើញនេះនោះ ឱ្យតែមានចង់ ចិត្តនឹងរង្អើមិនស្ងប់ឡើយ ។
ចិត្តរបស់យើងរវើរវាយក្នុងអារម្មណ៍ មិនអត់ធ្មត់ ក្រៅ-ត្រជាក់ គ្មានឆន្ទៈធ្វើសមាធិ ។
៦/ ផលប្រយោជន៍នៃការធ្វើសមាធិ
សមាធិគឺអាចជួយឲ្យយើងរស់នៅជាមួយខ្លួនឯង និងក្រុមគ្រួសារដោយមានក្តីសុខ កាត់បន្ថយភាពតានតឹង និងស្ត្រេសប្រចាំថ្ងៃ ហើយអាចរៀនគ្រប់គ្រងអារម្មណ៍នៅពេលមានកំហឹង និងបង្កើនសុខភាពផ្លូវចិត្ត។
នៅពេលដែលមនុស្សមានការតានតឹងចិត្ដ ការធ្វើសមាធិមានប្រយោជន៍ច្រើនដល់ការបន្ថយភាពតានតឹងនិងនាំឱ្យការត្រិះរិះឬសញ្ជឹងគិតពិចារណាប្រព្រឹត្ដទៅបានល្អ។
ការធ្វើសមាធិមួយរយៈ គុណម្ចាស់នឹងអាចមើលឃើញពីខ្លួនឯង ។(ស្ងប់ឬមិនស្ងប់)
សមាធិអាចកាត់បន្ថយកំហឹង ចិត្ដលោភ និងសេចក្ដីកង្វល់ទាំងឡាយ នាំឱ្យមាន ការគិតដ៏ប្រពៃ មានចិត្ដនឹងនរ ឬចិត្ដស្ងប់។
វិធីសាស្រ្តសមាធិនៅក្នុងព្រះពុទ្ធសាសនាទាំងអស់គឺចែកចេញជាបីដំណាក់កាលគឺ៖ ការស្តាប់ ឬការឮសំឡេង ការគិតត្រិះរិះ និងការធ្វើសមាធិលើដង្ហើមចេញចូល។
កាលណាដកដង្ហើមចូល សតិដឹងថាអត្មាភាព ដកដង្ហើយចូល ។កាលណាដកដង្ហើមចេញ សតិដឹងថាអត្មាភាព ដកដង្ហើយចេញ ។ (ត្រូវមានសតិ និង បញ្ញា ស្មារតី)
ជាពិសេសសមាធិអាចជួយធ្វើឲ្យយើងមាន ទំនុកចិត្តលើអ្វីដែលយើងកំពុងធ្វើផងដែរតាមរយៈការផ្តោតអារម្មណ៍លើការដកដង្ហើមឲ្យបានត្រឹមត្រូវ។
គុណធម៌អ្វីដើម្បីជួយយើងឱ្យអភិវឌ្ឍន៍សភាពនៃចិត្តនេះបាន ការធ្វើបែបនេះវាធ្វើឱ្យយើងមានភាពរីករាយនៅក្នុងជីវិត ឬការរួចផុតពីសេចក្ដីទុក្ខ ។
ដោយសេចក្តីសង្ខេប
ប្រមូលរៀបរៀងដោយ ព្រះឥន្ទកោសល្យ មុំ សុខគឿន គ្រូចៅអធិការវត្តព្រែកសង្កែ
វាយអក្សរដោយ ពុទ្ធមុនី ពុំ សត្រា គ្រូសូត្រស្តាំ វត្តព្រែកសង្កែ
ត្រួតពិនិត្យដោយ ព្រះហដ្ឋកោ អេង ម៉េងហ៊ូន គ្រូសូត្រឆ្វេង វត្តព្រែកសង្កែ
សូមអរព្រះគុណ និង អរគុណ!!!
ថ្ងៃសៅរ៍១៤កើត ខែមិគសិរ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី១៨ ខែធ្នូ ឆ្នាំ២០២១

សូមអនុមោទនាបុណ្យ!!!