စစ်ကော်မရှင်က ပြည်သူ့လွှတ်တော်ဥက္ကဌအဖြစ် ကြံ့ခိုင်ရေးပါတီဥက္ကဌဦးခင်ရီကို ရွေးချယ်

Описание: မတ်လ ၁၆ ရက်။

အာဏာသိမ်း စစ်ကော်မရှင်က ဒီကနေ့ မတ်လ ၁၆ ရက်နေ့ မနက်ပိုင်းမှာ နေပြည်တော်ရှိ လွှတ်တော်အဆောက်အအုံတွင် ပြည်သူ့လွှတ်တော်အစည်းအဝေးကိုစတင်ခေါ်ယူကျင်းပခဲ့ပြီးပြည်သူ့လွှတ်တော် ဥက္ကဌအဖြစ် ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ (USDP)ဥက္ကဌ ဦးခင်ရီ နဲ့ပြည်သူ့လွှတ်တော်ဒုတိယဥက္ကဌအဖြစ် လက်ရှိ စစ်ကော်မရှင်ပြန်ကြားရေး ဝန်ကြီး ဦးမောင်မောင်အုန်းကို ရွေးချယ်ခဲ့တယ်လို့ သိရပါတယ်။

၂၀၂၀ ရွေးကောက်ပွဲမှာ မဲမသမာမှုရှိတယ်ဆိုတဲ့ စွပ်စွဲချက်နဲ့ အနိုင်ရပါတီ NLD ပါတီက ၂၀၂၁ ခုနှစ် ၊ ဖေဖော်ဝါရီမှာ လွှတ်တော်စဖို့ ပြင်နေချိန် စစ်တပ်က အာဏာသိမ်းခဲ့ပြီး ၅ နှစ်အကြာ ၂၀၂၅ နှစ်ကုန်မှာ အာဏာသိမ်း စစ်တပ်က ရွေးကောက်ပွဲလုပ်ပြီး ရွေးကောက်ပွဲမှာ လွှတ်တော်နေရာအများစုကို ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ (USDP)က အနိင်ရခဲ့ကာ ၂၀၂၆ ခုနှစ် ဒီကနေ့ မတ်လ ၁၆ ရက်နေ့မှာ နေပြည်တော်မှာ ပြည်သူ့လွှတ်တော်ခေါ်ယူလာတာဖြစ်ပါတယ်။

ဒီကနေ့ မတ်လ ၁၆ ရက် ပြည်သူ့လွှတ်တော် အစည်းအဝေးမှာ သဘာပတိအဖြစ် ဦးနန္ဒကျော်စွာက ဆောင်ရွက်ခဲ့ပြီး ပြည်သူ့လွှတ်တော်ကိုယ်စားလှယ် ၃၇၃ ဦးမှာ ၃၇၃ ဦးလုံးတက်ရောက်ခဲ့ရာ အစည်းအဝေး အထမြောက်တယ်လို့ သဘာပတိက ကြေညာခဲ့ပါတယ်။

၂၀၀၈ ဖွဲ့စည်းပုံအခြေခံဥပဒေအောက်မှာ ပြည်သူ့လွှတ်တော်ဥက္ကဌ သုံးဦး တာဝန်ထမ်းဆောင်ခဲ့ပြီး ၂၀၁၀ ရွေးကောက်ပွဲမှာ ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ (USDP)က ဦးရွှေမန်း၊ ၂၀၁၅ ရွေးကောက်ပွဲမှာ NLD ပါတီက ဦးဝင်းမြင့်တို့ တာဝန်ထမ်းဆောင်ခဲ့ပြီး ဦးဝင်းမြင့် သမ္မတဖြစ်သွားတဲ့အခါ USDP ပါတီက ဦးတီခွန်မြတ်က ဥက္ကဌ တာဝန်ယူခဲ့ပါတယ်။

မတ်လ ၁၈ ရက်နေ့မှာတော့ တတိယအကြိမ် အမျိုးသားလွှတ်တော် ပထမကြိမ် အစည်းအဝေးဆောင်ရွက်သွားမှာဖြစ်ပြီး ဧပြီလဆန်းမှာ သမ္မတရွေးချယ်တင်မြောက်ပြီး အစိုးရသစ်ဖွဲ့စည်းကာ အာဏာသိမ်းစစ်အုပ်စုက နိုင်ငံတော်တာဝန်တွေကို ပြန်လွှဲပြောင်းပေးအပ်မှာဖြစ်တယ်လို့လည်း သိရပါတယ်။