Կաթնաղբյուրի բնակիչները դեմ են իրենց բնակավայրում ոսկի և գունագեղ քարեր որոնելուն

Описание: Ստեփանավան համայնքի Կաթնաղբյուր գյուղում տեղի ունեցան Լոռու մարզի Արջիձորի հանքային դաշտի Սնկաձորի գունագեղ քարերի և ոսկու հանքերևակումների սահմաններում երկրաբանական ուսումնասիրության աշխատանքների շրջակա միջավայրի վրա ազդեցության նախնական գնահատման հայտի վերաբերյալ 2-րդ հանրային լսումները։
Շրջակա միջավայրի նախարարության ու «Ավ Մայնինգ» ընկերության ներկայացուցիչները հավաքավածներին ներկայացրին, թե նախագծի ընթացքում ինչ աշխատանքներ են կատարվելու։
Մասնավորապես, հանքարդյունահանող ընկերությունը մտադիր է հետախուզական աշխատանքներ իրականացնել 407,5 հա տարածքում, այնուհետև այնտեղ ոսկի և գունագեղ քարեր որոնել՝ յաշմա, խալցեդոն, օձաքարեր։ Նշված տարածքը հարուստ է հանքային ու քաղցրահամ ջրերի պաշարներով, կան անտառային գոտիներ, նաև գյուղատնտեսական նշանակության արոտավայրեր, ներկայացնում է նախարարության աշխատակիցը։
Սակայն ընկերության ներկայցուցիչը վստահեցնում է, որ բնությանը հասցվող վնասները նվազագույն են լինելու, փոխարենը աշխատատեղեր կստեղծվեն տեղի բնակիչների համար, երկիրը կհարստանա։
Բնակիչները հակադարձում են՝ հայտում նշված տարածքը իրենց արոտավայրերն են, իսկ գյուղի հիմնական զբաղմունքը անասնապահությունն է, դրանք արդյունաբերական տարածքի վերածելով, ստիպված կլինեն կրճատել անասնագլխաքանակը։ Իսկ թե քանի հոգի աշխատանք կունենա, ու քանի տարի՝ հայտնի չէ։
Բնակիչները մատնանշում են հարևան Արմանիսի օրինակը, որը մի քանի տարի շահագործելուց հետո, փակվեց, բնակիչները զրկվեցին աշխատանքից և անվերադարձ կորցրին գյուղատնտեսական հողերը։
Կաթնաղբյուրի վարչական ղեկավար Արթուր Սաղթալյանն ասում է՝ գյուղը հրաշալի նախադրյալներ ունի ինտենսիվ անասնապահության և էկոտուրիզմի զարգացման համար, ալպյան ու մերձալպյան մարգագետինները, հանքային ջրերի հարուստ պաշարները, մաքուր օդը, հրաշալի բնությունը։ Ըստ «Համայնքային համախմբան և աջակցության կենտրոն» ՀԿ նախագահ Օլեգ Դուլգարյաի՝ Հայաստանի ՀՆԱ-ի 40 տոկոսն ապահովում է հենց գյուղատնտեսությունը և այն չպետք է ստորադասել։
Նախագծին դեմ արտահայտվող բնակիչները լսումների ավարտից հետո իրենց բացասական կարծիքն արտահայտող գրություն կազմեցին, որպեսզի ուղարկեն Շրջակա միջավայրի նախարարություն։ Գրության մեջ նշեցին, որ դեմ են իրենց բնակավայրի տարածքում որևէ երկրաբանական ուսումնասիրության աշխատանքների իրականացմանը։ Քանի որ ցանկանում են իրենց բնակավայրը պահպանել որպես էկոլոգիական մաքուր գյուղատնտեսական նշանակության բնակավայր՝ հեռանկարներ ապահովելով գյուղատնտեսության ու զբոսաշրջության համար։

#Stepanavan #Katnaghbyur #Lori #Arjidzor #Cvmedia #Citizens #voice