Klan News - Kosova nis “telenovelën” për zgjedhjen e presidentit

Описание: Procesi për zgjedhjen e presidentit në Kosovë rrezikon të kthehet sërish në një telenovelë politike.

Kuvendi pritej të hynte këtë të mërkurë në procedurën për zgjedhjen e kreut të shtetit, por mënyra si po ndërtohet procesi paralajmëron mundësinë e një krize të re institucionale.

Kryetarja e Kuvendit, Albulena Haxhiu, tha se nuk mund ta mblidhte Kuvendin vetëm me një kandidaturë dhe se duheshin të paktën dy kandidatë. Lëvizja Vetëvendosje paraqiti vetëm emrin e Glauk Konjufcës.

“Bazuar në Kushtetutën e Kosovës dhe në veçanti në interpretimin e dhënë nga Gjykata Kushtetuese, procedura për zgjedhjen e presidentit kërkon që në proces të jenë së paku dy kandidatë të vlefshëm. Procesi i votimit nuk mund të fillojë pa u përmbushur ky kusht themelor procedural”, tha Albulena Haxhiu, kryetare e Kuvendit të Kosovës.

Sipas Kushtetutës së Kosovës, presidenti zgjidhet nga Kuvendi me votim në tre raunde. Në dy raundet e para kërkohen dy të tretat e votave të deputetëve, ndërsa në raundin e tretë mjafton shumica e thjeshtë.

Por përtej numrave, Gjykata Kushtetuese, në një vendim të vitit 2011 për rastin e Behgjet Pacollit, vendosi se zgjedhja duhet të zhvillohet me të paktën dy kandidatë.

Pikërisht për të respektuar këtë vendim, në vitin 2021 shumica parlamentare e Lëvizjes Vetëvendosje paraqiti dy kandidatura për president, Vjosa Osmanin dhe kryetaren e sotme të Kuvendit, Albulena Haxhiun. Edhe pse gara ishte procedurale, pasi dakordësia ishte për të votuar Vjosa Osmanin, prania e dy emrave shërbeu për të mos e dështuar procesin.

Sot situata duket ndryshe, ndonëse është sërish Vetëvendosje ajo që po propozon emrin e presidentit, si fituese e zgjedhjeve të 28 dhjetorit.

Shumica në pushtet ka zgjedhur të ecë përpara vetëm me një emër, duke rrezikuar që procesi të dështojë dhe të prodhojë edhe njëherë tensione dhe krizë të re politike, pas asaj për formimin e parlamentit që zgjati 10 muaj vitin që shkoi.

Nëse do të kishte vullnet politik, shumica parlamentare mund të kishte ndjekur të njëjtin model si në vitin 2021, duke propozuar dy kandidatë.

Por nëse procesi dështon dhe Kuvendi nuk arrin të zgjedhë presidentin brenda afateve kushtetuese, vendi mund të përballet me shpërndarjen e parlamentit dhe me zgjedhje të reja.

Afati i fundit për mbledhjen e parlamentit është e enjtja, 5 marsi. Me 66 deputetët e saj, Vetëvendosje i ka votat për të paraqitur një tjetër kandidaturë, pasi për çdo kandidat duhen 30 firma. Në këtë mënyrë ajo mund të shkojë me dy kandidatë dhe ta zgjedhë Glauk Konjufcën në raundin e tretë me shumicë të thjeshtë votash.

Nëse ky skenar nuk realizohet, Kuvendi nuk mblidhet as të enjten dhe vendi do të hyjë në një tjetër spirale krize, pasi parashikohet sërish ndërhyrja e Gjykatës Kushtetuese për të vendosur mbi veprimin e Kuvendit, çka mund të çojë sërish në shpërbërje të legjislativit.

Për momentin, qeveria Kurti duket se po përsërit vetveten, me shfaqjen e një tjetër serie të “telenovelave” të saj të krizave politike.

SUBSCRIBE to "RTV KLAN" on YouTube for more videos!
Për më shumë informacione vizitoni faqen tonë web https://tvklan.al/kategoria/klan-news/
Follow Klan News on Facebook:   / klannews  
Follow @klannews on Instagram:   / tvklannews  
#KlanNews #KlanNewsLajme #TvKlan