Don Antonio Sciarra, "Misionari i shpresës" - Tom Therçaj (Documentario)

Описание: •



Në kujtim të Don Antonio Sharrës, meshtarit që shërbeu 20 vite në Zadrimë, Lezhë dhe është nderuar me Urdhërin “Nënë Tereza” për kontributin e tij të shquar në Shqipëri.

Vështirë të gjesh njeri që nuk ka dëgjuar për emrin e misionarit Don Antonio Sciarra. Ai erdhi në Shqipërinë fillim të viteve ‘90, në kapërcyellin e shekujve, madje edhe të mijëvjeçarëve. Sapo kishte filluar pluralizmi politik, ishte fituar liria e besimit dhe proceset demokratike ishin në hapat e parë. Pikërisht në vitin 1992, kur ëndrra e shumë njerëzve ishte të emigronin për një jetë më të mirë, të braktisnin Shqipërinë e mundimeve e skamjes së madhe të përjetuar në regjimin komunist.

Në vizitën e parë qëndroi në Shqipëri. Nga kujtimet në formë ditari të botuara në librin "Shqipëri të kam ëndërruar", përkthyer nga mjeku i njohur zadrimor Tonin Frani, kuptohet qartë së meshtari u dashurua shpejt me vendin e shqiponjave, me Zadrimën dhe zadrimorët. Ndryshe nga ç’ndodh me priftërinjtë që janë të përkohshëm në misionet e tyre, ai mori vendimin për të qëndruar përgjithmonë pranë këtyre njerëzve.

"Don Antonio kuptoi menjëherë e si askush tjetër nevojën që kishte Shqipëria për rizgjimin shpirtëror e shoqëror, për të nisur veprën e rindërtimit moral e qytetar, për të mposhtur nënshtrimin e dëshpërimin." - shkruan Doktor Tonini në parathënien e librit.

E konsideroj fat dhe privilegj që e kam takuar e jemi miqësuar që në fillim, e kam ndjekur në projektet e tij në Zadrimë e në udhëtimet në Itali. Tek ai ishin bashkuar misionari, arkitekti, agronomi, mësuesi, artisti dhe filozofi. Madhështia qëndronte tek përulësia dhe thjeshtësia që e karakterizonte. Ishte gjithnjë në lëvizje, gjithnjë në kërkim, përherë mes njerëzve. I dëgjonte me vëmendje, i respektonte dhe nuk imponohej asnjëherë.

Misionari nuk njihte lodhjen, orarin apo komoditetin në përditshmërinë e tij. Jo, ai ishte mësuar vetëm të jepte pa asnjë shkëmbim. Te jepte mesazhe paqeje e shprese, t’u printe banorëve të zonës si bari i mirë në rrugën e Zotit.

Dashurinë e pakufishme që kishte për Shqipërinë dhe shqiptaret e tregon amaneti i tij për t’u prehur përgjithmonë në Zadrimë, mes njerëzve që i deshi dhe e donin aq shumë.

Sa më shumë vite do të kalojnë nga ndarja e tij, aq më shumë do të lartësohen vepra, kujtimi dhe emri i misionarit të përkushtuar Don Antonio Sciarra.



© Radio Televizioni Shqiptar (RTSH)



Shënim: Çdo koment i Juaji kalon në monitorim përpara publikimit, për të shmangur ofendimet.