19 Shkurti 1951 - Enver Hoxha, si i spastroi intelektualët për bombën në Ambasadën Sovjetike

Описание: Mbrëmjen e 19 shkurtit të vitit 1951 një i panjohur hodhi brenda oborrit të Ambasadës Sovjetike në Tiranë një sasi dinamiti, shpërthimi i të cilit tundi gjithë qytetin.

Shpërthimi i eksplozivit në ambasadën e shtetit që praktikisht kontrollonte gjithë jetën politike apo edhe ekonomike të vendit, në ambasadën ku punonin njerëzit e dërguar nga Stalini i Madh, u futi frikën në palcë krerëve komunistë shqiptarë.

Goditja ishte edhe e pallogaritur dhe e papritur. Sigurimi i Shtetit nuk kishte asnjë të dhënë, qoftë minimale, për autorët e ngjarjes, ndërkohë që Enver Hoxha, dhe të tjerët, nisën të kërkonin një shpagim shembullor, apo hakmarrje sa më të shpejtë.

Komunistët shqiptarë u detyroheshin sovjetikëve për shkakun se ata i kishin nxjerrë nga kthetrat e Titos dhe Rankoviçit dhe më tej i kishin pritur dhe përcjellë si miq dhe me duart plot.

Ishin sovjetikët ata po sillnin ndihma ekonomike për të gjithë sektorët e prodhimit, për industrinë e bujqësinë, që po ndërtonin fabrikat e para dhe që po pajisnin ushtrinë me teknikën më të nevojshme.

Kështu, me qëllim që të rivlerësoheshin përpara mirëbërësve të tyre, komunistët shqiptarë vendosin të luanin kartën e hakmarrjes ekstreme.

Vendimet u morën të nesërmen, mëngjesin e 20 shkurtit, gjatë mbledhjes së Byrosë Politike të Komitetit Qendror të Partisë së Punës.

Raportin për ngjarjen e paraqiti Ministri i Punëve të Brendshme, Mehmet Shehu, i cili pasi deklaroi se ajo që ndodhi ishte një ngjarje politike e kalibrit të madh, madje më e madhe se çdo atentat që mund të bëhej kundër çdonjërit prej tyre, kërkoi të merreshin “masa të jashtëzakonshme represive, pa marrë parasysh ligjet në fuqi”.

Duke argumentuar se terrorit t’i përgjigjeshin me terror, Mehmet Shehu propozoi që, atë ditë, pra më 20 shkurt 1951, të arrestonin rreth 100-150 veta, nga të cilët nja 10 ose 15 prej tyre t’i pushkatonin, duke zgjedhur sigurisht ata më kryesorët.

Më tej, në të njëjtën mbledhje, Mehmet Shehu propozon që ti dërgohej një telegram shokut Stalin:
“Do të ishte mirë që ne si Byro Politike ti bënim një telegram shokut Stalin, ku ti tregonim se si ka ndodhur kjo ngjarje, kjo fatkeqësi e madhe më mirë, dhe ti premtojmë, e ta sigurojmë, se luftën kundra armiqve të jashtëm e të brendshëm do ta vazhdojmë me më ashpërsi”.

Duke qenë se nuk kishin asnjë të dhënë nga Sigurimi i Shtetit apo Policia, krerët komunistë të Tiranës, vendosën në listat e atyre që do të arrestonin, të gjithë elementët për të cilët kishin të dhëna, apo dyshime, se ishin kundërshtarët e tyre politikë, një pjesë e mirë e të cilëve i përkisnin klasës së intelektualëve.

Mes të arrestuarve do të ishte edhe Sabiha Kasima’ti, ndër gratë e pakta shkencëtare të Shqipërisë së kohës.

Hetimi dhe akuzat kundër saj vërtetojnë gjithë farsën e ndërmarrë nga komunistët si ndëshkim për incidentin në ambasadën e Bashkimit Sovjetik në Tiranë.

Sabiha Kasimati akuzohej si “armike e betuar e pushtetit të komunistëve, se gjatë okupacionit kishte pasur marrëdhënie me element fashistë; se mbante qëndrim armiqësor ndaj pushtetit, se fliste kundër reformave dhe mbante kontakte me elementë armiq… se kishte pasur kontakt me deputetin anglez, Lester Hatçiston, se kishte mbajtur kontakte me njerëz të misionit anglez… e të tjera.

Gjashtë ditë më pas, më 25 shkurt 1951, gjykata dënoi më vdekje, me pushkatim 22 nga të arrestuarit, përfshirë Sabiha Kasimatin. Dënimi u ekzekutua natën e ndërrimit të datave 26 dhe 27 shkurt, në afërsi të fshatit Mënik, në perëndim të Tiranës. Trupat u varrosën në të njëjtën zonë, një varr pa emër...


#mcntv #mcn #datastories #ferdinanddervishi #histori #ngjarjethistorike #19Shkurt1951 #AmbasadaSovjetike #Tirana1951 #EnverHoxha #MehmetShehu #SigurimiIShtetit #ByrojaPolitike #DiktaturaKomuniste #HistoriaShqiptare #SabihaKasimati #Pushkatimet #Reprezalje #KrimetEKomunizmit #MemoriaHistorike