Thannu thaanu thagginchukonutalo gala dhanyatha || Daily God's Word || March 12th

Описание: తన్ను తాను తగ్గించుకొనుటలో గల ధన్యత

దేవుని దృష్టికి చెడునడత నడచి తన్ను తాను అమ్ముకొనిన రాజైన అహాబుకంటే మనష్షే మిక్కిలి చెడ్డవాడై యుండెను. అదియును గాక, అతడు అన్యజనులకంటెను మరింత అక్రమముగా ప్రవర్తించెను" (2 దిన 33:9). అతడు ముహూర్తములను విచారించుచు, మంత్రములను చిల్లంగితనమును వాడుకచేయు కర్ణపిశాచములతోను సోదెగాండ్రతోను సాంగత్యము చేయుచు, యెహోవా దృష్టికి బహుగా చెడునడత నడచుచు ఆయనకు కోపము పుట్టించెను" (2 దిన 33:6). దేవునికి కోపము పుట్టించుటకై అతడుచేసిన కార్యములు ఇంకా అనేకములు కలవు. అతడు పండ్రెండేండ్లవాడై యేలనారంభించినప్పుడే అక్రమముగా ప్రవర్తించుటకు మొదలు పెట్టెను. తనయొక్క యాభై అయిదు సంవత్సరముల దీర్ఘకాల పరిపాలనలో అతడు దేవుని సంతోషపరచునట్టి కార్యమొకటైనను చేయలేదు.

మనష్షే గొలుసులతో బంధింపబడినవాడై బబులోనునకు తీసికొని పోబడినప్పుడు "తన దేవుడైన యెహోవాను బతిమాలుకొని, తన పితరుల దేవుని సన్నిధిని తన్ను తాను బహుగా తగ్గించుకొనె" నని దేవుని వాక్యము చెప్పుచున్నది (వాక్య 12). అతడు దేవునికి బహుగా కోపము పుట్టించుచు బహు దుర్మార్గుడైన రాజుగా ఉండినప్పటికిని, అతడు తన పితరుల దేవుని సన్నిధిని తన్ను తాను తగ్గించుకొనినందున ఆయన అతనిని కనికరించి, యెరూషలేమునకు అనగా అతని రాజ్యమునకు మరల అతనిని తీసికొని వచ్చెను. అటుతర్వాత, అతడు దేవునికొరకు అనేక కార్యములు చేసినట్లుగా మనము చూచుచున్నాము. (వాక్య 14-16). ఇంకను, పరిశుద్ధముగా జీవించిన రాజులవలెనే మనష్షేయొక్క అవసానముకూడ మిక్కిలి సమాధానముగాను ఆశీర్వాదకరముగాను ఉండెను. "మనష్షే తన పితరులతోకూడ నిద్రించెను" (వాక్య 20). పాత నిబంధన కాలములో 'పితరులతో కూడ నిద్రించెను' అను పదజాలమును సామాన్యముగా దైవిక మరణముగా పరిగణించిరి.

ప్రియ చదువరీ, మనుష్యుడు తన్ను తాను తగ్గించుకొనుటకు తీర్మానించినప్పుడు, అతడు గతములో చేసిన దుష్టత్వమంతటిని దేవుడు మరిచిపోవుచున్నాడనునది దిగ్భ్రాంతి కలుగజేయుచున్నది గదా! ఆయన తన మహా కనికరమును అతనికి చూపించి అతనిని ఆశీర్వదించుదురు.