A1 Report - Ceremoni ushtarake për Çlirimin Kodheli: Historia, secilit hakun e vet!

Описание: TIRANE - Për ditën e 70-vjetorit të çlirimit të Shqipërisë, Ministria e Mbrojtjes organizoi një ceremoni ushtarake të Forcave të Armatosura të vendit, ku ministrja Mimi Kodheli tha se shqiptarët u radhitën në anën e duhur të historisë.

Edhe në këtë ceremoni kanë qenë të pranishëm kryeministri Edi Rama dhe kryetari kuvendit Meta, së bashku me ministra dhe ambasadorë dhe veteranë të luftës. Me këtë rast ministrja e Mbrojtjes Mimi Kodheli mbajti një fjalim, ku fillimisht nderoi të rënët e luftës. Por ministrja Kodheli mes të tjerash theksoi se Shqipëria u radhit në anën e duhur të historisë kur luftoi kundër pushtuesve gjermanë, por ajo që ndodhi më pas ishte gabim fatal për vendin. Por pavarësisht debateve ministrja tha se ka ardhur koha që të punohet për të ardhmen e vendit, pa dallime politike apo krahinore. “ Shqiptarët 70 vjet më parë finalizuan një përpjekje heroike kundër tiranisë së paparë më parë në historinë moderne të Shqipërisë. Jemi krenarë që fal jush Shqipëria u rreshtua në krahun e vendeve fituese të koalicionit botëror antifashist. Ajo çfare i frymëzoi në ato ditë të vështira ishte ideali, besimi, besnikëria dhe dashuria për atdheun. Aleatët tanë të sotëm nuk do të na kishin radhitur mes tyre në vitin ‘45 nëse në 29 nëntor të vitit 1944 Shqipëria nuk do të ishte çliruar nga bijtë e saj. Ka disa gjëra për të cila ja vlen të vdesësh dhe ajo është liria e vendit. Historia është një mësuese e vrazhdë e cila duhet ti japë secilit hakun. Ata që duan të lexojnë për të rishikuar historinë janë të mirëpritur, hapni vëllimet e plota të akteve, të Konferencës së Paqes së Parisit në vitin 1946, do të kuptoni se Lufta Nacional-Çlirimtare ishte aq shumë vendimtare saqë ne vitin 1946 Shqipëria të mbante të pacenuar integritetin e saj territorial. Gabimi historik i ca shkruesve të sotëm që duan të riedukojnë historinë është po ai që mori në qafë deri në 29 nëntor 44 figura eprore të historisë sonë. U verbuan gjigantë të mendimit shqiptar duke konsideruar Luftën e II Botërore si ripërsëritjen e skajshme të konflikteve aneksioniste klasike dhe unë po ringjall një parullë të luftës pa komplekse nostalgjie dhe as ndrydhje për rënien në ndonjë gabim nostalgjik, as ideologjik. Të punojmë për përparimin e Shqipërisë pa dallim feje, krahine dhe ideje. Ju faleminderit dhe ta gëzojmë përvjetorin e Çlirimit. Rroftë Shqipëria!”, u shpreh ministrja Kodheli.
Në përmbyllje të paradës, forcat e armatosura përmes manovrave krijuan me trupat e tyre numrin 70 në nderim të përvjetorit të çlirimit.