Tv Klan - Bizneset, vështirësi me shërbimet online

Описание: Bizneset në vend po përballen prej javësh me vështirësi në përdorimin e shërbimeve elektronike të administratës shtetërore. Kontabilistë dhe subjekte raportojnë probleme të përsëritura me portalin e-Albania, sistemin e fiskalizimit SelfCare, si edhe me disa shërbime të tjera të lidhura me QKB dhe tatimet.

Sipas tyre, ndërprerjet nuk janë të izoluara, por janë përsëritur disa herë gjatë muajve të fundit, duke krijuar vështirësi në aktivitetin e përditshëm të bizneseve.

“Të gjitha që kemi online, QKB, tatimet, faturat në SelfCare, kemi hasur shumë probleme. Dhe nuk është se ka qenë rastësi apo vetëm një ditë, por ditë të tëra që përsëriten. Nëse shohim për momentin, faqet funksionojnë. Por nuk na garantohet që pas një ore a do jenë të përdorshme prapë. Javën që kaloi ne kemi pasur probleme me QKB, ku me ditë të tëra nuk arrinim të printonim një ekstrakt, për mos thënë që edhe sistemi bankar ka pasur vështirësi”, pohoi kontabilistja Etleva Treska.

Më problematike për bizneset rezulton platforma SelfCare, e cila është thelbësore për procesin e fiskalizimit dhe për deklarimet tatimore. Kontabilistët thonë se në disa raste sistemi ka qenë i paaksesueshëm për periudha të gjata, pikërisht në momentet kur nevojitet më shumë.

“Të mos harrojmë që data 31 mars është shumë e rëndësishme qoftë për individin, qoftë për subjektin dhe ne jemi shumë mbrapa sepse nuk arrinim të shihnim faturat dhe të ardhurat, sepse SelfCare nuk funksiononte dhe ne nuk mund të nxirrnim dot asnjë të dhënë për sa i përket përgatitjes që kërkon çdo biznes që të bëhet pjesa e deklarimit të TVSH”, tha Treska.

Probleme janë raportuar edhe me shërbime të tjera të portalit, siç është çregjistrimi i personit fizik në rastet kur pronari i biznesit ka ndërruar jetë.

“Që nga gushti jam duke u përpjekur t’ju bëj dy bizneseve çregjistrim, pasi personat që kishin subjektin kanë ndërruar jetë dhe nuk arrij ta bëj. Të na jepen alternativa për të vazhduar punën. Më parë e kemi bërë me procedura të tjera, tani është te e-Albania dhe nuk ka alternativë tjetër,” shtoi, ndër të tjera, Treska.

Sipas kontabilistëve, situata krijon rrezik real për penalitete, pasi afatet ligjore për deklarimet fiskale mbeten të pandryshuara.

“Afati nuk ka ndryshuar, është vetëm 31 marsi. Sa mundem unë fizikisht që t’i mbyll. Edhe për biznesin, sepse në momentin që kërkohet faturë nga klienti dhe ne nuk arrijmë t’ja japim ka problematikë, do të kalohet TVSH, ndërkohë ne nuk na punon sistemi. Nuk kemi parë ndonjë shtyrje afati, në këtë moment natyrisht që ka penalitet, se vihet gjobë për mungesë deklarimi. Nuk është se të fal njeri te kjo pjesa,” pohoi gjithashtu Treska.

Pas interesimit të TV Klan, Agjencia Kombëtare e Shoqërisë së Informacionit pranon se në disa raste sistemi është përballur me probleme teknike, por thekson se aktualisht platforma SelfCare është funksionale.

“Aktualisht, platforma SelfCare është funksionale në të gjitha modulet e saj. Ekipi teknik është duke punuar për optimizimin e mëtejshëm të proceseve. Ngarkesa vjen kryesisht në fillim të muajit, pasi të gjithë subjektet futen në platformën SelfCare për të marrë faturat e shitjes dhe blerjes, kur kjo procedurë mund të kryhej në vazhdimësi gjatë muajit. Sipas verifikimeve teknike, problemi lidhet me një incident infrastrukturor të shkaktuar nga ndërprerja e papritur e energjisë elektrike (në datë 21 janar dhe 24 shkurt), që ka sjellë fikje të pakontrolluar të disa pajisjeve hardware”, sipas AKSHI-t.

AKSHI shton se po kryhen testime të qëndrueshmërisë për të minimizuar mundësinë e përsëritjes së incidenteve të ngjashme, por nuk jep një garanci të qartë se ndërprerjet nuk do të ndodhin sërish.

Institucioni thotë gjithashtu se është në komunikim me Drejtorinë e Përgjithshme të Tatimeve për të shmangur penalizimin e bizneseve në rastet kur detyrimet nuk mund të kryhen për shkak të mosfunksionimit të sistemit.

“Institucionet përgjegjëse janë në komunikim me Drejtorinë e Përgjithshme të Tatimeve për të adresuar ndikimin e këtij problemi tek tatimpaguesit. Në raste të tilla merren masa për të shmangur penalizimin e bizneseve për detyrime që nuk mund të kryhen për shkak të mosfunksionimit të sistemit”, deklaroi AKSHI.

Ndërkohë, sipas AKSHI-t, faqet e institucioneve të tjera të lidhura me portalin, si QKB apo agjenci të tjera shtetërore, janë tashmë në funksion të plotë. Megjithatë, bizneset, më shumë se shpjegime teknike, kërkojnë garanci që sistemi të funksionojë pa ndërprerje për të mos penguar punën.


SUBSCRIBE to “RTV KLAN” on YouTube for more videos!

Email: [email protected]

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook:   / tvklan  
Follow Tvklan on Instagram:   / rtvklan  
Programet e Tv Klan mund t’i ndiqni edhe në faqen https://tvklan.al/programe/