عند حمران النواظر مزايا ماتبيد - فايز الدوسري | 2025

Описание: عند حمران النواظر مزايا ماتبيد - فايز الدوسري | 2025
طلبت الله قبل بدع المثايل والقصيد
بسمك اللهم نبدا ونطلبك الهدا

يالله التوفيق يالواحد الفرد المجيد
مالنا من غير عونك ملاذ ولا مدا

يالعظيم وصاحب الطول والباس الشديد
يالكريم وياجدا واحدٍ ماله جدا

دامت الافراح واليوم كنه يوم عيد
والمساء نوره تجلّا وحدّايه حدا

ليلة التكميل لبسة لها ثوبٍ جديد
من جمال ومن كمال ولها صوت وصدا

موعدٍ لهل الوفاء من قريب ومن بعيد
والغلا هو دافع اللي يلبون الندا

تلبية دعوه لعادي عسى حظه سعيد
والله يهنيه ويوفقه خير القدا

مرحبا عد المطر والشجر ولا تزيد
مرحبا ماله نهايه ومنّا المبتدا

بالضيوف وبالقرابه وبالجمع الفريد
شوفكم يجلا عن القلب والكبد الصدا

في محل عيال عايض هل المجد التليد
كاسبين الطيب بيت الكرم بحر الندا

معرفتهم عز مثل الذهب يبقى رصيد
فالنشاما كل معروف مايذهب سدا

هم هل الوقفات والحلم والراي السديد
وهم هل المبدا وياطيب من سار وبدا

الصخى فيهم طبيعه وفطره مايحيد
مايجيهم مدخل الضعف وعروق الردا

وارثين المرجله ورث من سيدٍ لسيد
من عدود ومن بدود ومشايخ وعقدا

ياذوي شايع هل العرف والذكر الحميد
يارياجيل المواقيف ياسقم العدا

يحكي التاريخ بفعالكم شيٍ وكيد
من فعل ياخذ نصيبه وحقه ماغدا

بالحقايق يشهدون العرب والله شهيد
والمطيري ياخذ النعم ما معه معدا

معجزات مطير من وقعها لان الحديد
حي الاسم اللي تعلّا مثل ضلع الهدا

عند حمران النواظر مزايا ماتبيد
ماقدرت احصي عددها وقولو لي فدا