Aksyon Laban sa Kahirapan - Season 2 – Episode 63

Описание: Tampok sa ika-63 na episode ang panayam ni National Authority for Child Care (NACC) Director IV Imelda Ronda sa programang Rise and Shine Pilipinas ng PTV-4,Nobyembre 11.

Tinalakay ni Direktor Ronda kung paano nakakaapekto ang kahirapan sa mga kaso ng pagsasamantala sa mga bata. Ipinaliwanag niya na may direktang kaugnayan ang kahirapan sa mga insidente ng pananamantala sa bata dahil kapag nahihirapan ang mga pamilya sa pananalapi, mas madaling maapektuhan ang mga bata. Aniya, mayroong mga pangyayari na pinipilit ang mga bata na magtrabaho upang makatulong sa kanilang pamilya. Mayroon ding mga kaso na hinawakan ang NACC, kung saan binebenta ng mga magulang ang kanilang mga anak at ipapalabas na legal na pagpapa-ampon.

Binigyang-diin din niya na mandato ng NACC na tiyakin na mabigyan ng ligtas at matiwasay na tahanan ang mga batang nawalan ng pamilya o hindi na maaaring manatili sa kanilang mga pamilya. Kabilang dito ang mga alternatibong programa sa pangangalaga ng bata tulad ng foster care.

Nagbibigay rin ng lisensya ang NACC sa mga pamilya, magulang, o kahit sino man na handang mag-alaga ng mga batang nakaranas ng pisikal, sekswal o emosyonal na pang-aabuso, gayundin sa mga batang hindi na maaaring manatili sa kanilang sariling pamilya dahil sa pang-aabuso.

Inilahad din ni Direktor Ronda na bahagi ang NACC ng Inter-Agency Committee sa Child Trafficking at Ilegal na Pag-aampon. Bilang ahensya ng pamahalaan na responsable sa pagpapatupad ng legal na proseso ng pag-aampon, ang NACC ang nangangasiwa sa parehong ‘domestic’ at ‘inter-country’ na pag-aampon.

#NAPC26
#AksyonLabanSaKahirapan
#BagongPilipinas