Zominda “Yoshlar kuni” doirasida sportchi yoshlar bilan uchrashuv o‘tkazildi

Описание: Davlatimiz rahbari tashabbusi bilan mamlakatimizdagi barcha vazirlik, idora va hokimliklarda har haftaning payshanba kuni “Yoshlar kuni” etib belgilangan. Mazkur tashabbus yoshlar bilan ochiq muloqot o‘tkazish, ularning muammolari va takliflarini o‘rganish, shuningdek, iqtidorli yoshlarni qo‘llab-quvvatlashga xizmat qilmoqda.

Shu munosabat bilan Zomin tumanida sport bilan shug‘ullanayotgan yoshlar bilan uchrashuv tashkil etildi. Unda Zomin tumani hokimi Alisher Abdug‘aniyev, Zomin tumani Ichki ishlar bo‘limi boshlig‘i I. Nurmatov hamda Zomin tumani sport maktabi mas’ullari ishtirok etdi.

Uchrashuv Zomin tumani sport maktabida tashkil etilib, unda sportning kurash, taekvondo va boks yo‘nalishlari bilan muntazam shug‘ullanayotgan iqtidorli yosh sportchilar, murabbiylar hamda sport sohasi mutasaddilari qatnashdi.
Tadbir davomida yosh sportchilar bilan samimiy muloqot o‘tkazilib, ularning sportga bo‘lgan qiziqishi, mashg‘ulot jarayonlari hamda kelgusidagi maqsadlari haqida suhbatlashildi. Yoshlarning sport sohasida erishayotgan natijalari alohida e’tirof etilib, ularni yanada rag‘batlantirish va qo‘llab-quvvatlash muhimligi ta’kidlandi.

Muloqot jarayonida yurtimizda yoshlarni har tomonlama qo‘llab-quvvatlash, ularning bo‘sh vaqtini mazmunli tashkil etish, sog‘lom turmush tarzini targ‘ib qilish hamda sport orqali vatanparvarlik tuyg‘ularini mustahkamlash borasida amalga oshirilayotgan islohotlar haqida so‘z yuritildi. Ayniqsa, yoshlarning sportga keng jalb etilishi, iqtidorli sportchilarni saralab olish va ularni nufuzli musobaqalarga tayyorlash muhim ahamiyat kasb etishi qayd etildi.

Shuningdek, uchrashuv davomida sportchi yoshlarning fikr va takliflari tinglanib, ularning mashg‘ulotlari uchun yaratilgan shart-sharoitlar, sport infratuzilmasini yanada rivojlantirish hamda yosh iste’dodlarni qo‘llab-quvvatlash bo‘yicha takliflar muhokama qilindi.

Mutasaddilar tomonidan yosh sportchilarga sport bilan muntazam shug‘ullanish, intizom va matonatni saqlagan holda yuqori natijalarga erishish, yurtimiz sha’nini xalqaro maydonlarda munosib himoya qilish yo‘lida tinimsiz mehnat qilish zarurligi ta’kidlandi.

Uchrashuv yakunida yosh sportchilarga kelgusidagi faoliyatlarida omad tilanib, ularning sportdagi yutuqlari nafaqat tuman, balki viloyat va respublika miqyosida ham yuksak natijalar berishiga ishonch bildirildi.