စစ်ရေးပစ်မှတ်မဟုတ်တဲ့ ခရီးသွားပြည်သူတွေကို စစ်အုပ်စုက ဗုံးကြဲတိုက်ခိုက်နေ

Описание: မန္တလေးတိုင်း၊ စစ်ကိုင်းတိုင်းနဲ့ မကွေးတိုင်းအတွင်းမှာ စစ်အုပ်စုက စစ်ရေးပစ်မှတ်မဟုတ်တဲ့ ခရီးသွားပြည်သူတွေကို ဗုံးကြဲတိုက်ခိုက်တာတွေ ဆက်တိုက်လုပ်ဆောင်နေတယ်လို့ ဒေသခံ သတင်းရင်းမြစ်တွေက MFP ကို ပြောပါတယ်။

ပြီးခဲ့တဲ့ ၂၀၂၅ခုနှစ် ဒီဇင်ဘာလကနေ အခုမတ်လဆန်းအထိ သုံးလအတွင်းမှာ စစ်အုပ်စုက စစ်ကိုင်း၊ မန္တလေး၊ မကွေးတိုင်းတိုင်းအတွင်းက ခရီးသွားပြည်သူတွေ ဖြတ်သန်းသွားလာရာနေရာတချို့ကို တိုက်လေယာဉ်တွေ၊ ဂျိုင်ရိုကော်ပတာနဲ့ လေကြောင်းကနေ ဗုံးကြဲတာ၊ လက်နက်ကြီး၊ လက်နက်ငယ်တွေနဲ့ ပစ်ခတ်တာတွေ ကျူးလွန်ခဲ့တယ်လို့ ဒေသခံသတင်းရင်းမြစ်တွေက ဆိုပါတယ်။

မကွေးတိုင်း၊ မင်းတုန်းမြို့နယ်ထဲက ပြောင်းကျေးရွာအနီးမှာ မတ် ၁ ရက် မနက်ပိုင်းက ရခိုင်ပြည်နယ်ဘက်ကို ပို့ဆောင်ဖို့ ကုန်တင်ကုန်ချလုပ်နေတဲ့ ခရီးသွားကားတွေ ရပ်နားထားတဲ့နေရာကို စစ်အုပ်စု ဂျက်ဖိုက်တာ နှစ်စင်းနဲ့ ဗုံးကြဲခဲ့ပါတယ်။ အဲဒီတိုက်ခိုက်ခံရမှုမှာ အမျိုးသမီး နှစ်ဦးနဲ့ အမျိုးသား ၂၃ ဦး သေဆုံးခဲ့ကာ ၂၀ ကျော် ထိခိုက်ဒဏ်ရာရခဲ့ပြီး အသက်အန္တရာယ်စိုးရိမ်ရတဲ့သူတွေလည်းရှိခဲ့တယ်လို့ သရက်ခရိုင် ပကဖ တာဝန်ခံ ကိုဗဟိန်းက MFP ကို ပြောပါတယ်။

အဲဒီတိုက်ခိုက်ခံရမှုကြောင့် ကျပ်သိန်းပေါင်း နှစ်သောင်းဝန်းကျင် ဆုံးရှုံးခဲ့ရတယ်လို့လည်း သူကဆက်ပြောပါတယ်။

“ပျက်စီးဆုံးရှုံးမှုကတော့ ခန့်မှန်းချေ သိန်းပေါင်း ၂သောင်း ဝန်းကျင်နီးပါးခန့်ထိ ရှိပါတယ်။ ကားတွေလည်းပါသွားတယ်။ ဆိုင်ကယ်တွေကော ထွန်စက်တွေကော ကုန်ပစ္စည်းတွေကော မီးလောင်တာဆိုတော့။ ပြောချင်တာက ပြည်သူလူထုအနေနဲ့ လူစုလူဝေးတွေ မလုပ်ကြဖို့ကိုပဲ ကျွန်တော်တို့အနေနဲ့ မေတ္တာရပ်ခံပြီးပြောချင်တယ်။ ”လို့ သူကဆိုပါတယ်။

ဒါ့အပြင် မတ် ၄ ရက်နေ့မှာလည်း မုံရွာ-မန္တလေး လမ်းပိုင်းမှာ သွားလာနေတဲ့ ခရီးသည်ယာဉ်တစ်စီးကို စစ်အုပ်စုက ပစ်ခတ်ခဲ့တာကြောင့် အမျိုးသမီး တစ်ဦး သေဆုံးခဲ့ပါသေးတယ်။

ပြီးခဲ့တဲ့ ဖေဖော်ဝါရီ ၂၈ ရက်ကလည်း မုံရွာ-မန္တလေး လမ်းပိုင်းနဲ့ဆက်သွယ်ထားတဲ့ အရာတော်မြို့နယ်ထဲမှာ သွားလာနေတဲ့ ခရီးသွားပြည်သူတွေကို ဂျိုင်ရိုကော်ပတာနဲ့ ဗုံးကြဲခဲ့တာကြောင့် ခရီးသည် အမျိုးသမီးတစ်ဦးနဲ့ အမျိုးသားတစ်ဦး သေဆုံးခဲ့ပြီး နှစ်ဦး ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။


စစ်အုပ်စုဟာ မုံရွာ-မန္တလေး လမ်းပိုင်းပေါ်မှာ သွားလာနေတဲ့ ခရီးသွားကားတွေကို မိုင်းရှင်းခိုင်းတာ၊ လူသားဒိုင်းကာအသုံးပြုပြီး ခရီးသွားတွေနဲ့အတူလိုက်ပါတာ၊ ခရီးသွားကားတွေကို အကာကွယ်ယူပြီး တိုက်ခိုက်တာ၊ ဖမ်းဆီးငွေညှစ်တာတွေ မကြာခဏ လုပ်ဆောင်နေတာကြောင့် မုံရွာ-မန္တလေး လမ်းပိုင်းကို အသုံးမပြုရဲတဲ့ ခရီးသွားတွေပါ ရှိလာတယ်လို့ ဒေသခံ သတင်းရင်းမြစ်တွေက ဆိုပါတယ်။

စစ်အုပ်စုဟာ တော်လှန်ရေးတပ်ဖွဲ့တွေ စိုးမိုးတဲ့ဒေသတွေကို စက်သုံးဆီအပါဝင် ဆေးဝါးနဲ့ ကုန်ပစ္စည်းတွေ သယ်ဆောင်နေတယ်ဆိုတဲ့ အကြောင်းပြချက်နဲ့ ခရီးသွားပြည်သူတွေကို စစ်ဆေးလေ့ရှိပြီး အခုလို လေကြောင်းတိုက်ခိုက်တဲ့လုပ်ရပ်အထိ ကျူးလွန်လာတာကြောင့် သွားရေးလာရေးမှာ စိတ်မလုံခြုံမှုတွေ ဖြစ်နေရတယ်လို့ ဒေသခံတွေကပြောပါတယ်။

“မုံရွာ-မန္တလေး လမ်းပိုင်းမှာက စစ်ဆေးရေးဂိတ်တွေက အရမ်းများတယ်။ ဖမ်းဆီးငွေတောင်းတာတွေကလည်း အရမ်းများတယ်။ နှစ်ဖက်စလုံးကပေါ့။ စကစ ဂိတ်တွေကတော့ ပိုဆိုးတယ်။ခရီးသည်တွေကို မိုင်းရှင်းခိုင်းတာ၊ လူသားဒိုင်းလုပ်တာ၊ အကာကွယ်ယူပြီးတော့ ပစ်တာတွေ လုပ်လေ့ရှိတယ်။ အဲဒါကြောင့် တချို့တွေဆိုရင် အဲဒီလမ်းပိုင်းကို မသုံးကြဘဲ လေယာဉ်နဲ့ပြောင်းသွားကြသူတွေရှိတယ်။ ကျွန်တော်ဆိုရင်လည်း အရင်က အဲဒီလမ်းပိုင်းသုံးသေးတယ်။ နောက်ပိုင်း အန္တရာယ်များတော့ လေယာဉ်ပဲပြောင်းသုံးလိုက်တော့တာ”လို့ မုံရွာဒေသခံ ကုန်သည်တစ်ဦးက MFP ကို ပြောပါတယ်။

အရာတော်မြို့နယ်က တော်လှန်ရေးတပ်ဖွဲ့ဝင်တစ်ဦးကလည်း ဒီလိုခရီးသွားပြည်သူတွေကို ပစ်မှတ်ထားနေတာဟာ အလွန်ဆိုးရွားတဲ့ လုပ်ရပ်ဖြစ်တယ်လို့ ပြောပါတယ်။

“စစ်ရေးပစ်မှတ်မဟုတ်တဲ့ ခရီးသွားပြည်သူတွေကို ပစ်မှတ်ထားပြီးတော့ တိုက်ခိုက်နေတာတွေက အတော်ကိုဆိုးရွားလွန်းပါတယ်။ အကြောင်းမရှိ အကြောင်းရှာပြီး ခရီးသွားပြည်သူတွေအပေါ် ဗုံးပတ်ကြဲနေတာတွေက အတော်လေး ဒုက္ခဖြစ်ပါတယ်။ အခုရက်ပိုင်းမှာဆိုရင် ခရီးသွားပြည်သူတွေ ထိခိုက်လာတယ်။ ကားသမားတွေ ကားရပ်တဲ့နေရာဆိုရင် အတော်ကို သတိကြီးကြီးထားပြီး နေနေရတာ။ အဲဒီလိုပဲ ရပ်ထဲရွာထဲမှာရှိတဲ့ ပြည်သူတွေကလည်း သတိကြီးကြီးနဲ့ နေနေကြရတာ။ အခုဟာက ပါရာမိုတာတွေ ဂျိုင်ရိုကော်ပတာတွေနဲ့ ကြဲနေတာဆိုတော့ အဲဒါတွေ ပျံတက်လာပြီဆိုတာနဲ့ ဘယ်ကိုကြဲလိုကြဲမှန်းမသိတော့ဘူး။ သူတို့ မြင်ရာထင်ရာကို ကြဲနေတော့တာ။ ပြည်သူတွေကတော့ လေယာဉ်တက်လာပြီဆိုတာနဲ့ သတိကြီးကြီးထားပြီ နေနေကြရတာ။ လေကြောင်းသတင်းတွေ နားစွင့်ပြီးတော့ နေရာအတော်များများမှာ ဗုံးခိုကျင်းတွေတူးထားကြရတယ်” လို့သူကဆိုပါတယ်။

ဒါ့အပြင် ပြီးခဲ့တဲ့နှစ် ဒီဇင်ဘာလကလည်း စစ်အုပ်စုဟာ ခင်ဦးမြို့နယ်ထဲက ရွှေဘို-မြစ်ကြီးနား လမ်းပိုင်းပေါ်မှာ ရပ်နားထားတဲ့ ခရီးသွားကားတွေကို လေကြောင်းက ဗုံးကြဲခဲ့တာကြောင့် အမျိုးသမီး၊ အမျိုးသား ၁၀ ဦးကျော် သေဆုံးခဲ့ပြီး အများအပြား ထိခိုက်ဒဏ်ရာရရှိခဲ့ကာ ကုန်တင်ယာဉ်တွေနဲ့ကုန်ပစ္စည်းတွေ အများအပြား မီးလောင်ပျက်စီးခဲ့ပါသေးတယ်။

MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ ဝက်ဘ်ဆိုက်မှာလည်း ကြည့်နိုင်ပါတယ်။
#Mandalay_Free_Press_MFP
#အညာ #စစ်ကိုင်း #ခရီးသွားပြည်သူ #လေကြောင်း

(Mandalay Free Press – MFP သည် လွတ်လပ်၍ အမှီအခို ကင်းသော သတင်းဌာနဖြစ်ပြီး မန္တလေးနှင့် စစ်ကိုင်းတိုင်း သတင်းများကို အထူးပြုတင်ဆက်လျှက် ရှိပါသည်။)

Mandalay Free Press – MFP မှ တင်ဆက်သောသတင်းများကို ဖတ်ရှုနိုင်ရန် အောက်ဖော်ပြပါ Channel များကို Follow (သို့မဟုတ်) Subscribe လုပ်ထားနိုင်ပါသည်။

Facebook:   / mandalayfreepress  
YouTube:    / @mandalayfreepressmfp  

#MFP #MandalayFreePress #မန္တလေး #တော်လှန်သော #သပိတ် #မိခင်