Culfa rayonunda mülki müdafiə dəstələrinin hazırlığı yoxlanılıb

Описание: Naxçıvan Muxtar Respublikasının 2025-ci il üçün mülki müdafiə tədbirləri planına uyğun olaraq, Fövqəladə Hallar Nazirliyinin və Culfa Rayon İcra Hakimiyyətinin birgə təşkilatçılığı ilə “İrimiqyaslı fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda xəbərdarlıq-toplanış üzrə nümunəvi mülki müdafiə məşqi keçirilib.

Nazirliyin mətbuat xidmətindən  bildirilib ki, rayon fövqəladə hallar üzrə komissiyasının, mülki müdafiə qərargahı ərazi və obyekt mülki müdafiə dəstələrinin, idarə, müəssisə və təşkilatların cəlb olunduğu məşqin keçirilməsində məqsəd fövqəladə hallara operativ reaksiyavermə hazırlıq səviyyəsinin yoxlanılması olub.

Plana əsasən, rayonda “şərti” zəlzələ baş verib. Bu səbəbdən rayon ərazisində “şərti” dağıntılar olub, hadisə nəticəsində “ölən” və “xəsarət” alanlar var. Bu məqsədlə hərbiləşdirilməmiş ərazi mülki müdafiə dəstələri fövqəladə hal barədə xəbərdar edilib, xəbərdarlıq toplanışı siqnalı ilə qaldırılıb, toplanma məntəqəsinə yürüş edilib. Əvvəlcə əraziyə hərəkət üçün uçqun nəticəsində dağılan yol bərpa olunub, ilkin baxış və kəşfiyyat aparılıb. Mülki müdafiə kəşfiyyatı aparılıb, hüquq-mühafizə orqanları tərəfindən ərazinin mühafizəsi təşkil edilib. Əraziyə kənar şəxslərin daxil olmasının qarşısı alınıb. Sonra fövqəladə hal zamanı yaranan yanğınlar söndürülüb və xəsarət alan insanlar təxliyə olunub.

“Şərti” zəlzələ nəticəsində dağıntılar altında qalan vətəndaşlar xilas edilərək, tibb heyətinə təhvil verilib. Xəsarət alanlara ilkin tibbi yardım göstərilib və səhiyyə ocaqlarına çatdırılması təmin olunub. Ərazidəki qəzalı elektrik, qaz və su xətlərində təmir-bərpa işləri aparılıb, qəza-bərpa dəstələrinin fəaliyyəti yoxlanılıb və epidemiya əleyhinə tədbirlər görülüb.

Mülki müdafiə məşqinə 250-dən artıq şəxsi heyət və 54-dən çox texnika cəlb olunub.