LƏNKƏRANDA DÖVLƏT PEŞƏ TƏHSIL MƏRKƏZİNİN AÇLIŞI OLDU

Описание: Lənkəran:

Lənkəran Dövlət Peşə Təhsil Mərkəzində təhsil alan tələbələr, alternativ enerji və İT texnologiyaların inkişafıında öz töhfələrini verəcək

Xəbər verdiyimiz kimi fevralın 25-də Lənkəran Dövlət Peşə Təhsil Mərkəzinin açılışı olub. Bu gün təhsil müəssisəsinə mediatur təşkil olunub.

Ötən gün Azərbaycan Respublikasının Prezidenti İlham Əliyev Lənkəran Dövlət Peşə Təhsil Mərkəzinin açılışında iştirak edib. Bu gün Lənkəran Dövlət Peşə Təhsil Mərkəzinə mediatur təşkil olunub. Mərkəzin direktoru Afər Kərimov mediatur iştirakçılarına mərkəz barədə ətraflı məlumat verib. Bildirilib ki, ölkə başçısı tərəfindən açılışı olan mərkəz Lənkəran-Astara iqtisadi regionu üçün böyük əhəmiyyət kəsb edən təhsil müəssisəsidir. Təhsil müəssisəsində peşə təhsilinin inkişafı, iqtisadiyyatın inkişafı, dövlət-özəl sektorun əməkdalığı ilə bağlı daha geniş imkanlar yaranacaq.

Sinxron: Afər Kərimov direktor.

"Yeni infrastruktur imkan verəcək ki, bundan sonra daha müasir ixtisasların tətbiqi həyata keçirilsin. Burada həm alternativ enerji, İT texnologiyaları ilə bağlı, sənaye ilə bağlı müasir ixtisaslar var. Eyni zamanda elə kənd təsərrüfatının inkişafı üçün də çox müasir yanaşmalar var. Artıq onlar da tətbiq olunur. Dünən də açılışda bu haqqda məlumat verildi. Smart texnologiyalar tətbiq olunur. Bizim tələbələrimiz, eyni zamanda yerli fermerlərimiz üçün imkan yaranır ki, onlar təkminləşə bilsin bu sahədə".

Bildirək ki, mərkəzin təməli 1969-cu ildə Lənkəran Texniki Peşə Məktəbi kimi qoyulub. 2018-ci ildə Lerik Peşə Məktəbi və Lənkəran Peşə Liseyi birləşdirilərək onların bazasında Lənkəran Dövlət Peşə Təhsil Mərkəzi yaradılıb. Mərkəz 2024-cü ildən etibarən Publik Hüquqi Şəxs kimi fəaliyyət göstərir.

Müasir infrastrukturla təmin olunan mərkəzdə tədris, idman, yataqxana, kulinariya təlim korpusları, təlim-qonaq evi, əkinçilik və emalatxana laboratoriyaları, istixana, həmçinin avtotəmir və CNC (dəzgahların kompüterləşdirilmiş idarəetmə sistemi) emalatxanaları yaradılıb. Burada, eyni zamanda, informatika kabinetləri, müasir sinif otaqları, hərbi hazırlıq kabineti, kitabxana, 300 nəfərlik akt zalı və yeməkxana fəaliyyət göstərir. Ərazidə 53 nəfərlik yataqxana binası inşa edilib və yenidənqurmadan sonra korpusların sayı 7-yə çatdırılıb.

2025/2026-cı tədris ilində mərkəzdə 42 ixtisas üzrə 55 qrupda 962 tələbə təhsil alır. Onların 385-i qadındır. Müəssisədə turizm, kənd təsərrüfatı, sənaye, xidmət, İT texnologiyaları və alternativ enerji istiqamətləri üzrə kadr hazırlığı həyata keçirilir.



Mərkəzdə yeni maddi-texniki baza formalaşdırılandan sonra bir çox müasir ixtisaslar, o cümlədən elektrik və hibrid avtomobillərinin texniki qulluğu və təmiri üzrə texnik, kompüter şəbəkələri və şəbəkə inzibatçılığı, proqramla idarə edilən sənaye avadanlıqlarının texniki istismarı, kibertəhlükəsizlik, kompüter sistemlərində proqramlaşdırma, binaların tikintisi və istismarı, elektrik xətlərinin, günəş panellərinin quraşdırılması və təmiri üzrə mütəxəssis və texnik ixtisasları tədris olunur.

Burada tələbələrə ilk peşə, texniki peşə və yüksək texniki peşə təhsili pillələri üzrə biliklər verilir. Hazırda mərkəzdə 138 nəfər çalışır.

Lənkəran Dövlət Peşə Təhsil Mərkəzi kadr hazırlığı istiqamətində dövlət və özəl sektoru təmsil edən 30-a yaxın müəssisə ilə sıx əməkdaşlıq edir. Bu əməkdaşlığa özəl sektorla birgə kadr hazırlığı, mütəxəssislərin tədrisə cəlb olunması, istehsalat təlimləri, ustad dərsləri, həmçinin sosial və innovativ layihələrin icrası daxildir.