ထိုင်းဘက်က ဖမ်းဝရမ်းထုတ်ရန် ပြင်ဆင်နေသည့် ကရင် BGF ခေါင်းဆောင်များ

Описание: ထိုင်းဘက်က ဖမ်းဝရမ်းထုတ်ရန် ပြင်ဆင်နေသည့် ကရင် BGF ခေါင်းဆောင်များ
…………
ကရင်နယ်ခြားစောင့်တပ်ဖွဲ့ ( BGF) ခေါင်းဆောင်များဖြစ်သော ဗိုလ်မှူးကြီး စောချစ်သူ၊ ဗိုလ်မှူးကြီးစောမုတ်သုန်နှင့် ဗိုလ်မှူးစောတင်ဝင်း အပါအဝင် ထိပ်ပိုင်းခေါင်းဆောင်များမှာ မြန်မာ-ထိုင်းနယ်စပ် ကရင်ပြည်နယ်၊ မြ၀တီမြို့နယ်ရှိ ကျားဖြန့် (ခေါ်) အွန်လိုင်းငွေလိမ်ဂိုဏ်းများ၏ အဓိကတာဝန်သူရှိများဖြစ်သောကြောင့် ဝရမ်းထုတ် ဖမ်းဆီးနိုင်ရန် စီစဉ်နေသည်။

ထိုင်းအစိုးရ အထူးစုံစမ်းစစ်ဆေးရေးဦးစီးဌာန (DSI) အရာရှိများက အဆိုပါ လူကုန်ကူးမှုများနှင့် ပတ်သက်၍ အစိုးရရှေ့နေများထံ ယမန်နေ့(ဖေဖော်ဝါရီ ၁၁)က တင်ပြကြစဉ် ထိုင်းတရားရေးဝန်ကြီးက ဝရမ်းထုတ်နိုင်ရေး ဆက်လက်လုပ်ဆောင်ရန် အတည်ပြုပေးခဲ့သည်။

လူကုန်ကူးမှု၊ ညှဉ်းပန်းနှိပ်စက်မှုများ၊ အတင်းအဓမ္မ ငွေလိမ်ရန် ခိုင်းမှုများဖြင့် မြ၀တီမြို့မြောက်ဘက် ရွှေကုက္ကိုမြို့သစ်နှင့် KK Park တို့သည် အမည်ဆိုးဖြင့်ကျော်ကြားနေရာ ထိုလုပ်ငန်းများကို စစ်တပ်ဩဇာခံ BGF ထိပ်ပိုင်းခေါင်းဆောင်များက ထိန်းချုပ်အကာအကွယ်ပေးထားကြသည်။

၎င်းတို့ဒေသတွင် ‘ကျားဖြန့်လုပ်ငန်းများ လုံးဝမရှိ’ ဟု အစဉ်တစိုက် ငြင်းဆန်းလာခဲ့သည့် BGF တပ်ဖွဲ့သည် ယခုအခါ ‘ကျားဖြန့်ပပျောက်ရေး နှိမ်နင်းရေး အထူးအဖွဲ့’ ဖွဲ့မည်ဟု လေသံပစ်လာသည်။

အကယ်၍ ဖမ်းဝရမ်း အတည်ဖြစ်လာပါက BGF အနေဖြင့် စစ်ကောင်စီနှင့် ဆက်လက်ပူးပေါင်းမည်လား၊ ကရင်အမျိုးသားအစည်းအရုံး KNU ဘက်က ရပ်တည်မည်လား ဆိုသည်မှာ တိတိပပ မသိရသေးပေ။

အောင်ခမ်း၊ အေဘီ