Zarafat Deyil! Bu şəxslərə Karvalol Dərmanı içmək OLMAZ!

Описание: #demədidemə #sağlamlıq #karvalol
Korvalolun faydası və zərəri
Korvalol, demək olar ki, hər bir evin dərman rəfində/qutusunda var. Yaşlı insanlar onu aritmiya, ürək ağrıları, hətta yüksək təzyiq zamanı əvəzsiz “ilk yardım” hesab edirlər. Korvaloldan özünü yaxşı hiss etmədikdə belə, heç bir diaqnoz qoyulmadan istifadə edənlər də var. Lakin mütəxəssislər korvalolun da insan orqanizminə ziyan vura biləcəyi qənaətindədirlər.
Korvaloldan istifadəni dayandırmalıyıqmı? Bu, mütləqdirsə, hansı hallarda? Sualların cavabı videomuzda! Bəli, bugünkü videoda dərmanın tərkibini, xüsusiyyətlərini, həmçinin, onunla əlaqəli mifləri və zərərlərini təhlil edəcəyəm...

Korvalolun tərkibi.
Dərmanın əsasını 3 aktiv maddə təşkil edir:
1) α-bromoizovaleriant turşusulu etil spirti. Bu maddə daxili orqanların hamar əzələlərini rahatlaşdırır və sinir sisteminin kanallarından impulsların keçməsini ləngidir. Nəticədə, insan özünü sakit hiss edir, təzyiqi azalır.
2) Fenobarbital. Onun təsiri əvvəlki tərkib maddəsinə oxşardır, ancaq əlavə olaraq, fenoborbital təsirli yuxugətiricidir.
3) Nanə yağı. Nanə yağı ürəyin və beyinin damarlarını rahatlaşdırır; bu da ürək ritminin və qan dövranının normallaşmasına səbəb olur.

Bəs, hər 3 komponentin birləşməsinə nə ehtiyac var? Çünki onlar eyni vaxtda istifadə edildikdə, bir-birinin təsirini artırır.

Korvalolun istifadəsi.
Dərmanın tərkibindən belə nəticəyə gələ bilərik ki, o, ürək-damar və sinir sistemlərinin xəstəliklərinin müalicəsində təsirlidir. Amma praktikada səmərəlilik çox aşağıdır. Korvalol yalnız kiçik funksional pozğunluqlarda simptomları aradan qaldırmaq üçün istifadə olunur. Dərmanın təlimatında onun tətbiq sahələri aydın şəkildə müəyyənləşdirilib:
1) Nevroz;
2) Yuxusuzluq;
3) Koronar arteriyaların yüngül spazmları və yüngül taxikardiya;
4) Bağırsaqların spazmları;

Yəni korvalol insan orqanizminin bir neçə sisteminə sakitləşdirici təsir göstərir. Korvalol qəbul etdikdən sonra təzyiqin bir qədər azalmasına baxmayaraq, hipertenziya üçün istifadə edilə bilməz. Çünki effekti az olacaq və problem həll edilməyəcək. Təzyiqin kəskin yüksəlməsi halında təcili yardım çağırmaq lazımdır ki, infarkt və insult riskinin önünə keçilsin.

Korvalol nə vaxt istifadə edilməməlidir? Nə zaman təhlükəli ola bilər?
Dərman haqqında əsas mif onun təhlükəsizliyi ilə bağlıdır. Müəyyən bir səbəblə korvaloldan istifadə etməyə adət etmiş insanlar çox vaxt onun hansı təhlükə yaratdığından xəbərsiz olurlar.
1. Ürək çatışmazlığı olan xəstələr və infarkt keçirmiş insanlar üçün zərərlidir. Həmçinin, arterial hipotoniyadan əziyyət çəkənlər də korvalol istifadə etməməlidirlər;
2. Olduqca zəhərli bir dərmandır. Buna görə də, böyrək və ya qaraciyər problemləri yaşayanların korvaloldan istifadə etməməsi ehtiyat tədbirindən daha artıq məna daşıyır.
3. Depressiyadan əziyyət çəkənlər istifadə etməməlidirlər. Sedativ xüsusiyyətlərinə baxmayaraq, korvalol depressiv pozğunluğu gücləndirə bilər.

Mütəxəssislər tövsiyə edir ki, hamilə qadınlar korvaloldan, ümumiyyətlə, uzaq dursunlar. Alkoqoliklər və narkotik aludəçisi olan insanlar üçün də dərman təhlükəlidir. Alkoqol ilə birlikdə qəbul edilən korvalol bədənin intoksikasiyasına və böyrəklərin sıradan çıxmasına səbəb ola bilər.
Korvalolun tərkibində olan fenobarbital isə asılılıq yarada bilir. Buna görə də, həkimlər yaşlı insanların bu dərmanı qəbul etmələrinin xüsusilə təhlükəli olduğunu vurğulayırlar. Reseptsiz, mütəmadi olaraq içildiyində asılılıq sürətlə yaranır. Dərmandan istifadənin qəfil dayandırılması da mənfi fəsadlarla yadda qalır. Belə ki, daxili gərginlik anidən yüksəlir, insan özünü halsız, zəif hiss edir, titrəmə, ürəkbulanma və başgicəllənmə kimi bir çox xoşagəlməz simptomlar meydana çıxır.
Yaşlı insanlar üçün korvalolun başqa bir təhlükəsi də yıxılma və yaralanma riskidir. Çünki dərman sinir sistemini sakitləşdirir, təbii reaksiyalara maneə törədir.
Bəs, siz korvalol istifadə edirsiniz?